Sema Çaglak

 

ŞIRNEX - Hemsereka HDPyî ya Silopya Asuman Kultere bale ant sere hêrişanê bi wesayîtanê zirxîyan yê vera tutanê kurdan û da zanayîş ke polîtîkayê bêcezaverdayîş û bêvengî hedîseyê winasîyan zêde kenê. Asumane vat ke vera hedîseyan de tena kurd nê ganî dezgeh û komeleyê mîyanneteweyî zî bikewê dewre.

 

Çawişê pispor A.K.P.yî qezaya Geverî ya Colemêrgî de bi wesayîtê xo tuto 5 serre Erdem Aşkanî dabî û tutî qetil kerdbî. Çawişê pispor yo ke ame destbendkerdiş badê îfadeyî serbest ame veradayîş. Bi kiştişê Erdem Aşkanî reyde kiştişê winasî yê bi wesayîtê zirxîyan reyna kewte rojeve. Goreyê raporê Komeleya Heqanê Merdiman (ÎHD) yê Şûbeyê Amedî, bi kiştişê Erdem Aşkanî reyde 15 serrê peyênan de bajarê vakurê Kurdistanî de 82 hedîseyê ke bi wesayîtê zirxî yê polîs û leşkeran dayî hemwelatijan ro pê ameyê û 21ê ci tutî pêro pîya 44 kesî nê hedîseyan de dinyaya xo bedilnayê. Heto bîn de 23ê ci tutî bi temamî 94 hemwelatijî zî birîndar bîyî.

 

Derheqê hêrişanê bi wesayîtê zirxî yê vera tutanê kurdan de Hemsereka Partîya Demokratîke ya Şaran (HDP) ya Silopîye Asuman Kultere qisey kerd.

 

‘Seba kurdan polîtîkayê bêcezaverdayîşî dewre de yê’

Asumane dîyar kerd ke bi serran şarê kurdî hedef de yo û yeno qetilkerdiş û vat ke tewr zêde cinî û tutê hedef de yê. Asumane wina dewam kerd: “Heta nika bi seyan kurdî qelibîyayîş, pirodayîşê wesayîtê zirxî vera dinyaya xo bedilnayî û yan zî birîndar bîyê. Nê hedîseyan de verê ra heta nika tu kes cezayêke nêgirewto. Şirnex û qezayanê ci de xeylê hedîseyê winasî qewimîyenê.”

 

‘Bêcezaverdayîş dewre de yo’

 

Asûmane ard vîr ke serra 2017î de zî wesayîtêk zirxî kewt mîyanê keyeyêk û di tutî ke zerre de bî ameyî qetilkerdiş û wina vat: “Çi heyfo ke nê hedîseyî de zî kesek ceza nêgirewt. Bi desan tutê ma hetê wesayîtanê zirxîyan ra ameyî qetilkerdiş. Bêcezaverdayîş dewre de yo. 16ê gulane de Taxa Dîcle ya qezaya Silopîya ya Şirnexî de tuto 5 serre Y.Y.yî vernîya keyeyê xo de kay kerdêne. Wesayîtêk zirxî piro dabî û bi giranî birîndar bîbî. Derheqê hedîseyî de zî çi heyfo ke tehqîqat nêame akerdiş.”

 

‘Asayîşê canê tutan nêmendo’

 

Asumane dewamê qiseykerdişê xo de da zanayîş ke asayîşê tutan nêmendo û wina vat: “Nimuneyê tewr peynî Gever de bî. Tutî yenê qetilkerdiş û kiştoxê înan serbest teber de gêrenê. Tu asayîşê canê tutanê ma nêmendo. Gama ke ma ewnîyenê serê her kuçeyêk bajarê ma de wesayîtê zirxî estê. Raşte û kuçeyanê tengan de wesayîtê zirxî gêrenê.”

 

‘Ganî heme dezgeh û rêxistinê mîyanneteweyî bikewê dewre’

 

Asumane qiseykerdişê xo yê peyênan de dîyar kerd ke Tirkîya de heqê tutan û cinîyan çin o û nê çîyan ard ziwan: “Tewr zêde zî heqê tutan yeno binpaykerdiş. Tutê bêsuc û bêgunehî raşteyê ke tede kay kenî de yene qetilkerdiş. Bêvengî û polîtîkayê bêcezaverdayîşî nê hedîseyan zêde kenê. Seba heqanê tutan tena kurdî nê ganî heme şar, dezgeh û rêxistinê mîyanneteweyî bikewî têgêrayîş mîyan. Êdî keye tersenê ke tutanê xo bierşawî teber. Rapor û dayeyê nê hedîseyan heme raşte de yê û xeylê dayeyê krîtîk ê. Ma wazenê ke vernîya nê qetlîyaman bêro girewtiş û kiştoxê tutanê ma bêrê tepiştiş û cezakerdiş.”