Nazlican Yildiz

 

ÎZMÎR - Roşanê Qurbanî nizdî bî û cinîyê ke vejîyenê herînayîşê roşanî dîyar kerdî ke çîyêk nîno herînayîş û vatî ke sebebê nê polîtîkayan îqtîdar o. Cinîyan ard ziwan ke faturaya krîzî înan rê yena birnayîş.

 

Krîzê ekonomîye her ke şino xorî beno û hemwelatijî bi taybetî badê weçînayîşî zemê ke yenê kerdiş vera nêeşkenê lazimîyanê xo bigîrê. Vera nê de îqtîdar tu çareserîyêk pê nêano. Cinîyan dîyar kerd ke caye û krîz vera şîyayîşê tatîl û roşanî êdî luks bîyo û vatî ke nêeşkenê seba roşanî çîyêk biherinê. Cinîyan na rewşe vera îqtîdarî berpirsîyar vînenê û vatî ke tewr zêde cinîyan ser de tesîr keno.

 

‘Kesêk heme polîtîkayan rayra beno’

 

Meltem Okuyucuye da zanayîş ke seba ke vaye xeylê zêde ya rewşe her ke şina xeripîyena û vat: “Na vayîye girêdayeyê îqtîdarî ya. Tu polîtîkayêke ke ez vaja baş o çin a. Seba roşanî planêk ma çin o. Verê cû ma şîyêne tatîl. La nika çîyêk winasî çin o. Ameyoxê ciwanan çin o. Kesêk heme polîtîkayan rayra beno. No heme kesan ser de tesîr virazeno. Ma nê çîyî raşt nêvînenê. Heta ke mezg nêbedilîyo tu çîyêk do nêbedilîyo.”

 

‘Meaşê asgarî mird nêkeno’

 

Fatma Akmeşe zî dîyar kerd ke vayeya marketan her ke şina zêde bena û wina vat: “Meaşê asgarî zî mird nêkeno. Ganî tesilî di kesî bixebetîyê. Serranê verênan de hîna baş bî. Nika her çî vaye bîyo. Kireya banan zêde beno. Kîloyê goştî bîyo 400-500 tl. 17 hezar tl yeno keyeyê ma la mird nêkeno. Xora ez 10 hezar kira dana.”

 

‘Problemê tewr gird betalî yo’

 

Fatmaye ard ziwan ke problemê tewr gird betalî yo û wina dewam kerd: “Seba ke no problem bêro çareserkerdiş ganî saetê xebate bêrî raştkerdiş. Karkerî 12 saet xebetîyenê. La ganî 8 ya zî 6 saet bixebetî. Ganî dewlete nê çîyî çareser bikera. Ganî vera vayeyan de polîtîkayê hetê şarî bêrî averberdiş.”

 

‘Meaşê asgarî zêde beno la dima ra tepîya yeno girewtiş’

 

Nur Goktaşe zî bale ant nizdîbîyayîşê Roşanê Qurbanî ser û vat ke her kes fikirîyeno ke se bikero û domna: “Ekonomîye vera kare ma baş nîyo. Ez 23 serrî ya. 16 serrîya xo de ez xebetîyaya. Heta nika ma tu çîyêk nêkerdo. Meaşê asgarî zêde beno la dima ra tepîya yeno girewtiş. Ma nêeşkenê xo rê çîyêk bikerê. Xeyalê mi estê. La şertê Tirkîya nêverdeno. Seba cinîyan îstîhdam çin o. Sey cinîyêke ez şenikîya xo ra nata xebetîyena. Zehmetîyan ancena. La ez mecbura bixebeta.”

 

‘Tu çîyêk nîyo girewtiş’

 

Fevzîye Bayrîye zî qala hêzê herînayîşî kerd û vat ke herînayîşê çîyê roşanî zehmet bîyo û dewam kerd: “Ez ewnîyaya vayeyan la her çî vaye yo. Tu çîyêk nîno girewtiş. Ez teqawit a, la mird nêkeno. Qey wina bîyo ma nêzanê. Ganî rayîrberîya nê welatî ra bêro persayîş.”