Oznur Deger

 

MÊRDÎN - Hemwelatijê taxa Hêşerîyî ya Qoserî bi serran o Çemê Hêşerîyî ke bîyo sey eşteyî û neweşîyî vila keno ra gerreyin ê û paweyê pakkerdişê çemî yê.  

 

Çemê Hêşerîyî yê dewa Hêşerî ya qezaya Qoserî ya Mêrdînî bi serran o paweyê pakkerdişî yo. Seba çemî Dezgehê Karê Awe û Dewlete (DSÎ) ya ke girêdayeyê şaredarîya qeyûmî ya berpirsîyarî nêgêna xo ser û hemwelatijê taxe aşmê hamnanî de lêşinîya çemî vera problemê girdan ciwîyenê. Seba ke awa sereban herikîyena mîyanê çemî boyêka xirab pira yena û coka ra nêweşîyê enfeksîyonal vejîyenê raşte. 

 

Bi serran o problem dewam keno 

 

Bi serran o çem na rewşe de yo û dormeyê çemî bîyo sey sergo. Çem seba ke nîno pakkerdiş nêweşîye vila keno û nika hemwelatijê dormeyê çemî paweyê çareserîye yê. Yew serrî verê cû hetê DSÎ ra çem çarçeweya projeyê GAPî de dîya îhale û hemwelatijê taxe dîyar kerdî ke beno ke çem biaçarîyo kanalê tahlîye û vatî ke hema xebatêke pakîye nêameya kerdiş. 

'Nêweşîye vila keno’ 

 

Cinîya bi nameyê Gul Dayane da zanayîş ke hamnan û zimistanî her tim eynî problem yeno ciwîyayîş û aşmê hamnanî de hîna zêde bi zirar o û wina vat: “Hamnan de seba ke çem nîno pakîkerdiş boyêk xirab ci ra yeno û xeylê lêşin o. Çem nêweşîye vila keno. Wexto ke beno zimistan zî laser werizeno. Zimistan de ma tersê laserî vera nêvejîyenê teber. Wexto ke varan varîyeno keyeyê ma debeno awe. Heywanê ma mirenê. Lazimîya çemî bi pakkerdişî esta. Ma çareserîye wazenê. Wa çem bêro pakkerdiş. Ma boye vera nêeşkenê biciwîyî. Ma bi nêweşîyê enfeksîyonal kewenê.” 

‘Ma çareserîye wazenê’ 

 

Gule wina qiseykerdişê xo peynî kerd: “Heywanê ma kewtî laser ver û heme mirar bîyî. Sekek yarîya xo bi ma bikerê, dewlete seba zirarê ma rê 500 TL da. Ma çareserîye wazenê. Ganî bi lez bikewî mîyanê têgêrayîşî.”