AMED - Saadet Gulera ke 15 serrîya xo de bi zorî ameya zewecnayîş û 16 serrîya xo de şîdetî reyde rî bi rî menda wina vana: “Mi 16 serrîya xo de kuyayîş werd. Ciwantîya mi helîya. Mi qerar da ke êdî cuye wina derbaz nêbena û mi sere wedarna.”

 

Mîyanê komelî de rol û mîsyonê cinîye goreyê zîhnîyetê serdest ê camêrdî ameyo dîyarkerdiş. Goreyê nê komel şekil gêno û cinî zî vera zîhnîyetê cînsîyetperestî de xover dana. Cinî vera şîdetê camêrd, muhakeme û îqtîdarî de têkoşînê xo gird kena û seba cinîyanê bînan zî bena nimune. Heto bîn de zewacê tutan bi tena sereyê xo problem o. Hema zî emrê xo yê şenikî de barê giran danî serê milê xo û vera her tewir hêrişan de hewl danî ke biciwîyê.

 

Înan ra yew zî Saadet Gulera 65 serrî ya. Saadete zî sey bi hezaran cinîyanê bînan 15 serrîya xo de ameya zewecnayîş û 8 tutê aye estê. Ma do hîkayeya Saadete bîyarê ziwan.

 

Emrê şenik de yena zewecnayîş

 

Saadete 15 serrîya xo de hetê keyeyê xo ra bi zorî yena zewecnayîş, hema emrê xo yê şenikî de şîdetê camrêdî reyde rî bi rî manena. Saadeta ke bi vatişê ‘Asayîş çinî bî, her roja mi bi şîdetî derbaz bîyêne. Mi vatêne werikêna zewac çinî bibayêne û no zî çareye ma de nêameyo nuştiş’ serewedarnayîşê xo yê hemverê zewacî ana ziwan. Saadeta ke vana ‘Mi tu xêrêk zewacî ra nêdî. Mirad çimê ma de mend. Eke mirad bêxêr bo wa çinî bo’ qala şîdetê hemverê xo kerd. 

 

‘Mi dewaya fekverdayîşî akerde’

 

Saadete da zanayîş ke da zanayîş ke hema tutê aye şenik bî, mêrdeyê aye şino yewna cinîye reyde bi mareyê meleyî zewecîyeno. Saadete dîyar kerd ke vera nê de dewaya fekverdayîşî akena û wina qala hîkayeya xo kena: “Seba ke tirkîya mi çinî bî mi nêzanayêne ez se bikera û mi kesêk nêdî ke hetkarîya mi bikero. Dimayê hewldayîşê yew serrî mi xo resna û mi zabitnameyêk nuşt û mi rê vatî ke ‘Şo baro, do avûkatê baroyî hetkarîya to bikerê’. Nê çîyî ra dima ez şîya baro. Dima ra mi fek nê kesî ra vera da. La bi raştî zî cuye seba mi xeylê zehmet bî. Ciwantîya mi helîya. La mi êdî destur nêda ke bi no hewa cuye derbaz biba. Nizdîyê 16 serrî ez wina zewecnaye menda.”

 

‘Her tim bi şîdetî reyde rî bi rî menda’

 

Saadeta ke bi serran zilm û şîdetî reyde rî bi rî mende wina vana: “Xeylê zêde şîdet bi mi kerd. Şîdet vera parsûyê mi şikîya û sereyê mi şikit. Wexto ke ez digane bîya pê asinî hêrişê mi kerd. Çîyo ke nêmend ard sereyê mi. Çend reyan mi gereyê ci kerd. La tutanê xo vera mi gerreyê xo tepîya ant. Dima ra mi fek ci ra verda. No merdim çend aşme verê cû merd. Çend ke tutê mi waştî ez şêra cenazeya ci ser zî ez nêşîya, ez nêeşkaya şêra cenaze çike hêrişê mi kerdbî. Roja ke merd zî mi heqê xo ci rê helal nêkerd.”

 

‘Waştî mi reyna bizewecnê’

 

Saadete ard ziwan ke bado ke aye fek nê kesî ra vera da aye rizgar bîya û wina dewam kerd: “Merdimê mi hewl dayî ke mi yewna reye bizewecnî. La mi qebul nêkerd. Mi înan rê vat ‘Ez yewna reye nêzewecîyena. Heqê şima çin o ke şima serê cuya mi de qerar bidê’. Kesêk nêeşkeno derheqê cuya mi de qerar bido. Merdimê mêrdeyê mi yenê heqaretê mi kenê û çim verdayî malê mi. La ez sere nêronena. Nika ez bi di tutanê xo reyde ciwîyena. Tutêk mi zî astengdar o.”

 

Têkoşînê cuye dana

 

Saadete qiseykerdişê xo yê peyênan de vat ke hetêk de bi tena sereyê xo têkoşînê cuye da û heto bîn de zî hewl dana mîyanê şert û mercê zehmetinan de îdareyê keyeyê xo bikera û wina peynî kerd: “Xebatkarê mi çin ê. Bi zehmetî ez cuya xo dewam kena. Lajêk mi nika Stenbol de xebetîyeno. La o zî nêewneno keye ra. Nika tena lajêk mi yê astengdar mi het de yo.”