ŞIRNEX - Hemwelatijî emserr zî binê veristîya krîzê ekonomîye de roşan pêşwazî kenê. Fîrdefs Poyraza ke seba roşanî vejîyaya herînayîşê roşanî dîyar kerd ke aye seba çend çîyanê şenikan tena 2 hezar TL daya. Fîrdefse ard ziwan ke seba keyeyêk 3 kesî 5 hezar TL lazimo ke herînayîşê ferzan bigêro.

 

Krîzê ekonomîye her ke şino xorî beno û bi taybetî badê weçînayîşî vejîya sewîyeya tewr cor. Vera vayîye û zeman de hemwelatijî nêeşkenê lazimîyanê xo yê esasîyan zî bigîrê. Bi nizdîbîyayîşê Roşanê Qurbanî reyde hemwelatijî seba ke lazimîyanê xo yê roşanî biherînê kewtê mîyanê têgêrayîşî. Keyeyê ke binê verestîya krîzê ekonomîye de amadekarîya roşanî kenê vera krîz û vayeyan de bi reaksîyonin ê.

 

Fîrdefs Poyraze seba ke xo rê û 2 tutanê xo rê herînayîşê roşanî bikera şî sûke. Ma zî bi Fîrdefse reyde qezaya Cizîrî ya Şirnexî de şîyî sûke. 

 

Fîrdefse seba ke 2 tutanê xo rê 2 solan bigêra 490 TL da. Dima ra zî seba ke tutanê xo rê kincan bigêra 570 lîre da û seba meymanê ke bêrê pîrozkerdişê roşanî zî bi 700 TL şekir û gozan herînaye. Fîrdefse seba herînayîşê şenikan zî hezar û 570 TL xerc kerd.

 

Tewr tay 5 hezar TL ganî bibo

 

Fîrdefse tena nîmeyê lazimîyanê xo herîna û şî keye. Fîrdefse dîyar kerd ke aye do binê veristîya krîzê ekonomîye de roşan pîroz bikera û vat: “Mi tena kinc, sol, şekir, goz û mewijan rê 2 hezar TL xerc kerd. Mi hema heme lazimîyanê xo nêgirewt. Ganî ez seba qurbanî, şêranî û seba werdî zî tay çîyanê bînan biherîna. Gama ke ez înan zî biherîna bi temamî şîyayîşê mi yê roşanî do 5 hezar TL derbaz bikero. Par zî krîzê ekonomîye estbî û ma zehmetî ant. La par ma seba heme lazimîyanê xo yê roşanî 2 hezar TL xerc kerdbî. Emserr her çi 3 qatê xo zêde bî. Ma keye de tena 3 kesî manenê. Reyna zî şîyayîşê ma xeylê zêde bîyo. Keyeyê ke ferde înan zêde yê do xeylê zehmetî biancê. Şîyayîşê înan do xeylê zêde bibo. Seba nê keyeyan beno ke 10 hezarî zî şêrê. Rewşa ma her ke şina xira bena.”