Sema Çaglak 

 

ŞIRNEX - Wahîde Adança ke Silopya de bi dikanê aksesuar û tuhafîye debara xo kena, dîyar kerd ke aye hemverê hişmendîyê komelî yê camêrdî ke vano, cinî nêeşkena ser kewta.

 

Cinî bi serran ê seba ekonomîya xoser têkoşînêk pîl danê. Cinîyê ke nê raşteyî de serkewenê, seba cinîyanê bînan benê hêvî û cesaret danê înan. Nê cinîyan ra yewe zî Wahîde Adanç (39) ke qezaya Silopya ya Şirnexî de ciwîyena ya. Wahîde 5 serrî yo bi dikanê aksesuar û tuhafîye debara xo kena û hemverê hişmendîyê cinsperestî têkoşîn dana.  

 

‘Mi waşt serê linganê xo de bimana’

 

Wahîdeya ke Mêrdîn ra ya, vernîya ke bêra dikan abikera, Antalya de ciwîyaya. Wahîde dima ra seba wefatê mêrdeyê xo, pêwa tutanê xo verê xo dana  Silopya. Wahîde, wina qalê prosesê akerdişê dikanî kerd: “Dimayê ke mêrdeyê mi qezeya trafîkî de dinyaya xo bedelna, ez û tutê xo tenê mendî. Ma uca de xeylê zehmetî ant, coka ma ameyî Silopya. Tîya de hişê mi de akerdişê dikanêk estbî. Seba ke mi waştêne ez serê linganê xo de vinderî û seba tutanê xo bîbî hêz. Mi waşt dikan abikerî û pî û birayê mi zî paştdayîş dayî mi.

 

‘Hemverê hişmendîya komelî ser kewta’

 

Wahîde, dîyar kerd ke verê karê destan bala aye anto û vat: “Verê mi keye de nexş û mûra viraştêne. Dima ra mi perwerdeyî serê karê destan dî. Gama ke mi nê dikanî akerd, bawerîya xeylêk kesan mi ra çinî bî ke ez o bieîkî nê karî bikerî. Vatêne nêeşkena bikera. La mi ê vatişî veng vetî. Bi bawerî û hêzê xo roja yewine ra heta nika mi karê xo bi rêk û pêk kerdo. Gama mi bi heskerdiş û bi zerrî no kar kerd, zêdeyêr aver şîya. Xeylêk cinîyê dorê mi, mi ra cesaret û moral girewtî. Ez demê ameyox de zî wazena nê karê xo pîlêr bikerî û cinîyanê taxe rê bibî nimûne.”

 

‘Cinî raşteyê komelî de serkêşî kenê’

 

Wahîde, peynîya qiseykerdişê xo de dîyar kerd ke cinî bi têkoşîn aver şinê û vat: “Cinî qels nîyê. Eke biwazê eşkenê xeylêk çîyan bi serfirazî bikerê. Cinî her wareyê komelî de serkêşî kenê. Gama merdim înan rê biewno, vîneno ke hêzê cinîyan zêde yo. Bêşik no zî ma kêfxweş keno û ma wazenê ke hêzê cinîyan heme wareyan de bêro vînayîş.”