Marta Somek

 

STENBOL - Avûkate Sevda Çelîk Ozbîngole derheqê prosesê muhakemekerdişî yê Qetlîyamê Pirsûsî de qisey kerd û vat: “Zextê hemverê keye û avûkatan do pawitişê hemverê caardişê edaletî qels nêkero û ma do têkoşînê xo gird bikerî.” 

 

20ê temmuza 2015î de endamê Federasyonê Komeleyanê Ciwanan ê Sosyalîstan (SGDF) seba ke oyuncaxan domananê Kobanê rê bişirawî Merkezê Kulturî yê Amara yê Pirsûsê Rihaye de arê bîbî û wexto ke seba hetkarîya Kobanê eşkerayîye dayêne çapemenîye DAIŞî hêrişê înan kerd û netîceya hêrişê bomba de 33 kesan dinyaya xo bedilnaye û 104 kesî zî birîndar bîyî. 

 

Qirkerdişê Pirsûsî ra 8 serrî derbaz bî. Kerdoxan ra tena Yakup Şahînî ame muhakemekerdiş û 34 reyan cezaya muebbeto giran werd. Dosyayê Îlhamî Balî û Denîz Buyukçelebîyî ke qetlîyam ra berpirsîyar ameyêne muhakemekerdiş zî ame cîyakerdiş û qerar ame dayîş ke paweyê tepiştişê înan bêro vindertiş. 4ine roniştişê dewaya ke derheqê kerdoxê 'fîrar' Denîz Buyukçelebî û Îlhamî Balî yê ke dosyayê înan yewbînan ra cîya yenê muhakemekerdiş zî 4ê Temmuze de 5ine Mehkemaya Cezaya Girane ya Rihaye de ame dîyîş. Pêro pêameyan ra bi seyan kesî tewrê mehkema bîyî. Endamê DAIŞî Kasim Gulerî ke roniştişê dewaye de sey şahid ame goşdarîkerdiş, dîyar kerd ke o binê çimdarîya leşkeran de şîyo Sûrîye û serê persê ‘Kam Qetlîyamê Pirsûsî kerdo’ de vat ‘Tay kesan vat dewlete kerda, Mi wina eşnawit’. “ 

 

Kişta canêardişê edalaetî de avûkatê dosya û keyeyî zî hedef ameyî mojnayîş. Înan avûkatan ra yew zî Gulhan Kayaye ya. Gulhane 12ê hezîrane de bi îdîaya "endamtîya rêxistine" ameybî tepiştiş. Avûkata dosyaye Sevda Çelîk Ozbîngole derheqê prosesê muhakemekerdişî de ajansê ma JINNEWSî rê qisey kerd.

  

Hêrişê xokiştişî û qetilkerdişê 33 ciwanan  

Sevdaye destpêkerdişê qiseykerdişê xo de bale ant serê prosesê qetlîyamî û vat: “Qetlîyamê Pirsûsî qetlîyamê giran ê aşma Temmuza 2015î yo. Têkoşînê aştî, biratî û merdimîye yê Rojhelatê Mîyanenî de 33 ciwanî bi hawayêk zaf trajîk dinyaya xo bedilna. Seba aştî û biratîya çar hetê welatî bi siloganê newe ra awankerdişê Kobanê çenteyê xo de bi şêranîyê roşanî û oyuncaxan kewtî rayîr. Seba rayvanîye eşkerayî dayî. O wext hêrişê xokiştişî pê ame û 33 ciwanî dinyaya xo bedilna." 

