MERKEZÊ XEBERAN - Festîvala Cinîyan a Sakîne Cansiz a 10ine de mesajê xoverdayîşî ameyî dayene û wina ame vatene: "Têkoşînê cinîyan o rûmetên serkewtişî heq keno."

 

Şaristanê Zurichî yê Swîsre de seba vîrameyîşê şehîdanê Qirkerdişê Parisî Sakîne Cansiz, Fîdane Dogan û Leyla Şaylemez Festîvala Cinîyan a Sakîne Cansiz a 10ine bi şîarê ‘Jin, Jiyan, Azadî’ ameye kerdene.

 

Raşteyê Kasernenarealî ke festîvale ci de ameye organîzekerdene, bi posterê şehîdanê têkoşerê serkişan ê Kurdistan û dinya ameye xemilnayene. Festîvala ke bi sloganê "Bi Jin Jiyan Azadî ver bi Şorişê Cinîye" ame organîzekerdiş û seba yadkerdişê cangorîyê Têkoşînê Azadîya Kurdistanî bi deqeyêke rêzgirewtişî dest pêkerd.

 

'Cuye û xoverdayîşê Sakîne sembolêk o'

 

Endama YJK-Syî Ozene Aytaç qiseykerdişê akerdişî kerd û da zanayene na festîvale ruh û têkoşînê Sakîne Cansiz temsîl kena û vat: ”Seke her kes zano, na festîvale serê nameyê xoverdayîş û azadîya cinîyan de yo. Seba nê zî nameyê ci Festîvala Sakîne Cansize yo. Têkoşînê aye eynî wextî de têkoşînê cinî bi. Azadîya cinî, azadîya şaran o. Sakîne Cansiz zî seba nê ameye qetilkerdene. Sakîne Cansiz nasnameyê tarîxî ya. Sakîne Cansiz bîye parçeyêk xoverdayîşê ma, sînor nas nêkerd. Serê nê rayîrî de ciwîyayîne. Na festîvale wayîrê reng, xoverdayîş û ruhê hemrayîya Sakîne Cansiz a. Rengê xoverdayîşê cinîyanê Rojhilatê Mîyanên a. Cuye û xoverdayîşê Sakîne sembolek a. Aye bi azadî û aştîya şaran bawer kerd. Ma zî aye ra bawer ê.”

 

Festîvale de sey Nagîhane Akarsel, Evîne Goyî, Hevrîne Xelef, Jîyane Tolhildan, Yadê Eqîdê, Yûsra Derwêş, Leymane Şiwêş cinîyê ke hetê dewleta tirke ra ameybî qetilkerdene ameyî yadkerdene.

 

‘Ganî ma yewîya kurdan bîyarê ca’

 

Nameyê TJK-E ser o Besîme Konca vejîyaye sehne ser û qisey kerd. Konca vat: ”Eke dewleta tirke cinîyan ê serkêşan kena hedef ganî ma naye ser o kêmasîya xo bivînê. Ganî ma vera hêrişanê dewleta tirke têkoşînêkê xurtêrî bikerê û yewîya kurdan bîyarê ca.”

 

'Wazeno polîtîkayê taybetî yê şerî, îşxalkere serê cinîyan de bîyaro ca’

 

Koordînasyonê KJKyî zî mesajêk şawit festîvale. Mesajê KJKyî de bi kilmî wina ame vatiş: ”Dewleta tirke estbîyayîşê xo qirkerdişê kurdan ser o nayo ro û hedefê ci yê verênî zî cinîyê kurd ê. Dewleta tirke vera cinîyan ê kurdan polîtîkayanê şerê taybetî ana ca.AKP-MHP seba caardişê nê polîtîkayan seferber bîyo. Şexsê Rayber Apoyî de hêzanê komplogerab cinîyê kurdî, şarê kurdî û şerwanê ma hedef kerdî. Rayberîye 25 serrî yo Îmrali de mîyanê xoverdayîşêkê xurtî de ya. Ma sey cinîyan ci rê minetdar ê coka ma do tecrîdî bişiknê û ey azad bikerê.

 

Ewro gerîlayê Kurdîstanî koyan de polîtîkayanê îşxalî pûç kenê. Hînî polîtîkayê îşxal, qirkerdiş, xayînî û namerdî apey de mendî. Stratejîya ma ya kurdanê azadan û cinîya azade rew ra ser kewte. Ma sey KJKyî venga pêro cinîyan, şarê ma, ciwananê ma û dostanê ma danê ke hêz bidê têkoşînî. Têkoşînê cinîyan o rûmetên û têkoşînê Rayraşîyayîşê Rayberîye serkewtişî heq keno. Ma serê xeta têkoşînê cinîyan, xoverdayîşê gerîlayan û Rayber Apoyî de şorê û ser bikewê.”

 

Festîvale de hunermendî Bermale Çem, Jin Ma, Yelda Abbsaî, Medî, Koroyê Cinîyan ê Baselî, Koroyê Domanan, Elenora, Koma Govendan û Koma Dansê Flamenkoyî vejîyayî sehne ser û xeyma dengbêjan de zî cinîyan ê denbêjan kilamê xo vatî.