Mîdye Miqted

 

ŞEHBA - Cinîyan reaksîyon vera hêrişê dewleta tirke yê serê Vakûr û Rojhelatê Sûrîye û tewr peyîn zî serê  nêweşxaneyê Til Rifet dayî û ji sazgehê mîyanneteweyî waştî ke wayîrê helwest bê û dîyar kerdî ke heta agêrê serê herra xo Efrînî do xoverdayîşê înan dewam bikero.

 

No bi nêzdîyê des rojî yo ke dewleta tirke bi teyaregehê keşfî yê bêmerdim sivîlan hedef gêna. La no ne reya yewine yo ke dewleta tirke qirkerdişan 

 bi serê welatijê Şehbayî bi taybetî qezaya Tilrifetî de bi serê cinî û tutan de ana. Çi heyf nê pêro qirkerdişî û kerdoxê bêexlaqî verê çimê heme dewlet û rêxistinê heqê merdiman ê mîyanneteweyî yenê reynakerdiş. Çi dewleta tirke na rey zî nêweşxaneyêke kerf hedefê xo û bombavaran kerd. Dewleta tirke 16ê hizêrane de nêweşxaneyê qezaya Tilrifetî ya herêma Şehbayî de bi teyareyê keşfî yê bêmerdim topvaran kerd. Netîceyê topvaranî de zirar resa nêweşxane û eynî wextî de çar kesê ke yew ci ra hemşîreya nêweşxaneyî bî birîndar bî. Sewbîna rewşa di birîndaran zî mîyanê tehluke de yo. 

 

Hemverê nê hêrişî de cinîyê koçberî yê Efrînî ke eynî wextî de hemşîreyê nêweşxaneyî zî mîyanê înan de estê, reaksîyon mojnayî.

 

'Hedefgirewtişê nêweşxaneyî cuye tehdît kenê’

 

Hemsereka Heyetê Weşîye ya Efrîn û Şehbaye Elye Mihemede ajansê ma rê qisey kerd û vat: “No demêk dergo ke hêrişê dewleta tirke yê vera herêma Şehbaye zêdîyayî. La na reye dewleta tirke nêweşxaneyê qezaye hedef girewt û no zî dano mojnayîş ke dewleta tirke êdî dest bi binpaykerdişê heqanê merdiman ê hetê weşîye de kerda. Heto bîn de eke no hêriş reyna bêro kerdiş do bêro na mana ke cuya kesê ke herême de ciwîyenê tehdît kena. Seba ke herêma Şehba de tena di nêweşxaneyî estê, şar vere xo dano înan û xizmetê şarî kenê.”

 

'Cuya kesê ke ameyêne dermankerdiş kewte tehluke’

 

Eynî wextî de hemsîreyê nêweşxaneyê Tilrifetî Nêrgiz Hecî Reşîde zî wina ard ziwan û vat: “Bado ke dewleta tirke nêweşxane hedef girewt kesê ke tede ameyêne dermankerdiş rewşa înan kewte tehluke û nika xirab ê. Ma venga dewlete û rêxistinanê mîyanneteweyîyan kenê ke hemverê nê qeraran de bêveng nêmanê. Her çend ke nuqtaya hukmatê Rûsan peynîya nêweşxaneyî de biba zî reyna hemverê nê hêrişan de bêveng mendî.”

 

Nergîze peynîya qiseykerdişê xo de qerarê dewleta tirke yê hovî şermizar kerd û vat ke hema zî nê gaman de teyareyê keşfî yê bê merdim ê aîdê dewlete tirke serê asmenê herêma Şehbaye de gêrenê.

 

'Koçber seba agêrayîşê Efrînî xover danê’ 

 

Eynî wextî de Verfeka Partîya Yewîya Demokrate (PDK) ya qezaya Tilrifetî Sîlvana Hesene ajansê ma rê reaksîyonê xo da mojnayîş û wina vat: “Nêweşxane seba kesê koçberan ê herêma Efrînî ameyo akerdiş. Nê kesê herême de xoverdayîşêk pîl danê. Nê kesî vera heme astengî û ablûqayan bi hêvî yê ke agêrê bajarê xo Efrînî.” 

 

'Dinya heme lêşinîyê dewleta tirke vînena'

 

Sîlvana peynîya qiseykerdişê xo de nê çîyan ard ziwan û vat: “Bîyayîşê dewlete xo bi domnayîşê caardişê xo yê leşin û qirkerdişî yê serê koçberê Efrînî yê ke Tilrifetî de manenî domneno. Nê caardişî sîyasetê înan dano mojnayîş û asîyeno ke eynî wext de proje û wezîfeyê înan hetê heme dewletan ra yenê dîyîş. Sîyeno ke ê paştî danî çeteyanê DAIŞî yê Sûrîye. Heto bîn de eke nê çeteyî Tirkîya de bêrê muhakemekerdiş do êdî heme dewletî paştîdayîşê ci bikerê û dewleta tirke na rey vere cû ra hîna zêde hêriş bikera.”

 

'Heta ke ma agêrî Efrînî ma do xover bidê’

 

Sîlvana qiseykerdişê xo yê peyênan de reaksîyonê xo yê hemverê dewleta tirke da mojnayîş û vat: “Seba ke destpêkerdiş ra heta ewro hêvîyê ma yê agêrayîşê Efrînî esto, ma do heta peynî xover bidê. Heta agêrayîşê Efrînî ma do xover bidê. Ma birîndaran rê şîfa wazenê.”