ANQARA - Avûkate Mîrîam Fîedînge dîyar kerd ke şerê ke îqtîdar hemverê kurdan û heme şaranê Tirkîya de dayo destpêkerdiş zilm o û venga CPTyî ke raporê derheqê Rayberê PKKyî Abdullah Ocalanî ke 27 aşmî yo ci ra xeberêk nîna girewtiş, eşkera nêkena û vat ke ganî wezîfeyê xo yê etîk û sîyasî bîyaro ca.

 

 

Rayberê PKKyî Abdullah Ocalanî 24 serrî yo Îmraliyî de binê tecrîdêk giran de yeno tepiştiş. Tecrîd û komployê hemverê Ocalanî 24 serrî yo dewam keno. 25ê Adara 2021î ra nata yanî 27 aşme yo ke ci ra xebere nîna girewtiş. Heme muracatê ke seba pêvînayîşê Îmraliyî yenê kerdiş zî bê cewab yenê verdayîşî pêvînayîş bi bahaneyê cezaya dîsîplînî yeno qedexekerdiş. Muracat û vengî hetê wezîrîya edaletî ra nêvînayîşî ra yenê.

 

Tecrîdo ke hetê Tirkîya ra yeno rayraberdiş, derheqê şikitişê tecrîdî de raşteyê mîyanneteweyî zî seba şikitişê tecrîdî, seba çareserîya problemê kurdî, rayraberdişê munaqaşayan, panel û konferansan pê ano. Endama Delegasyonê Zîndanan a 2023yî avûkat Mîrîam Fîedînge derheqê tecrîdo girankerde de, nizdîbîyayîşê dezgehan de û hemleya çareserîye ke ganî Tirkîya bieştêne de ercnayîş kerd.

 

‘Vera muxalîfan şer dîyayo destpêkerdiş’ 

 

Mîrîame da zanayîş ke 10 serrê peyênan de hetê îqtîdarî ra bi tedbîrê ke ameyî girewtiş sîstemê muhakemekerdişî zirarêk gird dîyo û vat: “Vera şaran şer dîyayo dest pêkerdiş û şar heqê demokratîke ra bêpar ameyo verdayîş. Hewldayîşê darbeya 15ê Temmuze ra dima Tirkîya de huqûq û sîstemê muhakemekerdişî zirarêk gird dîyo. Vera muxalefetî de hemleya operasyon û tepiştişan pê ame. Sîyasetmedarê kurdî, yê ke bi îradeyê şarê kurdî ameyî weçînayîş ameyî tepiştiş. Qeyûm tayînê şaredarîyan ameyî kerdiş. Şaredar wezîfeyê ra ameyî girewtiş.” 

 

‘Binê bêvengîye de pêkerdişê koçberîye estî’ 

 

Mîrîama ke tewrê konferansê 13ê hezîrane bî vat ke xeylê babetê ke ameyî ercnayîş seba ke dezgehê Ewropa bikewî têgêrayîş  mîyan ameyî munaqaşakerdiş û qiseykerdişê xo wina dewam kerd: “Konferans de rewşa şarê kurdî, zextê serê kurdan, zextê zîndanan, rolê CPTyî, tecrîdê serê birêz Ocalan û xeylê babetê bînî ameyî munaqaşakerdiş. No seba ke dezgehê Ewropa bikewî têgêrayîş ameyî munaqaşakerdiş. Nê lazimîyan vera nê babetî ameyî munaqaşakerdiş. Vera nê caardişan bêvengî esta. Vera hukmê Peymana Heqanê Merdiman a Ewropa, Yewîya Ewropa û Konseyê Ewropa bêvengîyêk esta. Sebebê na bêvengîye de zî peymanê koçberîye esto. Ganî yewîya Ewropa û dezgehê mîyanneteweyî babeta şîdetî de Tirkîye îqaz bikera û caaradişanê xo bîyara ca. Caardişê Tirkîya zilm o. Ganî zext bi Tirkîya bêro kerdiş. Mi gore gamêka muhîm a.” 

 

‘Tecrîdo tesîrin serê heme zîndanan de esto’

 

Mîrîame derheqê tecrîdo ke yeno rayraberdiş de zî nê çîyan vat: “Sey huqûqnasêk ez vaja ke çinîkerdişê huqûqî bi raştî seba mi rewşêk bi xof a. Çimdarîyê roniştiş û tecrîdî de waştişê avûkatan yê seba waştişê delîlan her tim yeno redkerdiş. Heqê tepişteyan çinî yeno hesibnayîş. Tepişte grevê vêşanîye de mirenî. Pêvînayîşê bi keye û avûkatan yenê astengkerdiş. Tecrîdê serê birêz Ocalanî serê heme tepişteyan de yeno rayraberdiş.”

 

‘Ganî CPT raporan eşkera bikero’

 

Mîrîame qiseykerdişê xo yê peyênan de nê çîyan vat: “Di serrî yo ke Îmraliyî ra xebere nîna girewtiş. Coka ra xeylê muhîmo ke CPT raporan eşkera bikero. CPTyî aşma êlula 2022yî de şî zîyaretê Îmraliyî. Raporê CPTyî xeylê muhîm o. Ganî bi lez bêro eşkerakerdiş. Eke Tirkîya babeta weşanayîşê raporî de eynî fikrî de biba zî wezîfeyêk etîk û sîyasî yo ke CPTyî raporê xo eşkera bikero. Eşkerakerdiş wezîfeyê etîk û sîyasî yê CPTyî yo.”