 

'Vera ameyoxê ma de hêriş ame kerdiş’ 

 

Sevdaya ke sere ra heta nika proses taqîp kerda wina ercnayîş kena: “Rayaumûmî derheqê babete de hîssin bî û her kes xo hetgir hîs kerd. No hêriş vera ameyoxê ma, aştî û biratîye de pê ame. Sere de derheqê dosyayî de qerarê nimitişî ame dayîş. Nizdîyê 2 serrî derheqê dosyayî de tu maumat nêame dayîş. Ma xeylê reyan ser avûkat waştişê dîyîşê îdîanameyî kerd. Badê 2 serran îdîaname ame dayîş. Wexto ke cipersayîşê dosyayî ameyne kerdiş welat de çend qetlîyamî bînî zî pê ameyî. Qetlîyamê Garê Anqara, Stenbol, Dîlok û Amedî bi eynî şeklî pê maeyî.” 

 

'Tehqîqatêk raşt nêame kerdiş’ 

 

Sevdaye dewamê qiseykerdişê xo de da zanayîş ke bado ke qerarê nimitişî ame wedaritiş ame dîyîş ke dewa ameya akerdiş û nê çîyan ard ziwan: “Seba ke têkilîya kerdoxî bi Qetîyamê Garê Anqara reyde zî estbî. Na têkilîya mabenê înan merdiman keno mîyanê şikan. Tehqîqatêk raşt nêame kerdiş û qetlîyamê bînî nêameyî vindarnayîş. Netîce de xeylê kesî dinyaya xo bedilna. Bi seyan keyeyî mîyanê dejî de nika têkoşînê canêameyîşê edaletî danî. Tena dosyayê Pirsûsî de nê, Anqara, Stenbol, Dîlokî de zî hema prosesê muhakemekerdişî dewam keno.”  

 

'Tena kerdoxêk tepişte yo'  

 

 

Sevda, dîyar kerd ke dosya serê muhakemekerdişê 3 kerdoxan dest pêkerd û wina vat: "Kerdoxêk amebî tepiştiş, labelê girêdayeyê dosyaya ma nê, girêdayeyê cipersayîşê Qetîamê Garê Anqara de amebî vetiş. Xêrcê nê 2 kerdoxê fîrar estbî. Dewa bi nê rengî dest pêkerd. Muhakemekerdiş Kampûsê Zîndanê Hîlvanî yê Rihayî de pê ame. Kerdoxê ke salona roniştişî de bî, muhakemekerdiş ame kerdiş. Keyeyan sereyê ewilî heta nika bi israr waştişê caardişê edaletî kerdî."  

 

'Nêwazenê serebût bêro roşinkerdiş' 

 

Sevda, wina bale ant serê nêardişê kerdox ê salona roniştişî: "Xeylêk reyan ma waştiş kerd ke kerdox bîyarê salone. Seba rastî nêvejîyo werte hêzêk vernîya ma de bî. Hem cipersayîşêk ca de nêame caardiş û hem zî muhakemekerdiş. Ma bi israr waştiş kerd ke pêro delîlî mîyanê dosya de bêrê bicakerdiş. Nê 3 kerdoxî bi tenê sereyê xo nêeşkenê nê hêrişî organîze bikerê, labelê pêwa hedîseyêke wina pîl û wahîm prosesê muhakemekerdişî lêz û bez ame kerdiş. Seke ke edalet pê ame, ame mojnayîş. Ma şahîdîya vatişê Serekwezîrî nê wextî Davutoglu kerd û vat 'Eke ez qisey bikerî do erd bilerzo'. No çî nîşan dano ke hûmara kerdoxan zêde yo. Çend ma waştişê wa sey şahid bêro goşdarîkerdiş zî dadgeh waştişê ma red kerd. Sewbîna ma waştişê vînayîşê dîmenê mobese yê 5 saetan ê ke ame vînîkerdiş kerd. La derheqê na babete de zî dadgerî cewabêke nêda. Sewbîna prosesê muhakemekerdişî de ma musayî ke kesê ke derheqê înan de qerarê tepiştişî esto, seba tedawîye ameyî Tirkîya. Dosyayê Konya, Hatay û Dîlokî de qeydê bi nê rengî estê. Bi taybetî nêwazenê serebût bêro roşnkerdiş."