Sema Çaglak

 

ŞIRNEX – Hemşaredara HDPyî ya Cizîrî Berîvan Kutluya ke qeyûm tayînî herinda aye ame kerdiş bale ant serê qirkerdişê sîyasî yê Botanî û da zanayîş ke îqtîdar wazeno şarê Botanî ra heyfê weçînayîşî bigîro.

 

Operasyonê qirkerdişê sîyasî ke badê weçînayîşî Şirnex û qezayanê ci de dîyayî destpêkerdiş dewam kenê. Kişta ablûqaya bi wesayîtanê zirxî yê merkezê bajar û qezayanê bajarî, bi desan kesî ameyî destbendkerdiş û tepiştiş. Kişta ablûqa û destbendkerdişan hetêk de zî bajar bi xeylê metodanê cîyayan yeno mexdurkerdiş û zext bi şarî yeno kerdiş. Heto bîn ra ame dîyarkerdiş ke bi waştişê Walîtîye hetkarîya ke dîyayêne şarê qezayê Basa û Qilebanî ke Weqfê Hetkarîya Komelî ra ameyêne girewtiş zî ameya birnayîş.

 

Hemşaredara Partîya Demokratîke ya Şaran (HDP) ya Cizîrî Bêrîvan Kutluya ke qeyûm tayînê herinda aye ame kerdiş, derheqê hedîseyê ke Şirnex û qezayanê xo ci de yenê ciwîyayîş de ercnayîş kerd.

 

‘Botan de sîyasetêk bêehlaq yeno kerdiş’

 

Berîvane, dîyar kerd ke weçînayîş ra dima tedaya serê şarî bajar de hîna zêde bî û wina vat: “Şirnex de xebatê weçînayîşî wina rêze ra nêame rayraberdiş. Heme dezgeh û partîyê girêdayeyê îqtîdarî seba ke îqtîdarîya AKP û MHPyî ser bikewo kewtî dewre. Vera hende zext û caardişanê bêhuqûqîyan reyna zî şarê Şirnexî têk nêşî. Şirnex de xebata weçînayîşî bi tehdît û tedayan ameyî kerdiş. Tewr peynî ma zana ke parlementerê AKPyî yê Şirnexî şîyo dewê ke înan ra rayan nêeşkeno bigêro û vato ke ma do rayîranê şima virazê. No sîyasetêk bêehlaq o. Coka ra ganî sîyasetmedar bi sîyasetê xo hetê şarî ra bêrê heskerdiş. Nika zî badê weçînayîşî îqtîdar her taxe û kuçeyê Cizîrî de wesayîtê zirxî ca kerdo. Wexto ke ma raşteyan gêrenê ma vînenê ke, her sereyê kuçeyêk de wesayîtê zirxî û polîsan bi ca kerdê. No zî nîno qebulkerdiş. Wazenê mîyanê şarî de ters awan bikerê û raştîye dûrî bifînê. Weçînayîş ra ver zî raşteyan de bi gazê îsotî hêriş pê ardî la reyna zî şar raya xo eşt û îradeyê xo mojna. Nika zî wazenê cuye şarî rê heram bikerê. Şirnex û qezayanê ci de bi nê caardişan wazenê vîrê şarî têmîyan bikerê. La şarê ma her tim vindertişê xo mojna yo û do reyna sere çewt nêkero.”

 

‘Vera zilm û zextî de vindertişê şarî tim dîyar o’

 

Berîvane, da zanayîş ke nê prosesî de qirkerdişê sîyasî dayî dest pêkerdiş û wina vat: “Dimayê weçînayîşan nizdîyê bi seyan kesî ameyî destbendkerdiş. Bi taybetî zî ciwanî ameyî destbendkerdiş û tepiştiş. Dosyayê 8 serrî vere cû nika vetî û  bi nê dosyayan şarî hedef gênê. Dimayê weçînayîşî Botan de qirkerdişêk sîyasî dayî destpêkerdiş. Xora bi vatişanê xo zî nê çîyî eşkera kerdî. Vatêne heta 2028î Botan do destê ma de bibo. La timî nê vatişî agêrayî înan. Ne sîyasetê înan ê bêehlaqî çîyêk da înan û ne zî şîdet û zilmê xo yê serê şarî çîyêk bi dest fînayî. Bi desan reyan ma ameyî destbendkerdiş û zext serê ma de pê ardî. La reyna zî ma hîna bi hêz bîyî û bi hêvî kewtî mîyanê sîyasetî û ma fek sîyasetê xo yê mîyanê şarî ra vera nêdanê. Yanî  no zilm û zordestî wa nêro na mana ke şar têkoşînê xo ra gamêk tepîya erzeno.”

 

Berîvane, ard ziwan ke mîqyasê hêriş û tedayê înan çin o û vat: “Demo ke şinê erzenê serê keyeyêk de hêrişê pêro ferdê ê keyeyî kenê û heqaret înan rê kenê. Yan zî gama ciwanêk vînenê, bêsûc bo zî heqaret ci rê kenê. Nê reyde vindertişê xo yê dişminî ramojnenê. Walîtî û qeymeqamtî goreyê xo mevzuat tênêgêrenê. Qezaya Basa û Qilêbanî de Weqfê Hetkarîya Komelî û Paştdayîşê bêhincet hetkarîya ke xeylêk keyeyan rê ameyîne dayîş bi taybetî yê keyeyê ke raya xo danê HDPyî betal kerd. Bi nê caardişan wazenê şarê Şirnexî ra heyf wedarnê. Tewr peyîn  Hemsereka ma ya Elkî û îdarekarê uca ameyî tepiştiş. Nê tepiştiş û destbendkerdişî her qezayanê ma de zî dewam kenê. Xora hêvîya ma huqûq û edaletê Tirkîya ra çin a. La vengdayîşê ma seba huqûqê mîyanneteweyî yo ke ganî Tirkîya zî dest bierzo na babete. Ganî Botan bi tenê sereyê xo nêmano û hemverê qirkerdişê sîyasî yê Botanî de lazimî bi paştdayîşî esto.”