Zelal Tunç

 

WAN - Xezal Tunçe ya ke serranê 90î de vera polîtîkaya dewlete yê herême û zîhnîyetê serdestî yê camêrdî de sere wedarit. Xezale Mijin ra heta Kaponîsî, uca ra heta Iraqî û tewr peynî zî reyna tepîya agêraye herra xo ser. 

 

Serranê 90an de polîtîkayê dewlete yê hemverê kurdan vera bi hezaran dewî ameyî vêşnayîş, rijnayîş û bi mîlyonan kesî zî wareyanê xo ra bîyî. Dewijê Mijinî yê girêdayeyê Qilêbanî ya qezaya Şirnexî zî vera ferzkerdişê qorîcîtîye de mecbur mendî ke herra xo terk bikerê. Tay dewijî koçê metropolanê Tirkîya kerd, tay zî koçê başûrê Kurdistanî kerd. 

 

Netîceyê nê polîtîkayan de kesê ke tewr zêde tesîr bîyî cinî yê. La cinî cayê ke bi ca bîyî de zî bîyî serkêşê awankerdişê cuyêka newe. Înan ra yew zî Xezal Tunçe ya. 

 

Serewedarnayîşê vera adetan 

 

Xezale dewa Mijinî de yena dinya. Emrê xo yê şenikîye de yena zewecnayîş. Xezale şina keye ser. Xezale emrê xo yê şenikîye de bena dadî û dimayê ke dadî û pîyê aye dinyaya xo bedilnenê, bi mêrde û wayanê xo reyde cuya xo dewam kena. 

 

Şî başûrê Kurdistanî 

 

Mêrdeyê aye seba ke leşkerî nêkero şino başûrê Kurdistanî û Xezale bi tutan û wayanê xo reyde şina. 7 serran manenê û dima ra reyna tepîya agêrenê dewe. Serranê 90an de polîtîkayê dewlete vera yenê dewa Kopanîsî ya Armuşî ya Wanî. 

 

5 tutê xo vînî kena 

 

Nasnameyê mêrdeyê aye îfşa beno û mêrdeyê aye şino leşkerî. Xezale mecbur manena tena sereyê xo biewna 12 tutanê xo ra. 5 tutê xo serranê cîyayan de vînî kena. Tutê aye şiwanîye kenê û hetkarîya dadîya xo kenê. Mêrdeyê aye dimayê leşkerîye sebebanê sîyasîyan vera yeno tepiştiş. 4 serrî tepişte maneno û sebebê îşkence û şertê zîndanî vera nêweş keweno û dinyaya xo bedilneno. 

 

Xezale zextê komelî vera bi kesêk dewa Zaxoskî ya Payîzavaye reyde zewecîyena. Dimayê 10 serrî mêrdeyê aye mireno û reyna agêrena Kopanîsî kişta tutanê xo. Xezale seba ke zewecîyabî sucdarîya ke tutanê xo verdaya û şîya her tim ameye sucdarkerdiş. Coka ra Xezale bi serran bêveng manena. 

 

Ez zî dewa Kopanîsî ra ya. Mi Xezale hewşê lajê aye de dî. Tutîya xo ra nata mi Xezale nas kerdêne. La mi qet aye wina bêveng nêdîbî. Xezale deyîran vatêne. Mi deyîranê aye qeyd kerd. Wina texmîn kena ke emrê aye nizdîyê 70 serrî yo. La emrê ci yê raşt kes nêzano. Mi dest bi qeydkerdişê kerd. Xezale mabenêke werişte payan ser û vat ke her cayê laşê aye dejeno. Wexto ke ez şenik bîya Xezale vejîyayêne koyan û qîrayêne. Sey Tarzanî ameyêne binamekerdiş. Her çend ke ma zextê serê Xezale dîyêne zî ma mana nêdayêne.  

 

Êdî hêzê Xezale nêmendbî. Serrî xeylê çîyan aye ra berdîbî.