MERKEZÊ XEBERAN - Sereka Fraksîyonê Têgêrayîşê Goranî Gulistan Seîde vana ke ganî hukmat babeta bazarîya laşê tutan û cinîyan de berpirsîyar têbigêra û vat: “Wezîfeyê dozgerîyeyo ke vera bazarîya tutan gerreyê mehkema bikero.”

 

Bazarîya tutan ê binê emrê 18 serrî yê bar, kulubê şewe, otele Hêwlêrî êdî bîyo eşkera. Eynî wext de torê medyaya komelkî de reklamê înan tutan zî yeno kerdiş û bi hawayêkê eşkera fotograf û vîdeoyê înan, sewbîna cayê ke tede manenê zî yeno vilakerdiş. Na rewşe bîya sebebê nêrazîbîyayîşê reaksîyonanê şîdetinan.

 

Derheqê babaete de çalakwan û aktîvîsta heqanê cinîyan û Sereka Fraksîyonê Têgêrayîşê Goranî ya Parlementoya Herêma Kurdistanî Gulistan Seîde Rojnewsî rê qisey kerd.

 

Problemê gird û cidî vejîyayî raşte

 

Gulistane dîyar kerd ke seba reklamkerdiş, bazarîya laşê merdiman û seba bale antişê şuxulnayîşê merdiman sucêk gird o û wina dewam kerd: “Tutî pak û bê suc ê. Wexto ke bi hawayêk lêşin û bê exlaqî bazarîya laşê înan û şexsîyetê înan yena kerdiş, beno sebeb ke bi problemê cidî yê şexsî û psîkolojîkî reyde rî bi rî bimanê û komelo ke tede ciwîyenê ser de zî tesîr virazê.” 

 

'Ganî hukmat berpirsîyarîya xo pê bîyara' 

 

Gulistane da zanayîş ke bazarîya laşê tutan, şuxulnayîşê tutan yê binê 18 serrî karêk ca de nîyo, exlaqî nîyo û wina dewam kerd: “Coka ra ganî hukmat vera nê caardişanê bê exlaqîyan de bêveng nêmano û seba nê kesê ke yenê şuxulnayîş ganî tedbîrê lezkî bigêro. Heto bîn de vera her tewirê destdergî, şuxulnayîşê înan yê karan ke beno sebebe bêexlaqî û hesabnêkerdiş peymeyê exlaqî yê komelî Hukmatê Herêma Kurdistanî berpirsîyar o û ganî vera nê çîyan de têkoşîn bikero.” 

 

'Ganî dezgehê komelkî wayîrê nizdîbîyayîş bê’

 

Gulistane dewamê qiseykerdişê xo de nê çîyan ard ziwan: “Wexto ke merdim dadîya xo ra beno bêsuc o, coka ra çîyê ke merdiman musneno suc o, merdiman rayîr ra vejeno û sucdar keno, komel o. Ganî hukmat, dezgehê komelkî vernîya bazarîya laşê cinîyan û heme beşê komelî, merdim û bê exlaqîyan bigêro. Seba têknêşîyayîşê exlaq û aşîtîya komelî zî ganî mehkema qanûnan vera heme suc û şikan de ca bîyaro.” 

 

Venga dozgerîye kerd 

 

Çalakvan û aktîvîsta heqanê cinîyan û Sereka Fraksîyonê Têgêrayîşê Goranî ya Parlementoya Herêma Kurdistanî Gulistan Seîde peynîya qiseykerdişê xo de bale ant serê rolê dozgeran yê rolê vernîgirewtişê sucan ser û vat: “Ganî dozgerê pêroyî wezîfeyê xo bîyaro ca, heqê nê kesan ke kewtî mîyanê nê karanê lêşinan û bê exlaqîyan bipawo. Ganî dozgerî kesê ke bazarîya laşê merdiman û bi taybetî yê laşê cinî û tutan kenê, bido mehkema ke peynîya nê bêexlaqîyan bêro.”