Sema Çaglak

 

ŞIRNEX – Saadet Îdîna tepişteyê nêweşe ra yew a û hetê ci yê çepî felç o û çimê xo de problemê weşîye yê cidî ciwîyena. Dayîka Saadete, Alîye Îdîne da zanayîş ke rewşa kênaya aye her ke şina giran bena û waşt ke kênaya aye serbest bêra veradayîş.

 

Zîndanê Tirkîya û bajarê vakurê Kurdistanî de bi seyan tepişteyê nêweşî estî. Her ke şino rewşa nê tepişteyanê nêweşan giran beno û ne serbest yenê verdayîş û zî yenê dermankerdiş. Waştişê tepişteyan ê tedawîyî zî yeno redkerdiş. Nê tepişteyê nêweşan ra yew zî Saadet Îdîna 36 serrî ya. Saadete milê xo yê çepî ra felç a û çimanê xo ra zî probleme weşîye ciwîyena. Saadete reya yewine serra 2015î de wexto ke şina zîyaretê waya xo Manîsa de yena destbendkerdiş û yena tepiştiş. Saadete şirawenê zîndanê Şakranî yê Îzmîrî. Uca de 2 serrî û 6 aşme tepişte manena û dima ra serbest yena veradayîş.

 

 

Saadete serra 2018î de felç bena, serra 2018î de wexto ke seba îfadedayîşî şina Mudirîya Polîsan yena destbendkerdiş û dima ra bi îdîayê ‘Endamtîya rêxistine’ yena tepiştiş. Saadete 4 serrî yo Zîndanê Şirnexî yê Tîpê Tyî de yena tepiştiş û yew aşme vere cû surgunê Zîndanê Erzinganî ameye kerdiş. Saadete rê 14 serrî cezaya zîndanî ame birnayîş.dayîka Saadete, Alîye Îdîbe (55) derheqê rewşa kênaya xo de qisey kerd.

 

‘3 rey krîzê zerrî derbaz kerd’

 

Alîye dîyar kerd ke kênaya aye bado ke Zîndanê Şakranî ra serbest ameya verdayîş nêweşxane de tedawî dîyêne û wina dewam kerd: “Prosesê nêweşîyê aye de rojêke bi bahaneyê aye îmza nêeşta venga aye kerdî û şî. La dima ra emnîyet de ameye destbendkerdiş û reyna ameye tepiştiş. Kênaya mi tepişteyê nêweşî ra yew a. 3 rey krîzê zerrî derbaz kerda. Çimanê aye de problem esto û çime aye tarî benê. Vera heme problemanê weşîye bi tena sereyê xo zîndanê Şirnexî de odeyêk de tena sereyê xo manena. Dimayê weçînayîşî zî aye surgunê Erzînganî kerdî.”

 

‘Tepişteya nêweşe serbest vera bidêne’

 

Alîyeye qiseykerdişê xo yê peyênan de ard ziwan ke weşîya kênaya xo ra fikarin a û waşt ke kênaya aye serbest bêra verdayîş û vat: “Wexto ke benê nêweşxane, raporê nêeşkena zîndan de bimana nêdanê. Heto bîn de derman zî nêdanê. Kênaya mi zîndanê Şirnexî de 6aşman odeyêk yew kesî de mende. Reyna zî xover dana. Wexto ke surgunê Erzînganî kerdî zî tu malumat nêdayî. Ma dima ra musayî rewşe. Nika zî uca de tepişte ya û vizêr telefon kerd. Vana ke nêweşîyê aye her ke şinê giran benê û, çime aye tarî benê û fitiqê paştîya aye zî giran bena. Kênaya mi zî mîyan de ma wazenê ke heme tepişteyê nêweşî serbest bêrê verdayîş. Xeylê tepişteyê nêweşî estê ke nêeşkenê zîndan de bimanê. Wa no zilm biqedîyo û zerrîya dayîkan wa nêvêşa.”