Şehrîban Aslan

 

AMED - Şêwirmenda Tirkîya ya PENî ya Norveçî Carolîne Stockford derheqê roniştişê 15 ci ra tepişte 18 rojnamegeran de vat: “Îdianameyê rojnamegeranê kurdan de xeylêk materyalê ke tu eleqeyê înan bi babeta sûcî ra çinbî, estbî. Destpêk de ma fam kerd ke îdianameyêk çiqas veng o.”

 

Roniştişê 15 ci ra tepişte û hîrê hebî zî bêtepişte ameyîne muhakemekerdiş, 11 û 12ê Temmuze de ame vînayîş û rojnamegerî ameyî tahliyekerdiş xeylêk bajarê teberî û sazgehê kesan dewa taqîb kerdî. Şêwirmenda Tirkîya ya PENî ya Norveçî Carolîne Stockford ke dewa taqîb kerd, derheqê roniştişî de fikrê xo ardî ziwan.

 

‘Tewr zêde rojnamegerê kurdî yenê muhakemekerdiş’

 

Carolîne da zanayîş ke sey PENî ya Norveçî 40 serrî yo dewanê Tirkîya û bajaranê kurdan taqîb kenê û 8 serrî yo rewşe hîn zêdeyêr xira bîya û vat: “Her wextî de hemverê rojnamegeranê kurdan caardişê nêbaşî estbî. Mersîn de dewaya di rojnamegerê Evrenselî estbî. Nînan ra yew rojnamegerê kurd, yew zî tirk bi. Qaşo delîlî têduşt bî la rojnamgero tirk ame veradayîş û yê kurd ame tepiştiş. Reyna ma dewaya rojnamegerê kurdî Nedîm Turfendî taqîb kerd. Nimûne ê muhakemeyî de heqê pawitişê kurdkî nêdayî Nedîmî. Her kesî zanayîne Nedîm bêsûc o. Seba falîyetê rojnamegerîye 6-7 serrî tepişte mend.”

 

‘Îdianameyî de agahîyê nêrast estbî’

 

Carolîne bale ant serê dewaya 18 rojnamegeran û vat, îdianameyê înan aşma adare de ameyo amadekerdiş û wina vat: “Wexto ke îdianame vejîya xeylêk madeyê ci bi qesawet bî. Ma sey PENê Norveçî 2020ine ra heta nika projeyê îdianameyê Tirkîya taqîb kenê. Ma heta nika 25 îdianame cigêrayîş kerd. Ma îdianameyan de xeylêk nokteyê bêhuqûqî tespît kerd. Yew nînan ra zî babetê ke tu eleqeyê înan bi sucdarî çin o, bi rîpelan  îdianameyî de ca girewtêne. Îdianameyê rojnamegeranê kurdan de xeylêk nokteyê ke eleqeyê înan bi rastî çinbi ca girewtêne. Bi îdiayê vengî serrêke cuya înan ra ameye girewtiş.”

 

Carolîne qiseykerdişê xo de da zanayîş ke bi bêhuqûqîyê ke yenê kerdiş hewl yeno dayîş hem bi rojnamegeran hem zî bi çimeyê xeberan dima game bidê eştiş û vat, demê xeberêke derheqê cinî, ekolojî û komelî de bêro viraştiş, nêeşkeno propagandayê sûcî bêro awankerdiş. Carolîne da zanayîş ke do sey PENî yê Norveçî dîplomatê Tirkîya rê binusê û veng bikerê û do sey taqîbkerdox tewrê nê roniştişan bibê.