Sema Çaglak

 

RIHA - Hemverfeka Partîya Çep a Keske ya Rihayî Senem Erîş serrgêra Şorişê Rojawanî de qisey kerd û dîyar kerd ke tarîxê cinîyan Rojawanî de ameyo nuştiş û çimeyê serewedaritişê "Jin jiyan azadî" yê ewro Rojhelat û Îran de Şorişê Rojawanî yo.

 

Serê 19ê Temmuza 2012ine Şorişê Rojawanî ke pê ame de 11 serrî derbaz bî. Şorişê Rojawanî tenê seba şarê kurdî nê, eynî wextî de seba şarê ereb, turkmen, armenî û suryanî yê ke Surîye de ciwîyenê zî bî hêvî. Şarê Vakur û Rojhelatê Sûrîye yê wareyê çareserî de israr kerdêne, bi hêrişê DAÎŞî û dişminê şorişî reyde rî bi rî yê. Sere de cinî pêro şarê Vakur û Rojhelatê Sûrîye Kobanê dest pêkerdî û bi serewedaritişêk tarîxî zorê DAÎŞî berdî. Bi nê şorişî reyde perspektîfê neteweyê demokratîk ê Rayberê PKKyî Abdullah Ocalan kewt merîyet. 

 

Hemverfeka Partîya Çep a Keske ya Rihayî Senem Êrîş derheqê Şorişê Rojawanî de ercnayîş kerd.

 

‘Rojawan de tarîxê cinî ame nuştiş'

 

Seneme, dîyar kerd ke Şorişê Rojawanî tenê seba şarê kurdî nê, eynî wextî de seba pêro cinîyê dinya bîyo îlham û wina vat: “Rojawan de tarîxê cinî ame nuştiş. Cinî tenê Rojawan de nê her hetê dinya de seba azadîye têkoşîn kenê. Coka xora cinî mîyanê şorişêk de yê. Cinî destpêkê tarîxî ra heta nika xeylêk heqê xo ra bêpar ameyê mendiş. Her hetê dinya de zî seba nê têkoşîn danê. Cinî bi polîtîkayê qetîlkerdişê, îmha, destdergî û asîmîlasyonî reyde rî bi rî manenê. La têkoşînê cinî û felsefeyê; jin jiyan azadî seba cinîyan bî hêvî.”

 

‘Pêro wareyê komelî de ca girewtî'

 

Seneme, dîyar kerd ke dimayê şorişê Rojawanî rolê cinî yê mîyanê sîyasetî de tewr zêde bi û vat: "Ma bi nê şorişî dî ke rolê cinî yê vurnayîşî de çiqas muhîm o. Hem hetê komelî, hem hetê sîyasî û leşkerî de cinîyan bi nê şorişî xeylêk destkewtişê pîlî bidest kerdî. Xususî zî wareyê sîyasî de rolê cinî tewr zelal reng û vengê xo dîyar kerd. Xeylêk sazgeh û rêxistinan de temsîlkarîya cinîyan zêde bî. Cinîyê ke rêxistinê xo yê xoser tewr xurt kerdî û xoserîya demokratîke de zî cayê xo mende kerdî."

 

‘Hêzê cinî ra tersenê

 

Seneme, bale ant serê hêrişê hemverê Rojawanî û wina vat: “Cinîyê ke hewl danê bîyayîşê xo ramojnê, tim bîyê hedefê îqtîdaran. Sîstemê kapîtalîst cinîyê ke nêeşkeno kontrol bikero terseno. Seba nê hêrişê pêro destkewtişê cinî kenê. Ma tim vanê zanîstî destê cinî de bî, ya ke kultur aver berdêne cinî bî û ya ke komel rayra bena reyna cinî ya. No rolê cinî ke komel de hende muhîm o, mumkin nîyo ke nêbo hedefê îqtîdaran. Cinîyê ke goreyê înan tênêgêrenê kenê hedefê xo. Kurdîstan de zî eynî polîtîka girêdayeyê yewbînan ê û pêro hêrişê hemverê cinî de polîtîk ê. Hêrişê hemverê cinîya kurde de şexsê cinî de hemverê kurdan o."

 

‘Felsefeyê Jin Jiyan Azadî çimeyê îlhamî yo'

 

Seneme, dîyar kerd ke Şorişê Rojawanî bingehê xo paradîgama û fikriyatê Rayberê PKKyî Abdullah Ocalanî ra gêno û vat: "Eke ewro  Rojhelat û Îran de bi serkêşîya cinî serewedaritişêk pê ameyo, çimeyê xo nê ra gêno. Reyna o serewedaritiş zî îlham şorişê Rojawanî ra girewto. Têkoşînê nê cinîyan, hemverê sîstemê camêrdperestî yo."

 

‘Ganî têkoşînê xo bikerê yew’

 

Seneme, wina qedêna: "Cinî ver bi azadîye gam bi game şinê. No het ra ganî cinî hêz û têkoşînê xo temamê dinya de bikerê yew. Rêxistinbîyayîşê cinî ganî tewr hîra bibo û cinîyê ke Şorişê Rojawanî ra îlham girewtê, têkoşînê xo tewr pîl bikerê."