MEXMÛR - Hemşaredara Mexmûrî Fatma Bîlene dîyar kerd ke ganî venga KNKyî verê çiman de bêro girewtiş û vat: “Ma baş zanê ke ewro problemo ke Rojhelatê Mîyanênî de esto û nîno çareserkerdiş girêdayeyê tecrîdê hemverê Rayberê ma yo. Raşte ra wedaritişê tecrîdî yê prosesê peynîardişê Peymana Lozanî de do Rojhelatê Mîyanênî de bedilnayîşan zî pê bîyaro.” 

 

Rayaberê PKKyî Abdullah Ocalanî ke Zîndanê Îmraliyî yê Tîpê Fyî yê Asayîşo Berz de yeno tepiştiş û zêdeyê 2 serrî yo yanî 28 aşme yo ke ci ra tu xeberêke nîna girewtiş. Avûkatê Baroyê Huqûqî yê Asrinî seba pêvînayîşê bi Abdullah Ocalan, Omer Hayrî Konar, Hamîlî Yildirim û Veysî Aktaşî hewte de di reyan seba pêvînayîşî muracat kenê la tu cewabêke pozîtîf ya zî negatîf nîno dayîş. 

 

Konseyê Rayîrberî yê Kongreyê Neteweyî yê Kurdistanî (KNK) çend roje verê cû eşkerayîyêk dabî û venga Komîteya Wezîran a Konseyê Ewropa, Meclîsê Parlementeran a Konseyê Ewropa, Yewîya Eropa (YE) û Neteweyê Yewbîyaye (NY) kerdbî ke seba muracatê Rayberê PKKyî Abdullah Ocalanî heyetêk awan bikerê û nê ser dewlete û hêzê sîyasî waştî ke zextê huqûqî, sîyasî û dîplomatîk bi Tirkîya bikerê. 

 

Derheqê babete de hemşaredara Kmapa Multecîyan a Şehîd Rustem Cûdîyî (Mexmûr) Fatma Bîlene ajansê ma rê qisey kerd.   

 

28 aşmî yo ke xebere nîna girewtiş 

 

Fatmaye da zanayîş ke 28 aşmî yo Rayberê PKKyî Abdullah Ocalanî ra xebere nîna girewtiş û wina dest bi qiseykerdişê xo kerd: “Nika çîyo tewr muhîm ma hemverê tecrîdo girankerde de senî reaksîyon bimojnê. Heto bîn de hemverê bêvengîya Dewletê Mîyanneteweyî û nizdîbîyayîşê AKPyî de ganî se bêro kerdiş? Şima zî zanê ke 6 aşme peyênan de cezaya dîsîplîn û tecrîdî bi nê raybazî yeno girankerdiş. Ne keye û ne zî avûkatî tu hawayêkê nêeşkenê xebere bigîrê. Xebernêgirewtiş serê şarê kurdî de beno sebebê şikan. Ma vanê ke ganî şarê kurdî hemverê nizdîbîyayîşê ke vera Rayberê ma de yeno kerdiş sey şeklêk tehdîdî nêgêro dest û ganî şarê kurdî zindîbîyayîşê xo bimojno.” 

 

Venga KNKyî   

 

Fatmaye qiseykerdişê xo de bale ant venga KNKyî ser û vat: “KNK tena seba teberê welatî nê, seba heme kurdan veng kerd. Seba Rayberî û vera tecrîdî de venga şarê kurdî kerd ke bibî yew. Heto bîn de ganî ma sey cinîyî nizdîbîyayîşê xo hemverê hêrişanê bi çekê kîmyewî yê dewleta tirke ke beno sebebê rijnayîşê gonîya tutanê ma, zilmo ke hemverê şarî de rayra bena bimojnê û ganî nê hêrişan qebul nêkerê. Sewbîna êdî tecrîd merheleya ercnayîşî ra derbaz bîyo û ma kewtî merheleyêk winasî ke ma bikewê mîyanê hewldayîş û çalakîyan. Seba girewtişê malumatî yê Rayberîya xo.” 

 

'CPT goreyê waştişan têgêreno’ 

 

Fatmaye dîyar kerd ke bêvengîya Komîteya Vernîgirewtişî yê Îşkenceyî yê Konseyê Ewropa (CPT) yeno manaya qebulkerdişê waştişê dewlate tirke û wina dewam kerd: “Seserra 21ine de Peymana Lozanî peynî beno. Erdogan wazeno ke na seserre de xo sey împaratorî bido îlankerdiş. Sîstemo ke nika Tirkîya de dano rayraberdiş, wazeno dewletê bînî zî bikero binê tesîrê xo. Vera Şarê Kurdî de wazeno ke împaratorîya xo bi zext û tecrîdî xurt bikero. Tirkîya tesîrê xo serê rayaumûmîye ya dinya de kerda. Mîyan de CPT zî esto û coka ra zî bêveng a. Bêvengîya CPT û dewletê ke destê înan mîyanê komployî de esto her ke şino destê Erdoganî xurt kenê. Ganî şarê kurdî bi taybet zî derbarê nizdîbîyayîşê CPTyî de nizdîbîyayîşêk zelal bimojnê.” 

 

‘Şikitişê tecrîdî û bedilnayîşê Rojhelatê Mîyanênî’ 

 

Fatmaye  da zanayîş ke no tecrîd, zilm û îşkenceyo ke Îmraliyî de hemverê Rayberê PKKyî Abdullah Ocalanî de yeno rayraberdiş ganî hetê ma ra êdî nêro qebulkerdiş û wina dewam kerd: “Şarê kurdî ke her cayê dinya de ciwîyenê ganî serê venga KNKyî de vinderî. Kurdî ganî verê konsolosxaneyan de kom bibê û nizdîbîyayîşê xo bimojnê. Heta ke Rayberîye ra xebere nêra girewtiş ganî ma mîyanê çalakîyan de bê. Ma baş zanê ke ewro problemo ke Rojhelatê Mîyanênî de esto û nîno çareserkerdiş girêdayeyê tecrîdê hemverê Rayberê ma yo. Eke ma xeberêke Rayberê xo ra bigîrê û eke ma tecrîdî bişiknê, prosesê peynîbîyayîşê Peymana Lozanî de beno ke bedilnayîş Rojhelatê Mîyanênî de pê bêrê.” 

 

'Rewşa bîyaye asayî nîya’ 

 

Fatmaye qiseykerdişê xo wina peynî kerd: “Ganî ma kurdî nizdîbîyayîşê xo bi zelalî dîyar bikerê. Bêvengîya xo bişiknê. Rewşa ke nika Rayberê ma mîyan de ya rewşêka asayî nîya. Goreyê qanûnanê dewletanê bînan zî kesê emir dergî zîndanan de nînê verdayîş. Ganî ma çalakîyê xo tecrîdo ke ameyo girankerdiş bi rayaumûmîye ya dinya reyde bidê fehmkerdiş. Ma heme zanabîyayîşê xo seba şikitişê tecrîdî bidê şuxulnayîş.”