Şehrîban Aslan

 

AMED - Halîse Aksoya 56 serrî ke aşma nîsane de  çarçewaya cipersayîşê Serdozgerîya Komare ya Amedî daya destpêkerdiş de ameye destbendkerdiş û tepiştiş, rewşa aye ya weşîye nêbaş a û avûkatan dîyar kerd ke oyo ke Halîse rê yeno kerdiş, pratîkê huqûqê dişminî yo.

 

25ê Nîsane de çarçewaya cipersayîşê merkezê ci Amed bi de erzîya serê 21 keyeyî û xeylêk kesî ameyî destbendkerdiş. Nînan ra yewe zî Halîse Aksoy bî. Halîse û kênaya aye Migzîn Karataş serê îfadeyê Umît Akbiyikî de ameyî tepiştiş.

 

Teda û sereştişan de xeylêk reyan keyeyê Halîse rê ame kerdiş de rastê reaksîyonan ameyî û xeberê derheqê babete de amebî viraştiş zî sey sûcdarî ameyî hesibnayîş.

 

Halîse nika zîndanê Cinîyan ê Amedî de tepişte ya û ame dîyarkerdiş ke rewşa aye qet baş nîya û seba şertê zîndanî nêweşîyê aye giran benê.

 

‘Xeylêk nêweşîyê aye estê’

 

Goreyê agahîyê ke ma avûkatan û tepişteyanê bînan ra girewtê roja Halîse ameya destbendkerdiş, bi xeylêk binpaykerdişê heqan reyde ameya rî bi rî û binpaykerdişê ewilî koxuşa yewine de ciwîyaya. Çimeyêke derheqê Halîse de wina vat: “Demo ke newe ameye tepiştiş, bi sebebê betlaneyê fermî 4 rojan koxuşêke de mende. Nêeşka xo biresno awa şimitişî. Şekir û tansîyonê aye esto. La no verê çiman de nêame girewtiş. Heto bîn ra emrê aye 56 o û nêweş a. Nêweşîya şekir, tansîyon, qelb û şekir aye reyde estê. Koxuş di qat a û seba nê ganî mîyanê roje de çend rey bi derenceyan şêro û bêro. La no aye keno rincan. Nêeşkena hilmê xo bigîro. Kênaya aye Mizgîn û tornê aye Çîya zî tepişte yê. No aye rê zaf zehmet o.”

 

‘Werd baş nîyo’

 

Goreyê zanayîşê ke ameyê girewtiş Halîse bi desan rey şîya nêweşxane û seba kelepçe kenê zehmetîyan ancena. Çimeyê ke agahî da ma wina vat: “Wexto ke newe benê nêweşxane kelepçe qebûl nêkena. Peyser agêra la nêweşîyê aye giran bî. Werdî qet baş nîyê. Merdimî mecbur nêbê nêeşkenê werdê zîndanî biwerê. Hela ke nêweşêke sey dayîka Halîse. Pêwa her çî moralê aye zaf berz o. Çi destê aye rê yeno kena. Kitabê kurdî waştî. Hewl dana wendiş û nuştiş bimusa.”

 

Îtîrazê tepiştişî kerdî

 

Avûkat Necat Çîçek ke roja şemeyî bi muvekîla xo reyde pêvînayîş kerd wina vat: “Roja paşeme qelbê xo de dej hîs kena û şina doktorê revîrî. Doktor vano ke ez nêeşkena mudaxale bikerî û şiraweno Nêweşxaneyê Cigêrayîş û Perwerdeyî. Hema zî nêrehetiya qelbî dewam kena. Nêrehetîya qelbî genetîk a û keye ra yena. Îdianameyê dosya de yeno amadekerdiş, pêro delîlî ameyê arêdayîş. Çîyo ke dayîka Halîse rê yeno kerdiş, pratîkê huqûqê dişminî yo. Ma îtîrazê tepiştişê aye kerd. Ganî pêro kes hemverê tepişteyanê nêweşan de bi hîsgêr têbigêrê."

 

Avûkate Zeynep Karayilan zî wina vat: “Halîse û kênaya aye Mizgîne nînê veradayîş. No hemverê huqûqî yo. No huqûqê dişminî şexsê Halîse û keyeyê aye de pê yeno.”