Melîke Aydin 

 

ÎZMÎR - Cansu Erkmene da zanayîş ke Roşanê Evvel Temmuze rêça cuya komunale hewêneno û dimayê erdlerzî hîna zêde manedar bî û vera asîmîlasyonî de her ca de do şarê Hatayî têkişt de bo. 

 

Roşanê Evvel Temmuze Rojhelatê Mîyanenî de û bi taybetî zî mîyanê elewîyanê ereban de zêde yeno pîrozkerdiş. Roşan xo paweno bi hezaran serran verê cû. Roşanê Evvel Temmuze aşma temmuze de yeno pîrozkerdiş û yeno manaya bereket û dekewtişê hamnanî. Heto bîn de roşan kulturê cuya komunalî zî xo mîyan de hewêneno. Seba bereket zêde bibo qurbanî yenê dayîş û seba elewîyanê ereban muhîmîya ci zêde ya. 

 

Cansu Erkmene organîzastora Festîvala Evvel Temmuze ya. Cansuye derheqê roşano ke do mabenê 7-23yê temmuze de bêro pîrozkerdiş de ercnayîş kerd. 

 

Cansuye da zanayîş ke Roşanê Evvel Temmuze dimayê 12ê êlula 1980î hetê elewîyanê ereban ra no roşan sey xoverdayîşêk polîtîk yeno pîrozkerdiş û vat ke hedefê înan no yo ke şarê Hatayî her ca de bîyarê têkişt. 

 

‘Hewl danê ke asîmîle nêbê’ 

 

Cansuye dîyar kerd ke elewîyê ereb adetê komunalî ra yenê û zextê serê nansnameyê elewîyê erebî darbeya 12ê êlule de ra dima zêde bî û wina vat: “Nê adetî Hatay û cografyayê girdî de ciwîyayî. Nika Hatay û Mêrsîn de zaf yeno pîrozkerdiş. Verê cû elewîyê erebî kêmar nêbî. Komara Hatayî bado ke bi herra Tirkîya reyde ame girêdayîş, polîtîkayê asîmîlasyonî zêde bî. Polîtîkayê vilakerdişî ameyî rayraberdiş.” 

 

‘Polîtîkayê nifus û asîmîlasyonî zêde bîyî’  

 

Cansuye dewamê qiseykerdişê xo de da zanayîş ke badê erdlerzî ke dewlete tu çîyêk nêkerde, elewîyî bi îmkananê xo konan de cuya xo dewam kerdî û vat: “Tu xizmet Samandar û Serînyolî de nêkerdî. Yeno hedefkerdiş ke no ca bêro vengkerdiş. Dewleta ke kon û konteynir nêberd herême 7-8 roje ra dima veng kerd ke şar herême terk bikero. Yewine karê înan no bî. Amacê na polîtîkaye no bî ke Hataye bibedilnê. Polîtîkayê asîmîlasyonî zêde bî.”  

 

‘Roşanê Evvel Temmuze binê tehluke de yo’  

 

Cansuye qiseykerdişê xo yê peyênan de bale ant polîtîkayê serê Roşanê Evvel Temmuze ser û wina peynî ard: “Şarê elewîyê erebî vera nê caardişan de xover dano. Hatay de hema zî berardiş dewam keno. Bi berardişî îdareyê xo kenê. Eke berardişê çinitişî bêro çinîkerdiş do festîvala kulturê komunale ya Evvel Temmuze zî bêra çinîkerdiş. Emser erdlerzî vera manaya festîvale cîya bî. Amacê ma no yo ke ma festîvale berê her ca. Amacê festîvala Evvel Temmuze no yo ke şarê Hatayî bîyaro têkişt. Ez venga tewrbîyayîşî dana heme kesan.”