RIHA - 'Nobeta Edaletî' ya keyeyê Şenyaşarî 834 roje yo dewam kena. Keyeyê qurbanîyê Qetlîyamê Pirsûsî ewro zîyaretê keyeyê Şenyaşarî kerd û mesajê dewamkerdişê têkoşînî dayî.   

 

14ê Hezîrana serra 2018î de merdim û pawitoxê Parlamenterê AKPyî yê Rihaye yê verên Îbrahîm Halîl Yildizî qezaya Pirsûsî ya Rihaye de hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Emîne Şenyaşar û lajê aye ke Parlamenterê Partîya Çep a Keske yê Rihaye yo Ferît Şenyaşarî ke qetlîyam ra bi birîndarî xelesîyabî, 9ê adara 2021î de vernîya Edlîyeya Rihaye de dest bi Nobeta Edaletî kerdî.   

 

Çalakîya keyeyî roja 834ine de dewam kena. Emîne Şenyaşar û lajê xo Ferît Şenyaşarî sey her roje keyeyê xo yê Pirsûsî ra ameyî verê Edlîyeya Rihaye û dest bi nobede kerdî.  

 

Zîyaretê seba paştîdayîşê keyeyê Şenyaşarî zî dweam keno. Keyeyê qurbanîyê Qetlîyamê Pirsûsî, Parlamentera Partîya Çep a Keske ya Rihaye Dîlan Kunt Ayan, endamê Federasyonê Komeleyê Ciwanan yê Sosyalîste (SGDF) şîyî zîyaretê Keyeyê Şenyaşarî.    

 

Dîlek Şekera ke pîyê xo Îsmet Şekerî Qetlîyamê Pirsûsî de vînî kerdbî dîyar kerd ke ê sey keyeyê Pirsûsî 8 serrî yo paweyê edaletî yî û wina vat: “8 serrî yo ma vanê ke sena Pirsûsî edalet, seba her kesî edalet. Ewro reyna ma wina vanê. Dejê ma û Keyeyê Şenyaşarî sey yewbînan o. Edalet çinî yo. La reyna zî ma edalet gêrenî. Ma do her tim kişta keyeyê ke edalet wazenî de bibî. Ma nêtersenê.” 

 

Parlamenterê Partîya Çep a Keske Ferît Şenyaşarî zî qetlîyamê Pirsûsî ard vîr û wina vat: “Ciwanê ke ameybî Pirsûsî meymanê qezaya ma bî. Seba ke ma nêeşkayî meymananê xo bipawê ma helalî keyeyê înan ra wazenê û ma tîya de soz danê ke heta edalet pê bêro û kiştoxê raştîn bêrê muhakemekerdiş do têkoşîn û paştîdayîşê ma dewam bikero.” 

 

Yasemîn Boyraza ke dadîya aye Nazêgul Bahar Boyraze qetlîyamê Pirsûsî de dinyaya xo bedilnabî zî da zanayîş ke çîyo ke înan ardo têkişt dewaya edaletî ya.