Elfazî Toral

 

STENBOL - Cinîyê sîyasetmedarî dîyar kerdî ke ganî tecrîdê serê Rayberê PKKyî Abdullah Ocalanî bi lezkî bêro wedaritiş û bi sîstemê huqûqê dişmentîya AKP-MHPyî reyde CPT zî bêtesîr bîyo. Cinîyan dîyar kerd ke ganî tecrîd peynî bibo û wina vatî: “Rojeva ma ya yewine tecrîdê Îmraliyî ya. Ganî tecrîd bêro wedaritiş û ma do seba wedaritişê tecrîdî pîya têkoşîn bikerê.”

 

Rayberê PKKyî Abdullah Ocalanî 24 serrî yo ke Îmraliyî de binê tecrîdêk giran de yo. 27ê Temmuza 2011î ra nata pêvînayîşê avûkatan bi bahaneyanê dîsîplînî yeno qedexekerdiş û reyna bi eynî bahaneyî pêvînayîşê keyeyan zî yeno qedexekerdiş. 

 

Muracatê avûkatan yê seba pêvînayîşî her tim yeno kerdiş. La çi heyfo ke tu cewabêke pozîtîf yan zî negatif nîno dayîş. Cinîyê sîyasetmedarî derheqê tecrîdo girankerde yê Îmraliyî de JINNEWSî rê qisey kerd û dîyar kerdî ke ganî tecrîd bi lezkî bêro peynîkerdiş.

 

‘Waştişê ma yê peynîkerdişê tecrîdî yo’

 

Endama Meclîsê Partîya Herêmê Demokratîke (DBP) Dîlber Demîre da zanayîş ke heme zîndanan de tecrîd serê tepişteyanê sîyasîyan de pê yeno û vat ke AKP-MHP sîstemê huqûqê dişmenîye pê ano. Dîlbere wina vat: “Tabî ma tecrîdê Îmraliyî xoser nêeşkenê bigîrê dest. 25 serrî yo ke Îmraliyî de tecîrdêk giran esto. Coka ra zî no tecrîd êdî zîndanan û heme komelî de zî vila bîyo. Heta ke tecrîdê Îmraliyî nêwedarîyo yê serê komel û zîndanan nêwedarîyeno. Seba ma çîyo esasî wedaritişê tecrîdê Îmraliyî yo. Ganî seba wedaritişê tecrîdî têkoşîn û xoverdayîşêk gird bêro dayîş.”

 

‘CPT bê tesîr mendo’

 

Dîlbere reaksîyon mojnaye tecrîdê giran û wina peynî ard: “Ganî têkoşînê şarî bibo. Ganî têkoşîn raşteyan de bêro dayîş. Coka ra zî heta ke ma têkoşînî gird bikerê do tecrîd zî bêro şikitiş. Ma vînenê ke CPT îşkence meşru keno. CPT ganî zext bi Tirkîya bikero û ganî bi lezkî rolê xo kay bikero. Paradîgmaya netewo demokratîke yê Ocalanî xeylê muhîm a. Na paradîgma ewro bîya tehdîd. Hêzê mîyanneteweyî xo serê şerî de bîyaye kenê. Coka ra zî seba ke aştî bêra Rojhelato Mîyanenî û Tirkîya ganî no tecrîdê serê Ocalanî bêro wedaritiş. Vengê ma no yo ke no tecrîd bi lezkî peynî bibo.”

 

‘Bi mîlyonan kesî fikrê Ocalanî esas gênê’

 

Verfeka Meclîsê Cinîyan ê HDPyî ya Stenbolî Gulşen Karasu zî dîyar kerd ke 27 aşmî yo agahî Abdullah Ocalanî ra nîna girewtiş û wina vat: “Tecrîd  serê pêro cinî, komel û raşteyê sîyasî de kerdo. No sîstem makulbîyayîş serê heme komelê cinîyan û kurdan de ferz keno. Ma her raşte de tecrîd ciwîyenê. Bi mîlyonan kesî fikrê Birêz Ocalanî esas gênê. Bi nê perspektîfî têkoşîn kenê. Seba nê zî tecrîdê serê Birêz Ocalanî serê pêro têkoşînê azadîya kurdî kerdo. Ma do her şert û mercî de têkoşînê hemverê tecrîdî de rayra berê. Ganî ma pîya hemverê nê têkoşîn bikerê û tecrîd wedarnê.”

 

‘Tesîrê ci yê serê komelî baş yeno vînayîş’

 

Îdarekara Partîya Çep a Keske Gulşen Daşdogen zî bale ant serê tecrîdî û vat, tepişteyê sîyasî her tim hetê îqtîdarî ra hedef yenê girewtiş û polîtîkayê tecrîdî bi amancê cezakerdişê komelî yeno kerdiş. Gulşene wina qedêna: “25 serrî yo Îmraliyî de tecrîdêk giran esto. Nika tecrîd resayo sewîyeya tewr xidar. Tecrîdê serê Birêz Ocalanî ameyo destpêkerdiş tesîr serê pêro hetê komelî de kerdo. Ma nê baş vînenê. Ganî tecrîdo giran lezabez peynî bibo. Ganî seba nê têkoşîn bêro dayîş.”