Rozerîn Gultekîn

 

STENBOL- Şahîntepe ke binê nameyê bedilnayîşê bajarî de yeno talankerdiş de şar vera projeyê rantî de xover dano û dîyar keno ke na ê herra xo terk nêkenê. Cinîyan dîyar kerd ke çimê dewlete mird nêbena û do herra xo înan rê nêverdê.

 

Xeylê herêmê Stenbolî binê nameyê projeyê bedilnayîşê bajarsazîye de yenê talankerdiş. Înan ra yew zî taxa Şahîntepe ya Başakşehîr o. Taxe nizdîyê Projeyê Kanal Stenbolî de ca gêna. Şar dîyar kerd ke seba rantî înan koç kerdî.

 

Cinîyan reaksîyon mojna projeyî û dîyar kerdî ke ê vera nê caardişan de xover danê.

 

Cinîya bi nameyê Bahrîye Çelîkkole vat ke seba înan mexdur bikerê no proje yeno viraştiş û vat: “Keda min a 23 serran esta. Mi her tim bi pereyê xo girewt. Nika kewtî peynîya Şahîntepeyî. Vanê ke banî vera erdlerzî de riskin ê. La rijnayîşê ci serra 99î de rijîya. Çimê mi erse de nîyo la dewlete her tim wazena. Çimê dewlete mird nêbeno. Ê qersan de ciwîyenê la çimê înan tîya de yo. Ma cinîyî vera nê projeyi de yê. Ma banê xo înan ra nêverdenê.”

 

 

‘Acaba do canê ma bigîrê?’

 

Kezban Ergune zî da zanayîş ke 24 serrî yo taxe de ya û heme cuya tîya bi destê xo awan kerda û vat: “Netîceyê têkoşînê ma de awe û cerayan ame tîya. 24 serrî yo ez tîya de ya, ê kam ca de yê. Nika ameyî destê ma ra gênê. Tu heqêk nêdanê ma. Yê ke danê ma zî deyn danê. Tîya cayêk çol o la wazenê ma biancê cayêk hîna xirab. Tîya de awanîyan viraştî, hebê awanîyan 5 mîlyon TL yo. Ez senî bi 5 mîlyonî keye bigêra. Ez nêwazena herra xo bida. Prosesêk bêhuqûqî pê yeno. Bi kêfî têgêrenê. Qanûnan nêşinasnenê. Do xozaye qetil bikerê.”

 

Bê malumatê înan banî ameyî rotiş

 

Gulfer Çetînkayaye zî ard ziwan ke 99î de Ordu ra ameya Şahîntepe û tîya de ca bîya. Gulfere ard vîr ke prosesê bedilnayîşê bajarsazîye de zî bêmalumatê înan banê înan hetê Başakkent A.Ş ra ameyî rotiş. Gulfere reaksîyon mojna rewşe û vat ke wazenê înan raşteyê cuye ra bivejnî û domna: “Ma bedilnayîşê bajarî nêwazenê. Pereyo ke ê danê seba werdê şewêk mird nêkeno. Cayê mi destê mi ra gênê û awanîya 12 qatin virazenê. Ma cayê xo nêdanê înan.”

 

 ‘Ma wazenê azad biciwîyê’ 

 

Endama Koordînasyonê Meclîsê Heqê Starbîyayîşê Şahîntepe Dongul Bîlgîne zî nê çîyan vat: “Bi bedilnayîşê rantî wazenê vernîya şarî bigîrê. Cayê ke ma xo rê awan kerd şaredarî wazena xesp bikera. Wazenê ma berê cayêk cîya û ma deyndar bikerê. Ma heqê xo, heqê keda xo wazenê. Ma nêwazenê cayê xo terk bikerê. Ma wazenê azad biciwîyê. Bê malumatê ma banê ma ameyî rotiş. Seba paştîdayîşê keyeyan ma nobete da destpêkerdiş. Do nobeta ma dewam bikera.”

 

Cinîya bi nameyê Fadîme Çelîkkole zî nêrazîbîyayîşê xo ard ziwan û da zanayîş ke aye nêwazena Şahîntepeyî ra biveja û hêzê înan çin o ke awanîyê ke uca de yenê viraştiş bigîrê. Fadîmeye vat ke aye do xover bida û herra xo înan rê nêverda.