MERKEZÊ XEBERAN - Serdozgerîya Dêrsim û Meletîyî û ATK yê Stenbolî çend aşmî yo ke keyeyê Tekmenuraye meşgul keno û cenazeya kênaya înan ya şervana YJA Starî Şehrîbane nêdanê aye. Dayîka Şehrîbane Fatma Tekmenuraye reaksîyon mojna nizdîbîyayîşê serdozgerî û vat ke serdozgerî înan meşgul keno. Fatma vat ke aye cenazeya kênaya xo wazena.

 

24ê kanûna 2022yî de Dêrsim de mabenê leşker û şervananê YJA Star û HPGyî de pêrodayîşêk dijwar vejîyabî. Pêrodayîşo dijwarin de gerîlayê HPGyî Zeynal Kuçuk (Şevger Semsûr) û a YJA Starî Şehrîban Tekmenuray (Arjîn Sarya) dinyaya xo bedilnenê û cenazeya înan wedarîyeno morgê Dezgehê Tipê Edlî (ATK) yê Meletî. Dimayê demêk verê ke malumat bidîyo keyeyê Tekmenuraye cenazeya Şehrîban û Zeynale goristanê bêkesan ê Meletîye de defin kenê. Goreyê malumatan ke keyeyê Tekmekuraye da; cenazeya Zeynalî hetê keyeyê ci ra ameya tespîtkerdiş û bi amadebîyayîşê keyeyî ameyo definkerdiş.

 

Eksê keyeyê Zeynalî bi tu şeklêk malumat nêdîyeno keyeyê Tekmenuraye ke Şirnexî ra yo û nika Antalya de ciwîyeno. Cenazeya kênaya înan zî eynî roje de kişta cenazeya Zeynalî de ameyo definkerdiş. Bade demêk ke cenazeya kênaya înan yena definkerdiş Şûbeyê TEMî yê Antalyaye de polîsî seba testê DNAye nimuneyê gonî keyeyê Tekmenuraye ra gênê. Aşma adare de bado ke HPGyî şehadete wirdî gerîlayan eşkera kerdî keyeyê Tekmenuraye pê hesîyeno ke kênaya înan dinyaya xo bedilnaya û seba girewtişê cenazeya kênaya xo muracatê Serdozgerîya Komarî ya Dêrsimî keno.

 

Cenaze nêdanê keyeyî

 

Muracatê dîyîn de Serdozgerîya Komare ya Dersimî de keyeyê Tekmenuray aresteyê ATKyî Meletî keno. Demo ke keyeyê Tekmenuray şino Meletî ATK erdlerz sebeb mojneno ra û dîyar kerdî ke tu xizmet nêdanê û keyeyî aresteyê ATKyî yê Stenbolî keno. Serê muracatê ATKyî yê Stenbolî keyeyê Tekmekuray rê neql kerdê ke nimûneyê gonî ya TEMyî Antalya ra girewtê û cenazeya Şehrîbane yewbînan gênê û keyeyî aresteyê Serdozgerîya Komare ya Meletî keno. Serdozgerîya Komare ya Meletî, çend aşmî bi sebebê ke karê ci yê erdlerzî esto, keyeyê Tekmenuray meşgul keno û cenazeya kênaya înan teslîmê înan nêkeno.

 

Goristanê bêkesan de defin kerdê

 

Dayîka Şehrîban Tekmenuray, Fatma Tekmenuray û dedê ci Haci Tekmenuray derheqê babete de Rojnameyê Xwebûnî rê qisey kerd. Dedê Şehrîbane Haci, dîyar kerd dimayê pê hesiyayê biraziya ci dinyaha xo bedelnaye muracatê Serdozgerîya Komare ya Dersimî kerdê û wina vat: “Ma tîya rê aresteyî ATKyî Meletî kerdî. Meletî de ma şî ATK û selahîyetdarêk ma ra vat, ‘Ma xeyman de manenê, çîyêk tîya çin o. ATK şîyo Stenbol. Ma numraya midur bidê şima pê reyde qisey bikerê’. Wexto ke ma midur gêrayî û ma ci ra vat ke cenazeya ma cenazeya gerîlla ya, ma ra vatî ê cenazeya erdlerzî ewnîyenê. Midurî dîyar kerd ke cenazeyêke wina destê înan de çin a û vat, ‘Ganî Dêrsim ma ra nuşte binuso. Ma wina cewab bidê’. Serê muracatê ma yê bi israr ATKyî Stenbol de qebûl kerd ke testê DNAyî vejîyayo û gonî yewbînan girewta. Bi hetkarîya keyeyêk Semsûrî ke lajêk înan bi birazîya mi reyde dinyaya xo bedelnayo, ma cayê birazîya mi tespît kerd û ci rê gorêk viraşt. Ma paweyê dozgeriya Semsûrî yê ke cenaze bidê ma.”

 

‘Paweyê cewabê dozgerî yê’

 

Dayîka Tekmenuray zî dîyar kerd ke dimayê TEMê Antalyayî nimûneyê gonî girewtê 2 aşmî badê xebera şehadetê kênaya aye ci rê ameyo û wina vat: “Bi rayîrê keyeyêk semsûrîjî ma cayê ke kênaya mi uca de nimitê, tespît kerd û ci rê goristanêk viraşt. Roşan de ez şîya serê gorê aye. Keyeyê semsûrij demo ke cenazeya lajê xo morg de tespît kerdê, ewnîyayê cenazeya kênaya mi ra zî û aye nas kerdê. Vanê ke demo ke lajê xo nimitê, cenazeya kênaya mi zî verê ci de nimitê. Serê nê zanayîşî de ma vanê gorê kênaya mi. Belkî ê aye nêbo zî. Ma paweyê cewabê dozgerîya Semsûrî yê. Her rey ma ra vanê karê ma esto û cenazeya kênaya mi nêdanê. Wazena cenazeya kênaya mi lez bidê û berî Cizîr de biniminî.”