Melek Avci

 

ANQARA - Endama Kamara Lord a Qraltîyê Yewbîyayeyî Baroness Chrîstîne Blower da zanayîş ke problemê kurdî çareserî ra dur kewta û caardişê çekê kîmyewî netîceyê nêçareserîye yo. Baroness wina vat:  “Eke Tirkîya îdia kena ke çekê înan yê kîmyewî çin ê, ganî nê nîşanê pêro merdiman bidê. Ganî masumîyetê xo nîşan bida.”

 

Hêrişê Tirkîya yê hemverê Zap, Metîna û Avaşînî yê 17ê Nîsana 2022ine de dest pêkerdibî, dewam kenê. Hêrişan de çekê kîmyewî yenê şuxulnayîş û no tesîrêk pîl serê merdiman û ekolojî keno.

 

Sereka Komîteya Perwedeya Sendîkayê Ewropa (ETUCE), Endama  Kamara Lord a Qraltîyê Yewbîyayeyî û Hemsereka Kampanya Sendîkayê Ocalanî rê Azadî (Freedom for Ocalan Trade Union Campaign) Baroness Christine Blower, dîmenê şuxulnayîşê çekê kîmyewî yê Tirkîya hemverê Kurdan pê ardê û bêvengîya OPCWyî ercna.

Chrîstîne da zanayîş ke dîmen û fotografê caardişê çekê kîmyewî estê û vat: “Ez endama Kamara Lord a Qraltîyê Yewbîyayeyî ya. Ez babeta çekê kîmyewî û presedurê leşkerî de pispor nîya. La bi serran o ez şerê Tirkîya yê hemverê kurdan taqîb kena. No modelêk hêrişê yê hemverê kurdan o. Ez sey model vînena. Eşkerayo ke Tirkîya teberê normê dewlete têgêrena û sûcdar a.

 

‘Serê esasê şaşî de ameya awankerdiş’

 

Chîrstîne derheqê îdiayê OPCWyî de zî qisey kerd û vat vera OPCW îdiayan temaşe bikero ganî bikewo tevger û wina vat: “No problemêk pîl o ke sazgehê mîyanneteweyî bi destê xo awan kerdê. Vera ke mudaxale bikerê, metodê ke asteng kenê awan kenê. Eke îdiayan taqîb kenê, ganî hîn çîyê bikerê û bikewê tevger. La vanê ma mudaxale nêkerê. Seba ke metodê xo ra bawer kenê. Goreyê mi nê organîzasyonî hîn serê esasê şaşî de ameyê awankerdiş. OPCW rojê vîyarte de eşkerayîyêke da û vat ke roja awan bîya, xeylêk çekê kîmyewî îmha kerdê. Bêşik ganî her kes nê ra kêfweş bibo. La eke hîn îdia bibê, ganî OPCW bi baldarî welatan rê biewno. Ganî her çî baş kontrol bikerê û bawer bê. Çekê kîmyewî bi tu hawayî nêeşkenê bêrê qebûlkerdiş. OPCW vano çekê kîmyewî îmha kerdê.  La fosforê spî yo Tirkîya bi kar ardo kategorîyê çekê kîmyewî de ca nêgirewtê. No çîyêk rast o. Bi aşkera û zelal na made kimyewî ya û hemverê merdiman ameyo şuxulnayîş. Seba nê zî na eşkerayîye merdiman xemgîn kena. Eke bi Tirkîya reyde çekê kîmyewî çinbê, o wext ganî seba cigêrayîşî zî tersê ci çin bo.”

 

‘Masumbîyayîşê xo nîşan bidê la masum nîyo’

 

Chrîstîne wina vat: “Ganî NY Tirkîya de seba cigêrayîşî îqna bikero. Cigêrayîşê îdiayan do seba berjewendîya Tirkîya bî. Eke waştişê ma bi welatêk demokratîk îqna bikero ganî seba nê amade bê. Ganî Tirkîya masumbîyayîşê xo nîşanê ma bido la Tirkîya masum nîya.”

 

‘Merdimî çarserîyêk aştîyane heq kenê’

 

Chrîstîne dîyar kerd ke binê heme hêrişan de nêçareserîya problemê kurdî esto û Tirkîya çareserî ra dûrî ya û wina qedêna: “Hêvî esta. Wexto ke muzakare ame kerdiş û çareserî estbî. La nika ma xeylêk ci ra dûrî yê. Problem oyo ke problemê kurdî hema gane yo. Merdimî seba nêçareserî dej anjenê. Birêz Ocalan yeno tecrîdkerdiş û tecrîd her ca de vila bîyo. Xeylêk kesî seranserê dinya de bi problemê kurdî reyde eleqeder benê. Ez hêvîdar a do serbikewo. Merdim çareserîyêk aştîyabe heq kenê.”