Elfazî Toral

 

STENBOL - Tora Pawitişê Cinîyan Ceren Barişe da zanayîş ke înan bi têgêrayîşê cinîyan xo bîyaye kerdî û vera polîtîkaya dişmenê cinîye de wina vat: “Ma hîşmendîya ke nê îqtîdarî do birijna de yî. Ma do hesab şîdetê camêrd-dewlete ra bipersî. Ma do her tim cigêrayîşê edaletî rayra bibî. Ma do têkoşînî berz bikerê.”

 

Şîdetê camêrd-dewlete Kurdistan û her cayê Tirkîya de her ke şino zêde beno, kerdoxî bi polîtîkayê bêcezaberdayîşî yenê xelatkerdiş. Vera zîhnîyetê dişmenîya cinîye de têkoşînê cinîyan zî roj bi roje gird beno. Îqtîdarîya ke têkoşînê cinîyan û cinîyan hedef gêna, hêrişê hemverê destkewtişê cinîyan zî zêde beno. Kerdoxî polîtîkaya bêcezaverdayîşî ra cesaret gênî û şîdet domnenî. Tirkîya de her roje tewr tay cinîyî yenê qetilkerdiş.

 

Cinîyî seba destkewtişanê xo têkoşîn danî

 

Îqtîdarîya AKP-MHPyî ke şewêk de Peymana Stenbolî ya cinî, doman û LGBTÎyan pawêtêne, fesh kerd û nika hedefê aye de qanûnê hûmara 6284î esto. Huda Par û Partîya Refaho Newe paştî danî bedilnayîşê qanûnê bingeyîn ke îqtîdarî pêşkêşê meclîsî kerd. Cinî vera nê hêrişan de fek destkewtişanê x ora vera nêdanî û têkoşîn danî.

Endama Tora Pawitişê Cinîye Ceren Barişe derheqê polîtîkayê îqtîdarîye yê dişmenîya cinîye de ajansê ma rê qisey kerd.

 

 ‘Cinî têkoşînî de qerardar a’

Cerene da zanayîş ke cinî qerardara ke têkoşînê xo dewam bikera û derheqê feshkerdişê Peymana Stenbolî de wina vat: “Wexto ke Peymana Stenbolî fesh kerdî ma zanayêne do hêrişê qanûnê 6284î zî bikerî. No hewldayîşê înan dişmenîya hemverê cinîyan mojneno. AKP şîdetê camêrdî yê serê cinîye yê her raşteyî zano û vîneno. Vera nê caardişan de ganî ma têkoşîn bikerî. Tena cinî nê ganî ma bi heme têgêrayîşê têkoşînî yê Tirkîya reyde vera înan de têkoşîn bikerî.”

 

‘Polîtîkaya dişmenîya cinîye sebebê qetilkerdişan a’

 

Cerene dewamê qiseykerdişê xo de dîyar kerd ke bi seserran o ke cinî binê şîdetê camêrdî de ya û netîceyê polîtîkaya dişmenîya cinîye de cinî yena qetilkerdiş û vat: “Her roje cinî yenê qetilkerdiş. Kiştişê cinîyan her ke şino zêde beno. Vera kiştişan de tu polîtîkayêk ke vernî bigêra çinî ya. La polîtîkaya bêcezaverdayîşî kerdoxan zêde kena. Pêkerdişêk ke heqê cinîyan paweno çinî yo. Coka ra çîyo ke ma kenê têkoşîn o. Vera şîdetê camêrdî yê bêcezaverdayîşî de ganî ma xover bidî. Cinî xoverdayîşî de qerardar a.” 

 

Bi rêxistinê cinîyan reyde têkoşînê hempar mûnayî

 

Cerene dîyar kerd ke hewl danê ke xo rê her ca raşte abikerê û Tora Pawitişê Cinîyan zî bi atolyeyê pawitişê cewherî têkoşînê xo pîl keno û xeylêk xebatanê bînan rayra benê. Cerene qiseykerdişê xo wina dewam kerd: “Dimayê weçînayîşan ma hedefê berzkerdişê têkoşînî da verê xo. Hedefê ma oyo ke ma bi sazgeh û rêxistinê bînan reyde xebatan rayra berê û têkoşînê hempar rayra berê. Hedefê ma oyo ke ma hemverê îqtîdarê AKP-MHPyî de cuya neweyî awan bikerê.”

 

‘Ma bi tevgerê cinîyê kurdî de têkoşîn rayra benê’

 

Cerene wina qedêna: “Bi tevgerê cinîyanê kurdan reyde tevgerê femînîst torê têkoşînî pîl kerd. Ma hemverê hêriş û tedayê serê cinîyan pîya rayra benê. Ma yewbînan wey kenê. Tevgerê cinîyan nê çî ma musnayo. Ma do torê têkoşînê xo rayra berê û fek têkoşînê xo ra vera nêdê.”