Melîke Aydin

 

ÎZMÎR - Kombîyayîşê demo newe yê Partîya Çep a Keske û HDPyî ke Îzmîr de dîya destpêkerdiş de cinîyan dîyar kerd ke hedefê înan no yo ke cinî sîyaset de hîna aktîf bibê û rayîrê hîrine bikerê mekanîzmaya partîye. 

 

Partîya Çep a Keske û Partîya Demokratîke ya Şaran (HDP) badê weçînayîşan xebata demo newe dayî destpêkerdiş û na çarçewe de kombîyayîşê şarî pê ardî. Îzmîr de zî kombîyayîşê şarî dest pêkerd, sere de merkez û dima ra zî do dezgeh û cayê cîyayan de dewam baikero. Kişta kombîyayîşê têmîyanî de do kombşyayîşê cinîyan zî pê bêrê û se ra 50ê kombîyayîşan do çapemenîye rê padaye dewam bikerê. Cinîyê ke tewrê kombîyayîşan benê dîyar kerdî ke hedefê înan no ke cinîyan sîyaset de hîna aktîf bikerê. 

 

Hemsereka HDPyî ya Îzmîrî Berna Çelîke da zanayîş ke heme rêxistinê qezayan kombîyayîş pê ardî û heyetî wezîfedar kerd û vat: “Ma do sebebê ke weçînayîşan de netîceyêk baş nêameyo destfînayîş bi şarî reyde dîyar bikerê û ronê raşte. Adetê ma zî no yo. Ma hêzê xo şarî ra gênê. Ma do xerîteya xo bi şarî reyde dîyar bikerê. Ma do bi şarî reyde kombîyayîşê xo serê rexne û xorexnekerdişî de pê bîyarê. Ma do kêmanîyan tespît bikerê û rayîrê çareserîye ronê raşte.” 

 

‘Hedefê ma no yo ke ma rayîrê hîrine bikerê mekanîzmaya rêxistine’  

 

Bernaye dîyar kerd ke xeylê endamê partîye ameyî tepiştiş, xeylê mecbur mendê ke şêrî teberê welatî û wina vat: “Tay ameyî qetilkerdiş. Ma prosesêk winasî ra derbaz bîyî. Partî Rayîrê Hîrine hedef kena la bi hawayêkê baş terefgiranê xo ra nêvata. Amacê ma no yo ke ma stratejîya rayîrê hîrine bi terefgiranê xo reyde munaqaşa bikerê û prosesê weçînayîşan de û vîşêrê ci bikerê mekanîzmaya rêxistina partîye. Çike paradîgmaya ma paradîgmaya azadîya cinîye ya. Îzmîr de ma nizdîyê 50 kombîyayîşê rêxistinî kerd û mîyanê ci de yê cinîyan zî estbî. Ma do problemê cinîyan, waştişê cinîyan ê partîye ra goşdarî bikerê. Şikê cinîyan yê zaf zêde estê. Vera feqîrîye de têkoşîn esto. Krîzê ekonomî yê gird esto. Coka ra bi embazê cinîyan reyde ercnayîşê prosesî do hêz bido ma. Coka ra tewrbîyayîşê embazê cinîyan xeylê muhîm o.” 

 

‘Ganî namzet cinî ba’  

 

Endama Şûbeyê Komeleya Elewîyê Demokratîke (DAD) ya Îzmîrî Muteber Akbudake zî dîyar kerd ke aye wezîfedara serê sindoqe bî û xeylê pusulayê rayan de mohrê hem Partîya Çep a Keske hem zî yê HDPyî estbî û coka ra nê rayî derbaz nêbîyê. Mutebere wina vat: “Ma êdî nêwazenê rewşêk winasî ke ganî CHPyî rê raye bêrê eştiş bêra awankerdiş. Ma seba demokrasîye paştî da Kemal Kiliçdarogluyî. La ma wazenê paştî bidî namzedanê xo. Ganî nê namzedî zî qetî cinî bê. Ma elewîyî wazenê ke bi bawerîya xo biciwîyê. Xeylê elewîyî estê la yê ke nê rayîrî ser de şinê çinî yê. Wexto ke namzedê elewîyî yenê mojnayîş wa ma ra bêro persayîş. Wa weçînayîşê herêmî de ma ra bipersê. Weçînayîşê pêroyî de sereyê merdiman têmîyan kerdî. Ganî cinî bi hawayêkê aktîf sîyaset de ca bigêra. Wa vera camêrdan de sere nêrona.” 

 

‘Wa sazgehê cinîyan abibê’  

 

Hemsereka HDPyî ya Bayrakli Ayşe Silik ard ziwan ke  her problemêk herêmî ra destpê keno û seba nê zî kombîyayîşan herême de kenê û vat: “Ma do keye bi keye, kuçe bi kuçe şêrê verê cinîyan û waştişê înan goşdarî bikerê. Ma do persê înan, vatişê înan qeyd bikerê. Ma cinîyê kurdî wazenê ke parlamenterê ma kurdî bê. Ganî ziwanê înan bêro famkerdiş. Ma wazenê sazgehê cinîyan newe ra bêrê akerdiş.”

 

‘Ganî temsîlkarîya cinî zêde biba’

 

Endama Meclîsê Cinîyan ê Partîya Çep a Keske Meryem Gulbudak zî dîyar kerd ke mercîyê qerarî de her tim camêrdî estê û wina vat: “Komara camêrd ya bîyaye de, nê weçînayîşan de zî polîtîkayê serdestî yê camêrdan zêde bî. Temsîlkarîya cinî de Partîya Çep a Keske têduştî bidest kerd. Wa weçînayîşê herêmî de no tewr zêde bibo. Hûmara cinîyan zêde bibo, do  meclîs zî xurt bibo.”