Mîdye Miqted

 

ŞEHBA - Derheqê hêrişê dewleta tirke yê serê Vakur û Rojhelatê Sûrîye de cinîyan dîyar kerd ke ê do vera hêrişan de xo bipawê û vatî: “Rêxistinê heqê merdiman qey bêveng ê? No hêriş û caardişê bêexlaqî do heta kêy dewam bikero? Vera hêrişan de ma do xoverdayîşê xo dewam bikerê.”

 

 

Hêrişê dewleta tirke yê Vakur û Rojhelatê Sûrîye dewam kenê. Hetêk de vera Şehbaye de hetê dewleta tirke ra hêriş yeno kerdiş û heto bîn de zî Hukmatê Şamî abluqa keno. Hêriş û caardişê dewleta tirke û komê girêdayeyê ci yê Efrînî zî dewam kenê. Cinîyî bi şîdet, tecawiz û destdergîye reyde rî bi rî manenê. Cinîyê Şehbaye reaksîyon mojnayî hêrişan ser û mesajê ma do fek herra xo ra vera nêdê dayî.

 

Venga rêxistinê heqanê merdiman

 

Zekîye Hemo ya ke Efrîn ra koçê Şehba kerda wina vat: “Efrîn de cinî û tutî yenê qetilkerdiş û tecawuzkerdiş. Sewbîna heme tewirê caardişanê bêexlaqîyan bi sereyê înan yeno kerdiş. Ma venga heme rêxistinanê heqê merdiman kenê ke reaksîyonê xo bidê mojnayîş û vera nê caardişan de bêveng manenê. Eynî wext de çimanê xo akerê û bivînê ke senî binpaykerdişê merdiman bajarê Efrînî de 5 serrî yo ke hetê dewleta tirke û çeteyanê ci ra serê şarê herême de yeno kerdiş. Amacê dewleta tirke û çeteyan no yo ke wazenê îradeyê cinîyan bişiknê la îradeyê cinîyan nîno şikitiş û ma do tîya de xoverdayîş û têkoşînê xo dewam bikerê. Heta ke ma agêrî serê herra xo ya Efrînî.”

 

‘Ma paştîya cinîyê Efrînî de yê’

 

Eynî wext de Fatmê Reşîde ajansê ma rê qisey kerd û wina reaksîyonê xo mojna: “Ez cinîyêk Efrînî ra ya. No 5 serrî yo ke ma Kampa Xoverdayîşî de ciwîyenê. La ewro caardişê ke Efrînî de benê, caardişê bêexlaqî yê. Ma paştîya cinîyê Efrînî de yê. Ma venga heme rêxistinanê heqanê merdiman kenê ke xo berpirsîyar bivînê.” 

 

'Seba ke şorişê tewr bi hêz o coka ra hêriş kenê’ 

 

Sîham Ehmed Xelîle da zanayîş ke aye do vera hêrişan de xoverdayîşê xo dewam bikera û wina vat: “Efrîn de îşkence û tecawuzê cinîyan yeno kerdiş. Ma nê çîyî qebul nêkenê. Seba ke şorişê tewr bi hêz o coka ra hêriş kenê. La bêvengîya dewlete û rêxistinan zî heta key do dewam bikero?”