Melek Avci

 

ANQARA - Parlamentera Herêma Partîya Çep a Swêdî A.Jessîca Therese Karlqvîste tecrîdê serê Rayberê PKKyî Abdullah Ocalanî şermizar kerd û derheqê ke kurdan ê NATOyî înan kerd babeta bazarîye û vat: “Ma nêeşkenê têkoşînê heqê merdiman seba dîktatorêk sey Erdoganî, tena seba endamtîyêk çinî bihesibnê. Goreyê mi kerdişê babeta bazarîye zaf lêşin o û ez şerm kena.” 

 

Tecrîdê giran ê serê Rayberê PKKyî Abdullah Ocalanî dewam keno û 27 aşmî yo tu xebere Abdullah Ocalan û tepişteyê ke kişta ci de yî Omer Hayrî Konar, Hamîlî Yildirim û Veysî Aktaşî ra nîna girewtiş. Vera heme muracatan û vengan tu xebere, cewab nîna dayîş. Heto bîn de zî heqê kurdan NATOyî de serê maseye de beno babeta bazarîye. 

 

Parlamentera Partîya Çepe (Left Party) ya Swêdî A. Jessica Therese Karlqviste derheqê tecrîdê serê Rayberê PKKyî Abdullah Ocalan û çaresernêkerdişê problemê kurdî de qisey kerd.  

 

‘Tecrîd probleman giran keno’  

 

Jessîca dîyar kerd ke tecrîdê serê Abdullah Ocalanî nîno qebulkerdiş û vat: “Ez caardişê serê tepişteyanê sîyasîyan şermizar kena. Tecrîd vera heqê merdimî de yo. Partîya mi zî nê çîyî şermizar kena. No nimuneyêk rejîmê totalîter û ne demokratîke yo. Tecrîdê serê Ocalan û tepişteyan bi raştî problemê Tirkîyaye giran keno. Sebebê na rewşa no yo ke Tirkîya demokratîkbîyayîşî ra dûrî ya, tepişte heqanê xo ra dûrî yê. Rojnameger, avûkat, sîyasetmedar û pawitoxê heqan tepişte yê. Na lîste wina derg bena." 

 

‘Bêvengîye parçeyêk sîstemê emperyalîst a’  

 

Jessîda ard ziwan ke heyeto ke ameyo Amed de ca girewta û vat ke çimdarî û binpaykerdişê heqan vîrî nêkena û dewam kerd: “Ma keyeyê tepişteyan û dezgehan ra xeylê çîyan musayî. No zîyaretî de mi fikrê zelalî bi dest fîna. Ez şertê ke merdim tedeyî qet vîra nêkena. Qet înan qebul zî nêkena. Raşteyê mîyanneteweyî bêveng o. Bêvengî parçeyêk sîstemê erperyalîstî ya. Sebebê ci têkiliyê mabenê welat û rayîrberan de yo.” 

 

Hukmê peymane aşkera yê 

 

Jessîca, cewabê CTPyî yê ‘ma vîşêrê destûrê selahîyetdaranê tirkan rapor eşkera nêkenê’ red kerd û maddeyê 10ine ard vîr. Jessîca da zanayîş ke madde zaf eşkera yo û vat: “Maddeyê 10ine zaf eşkera yo û nika ganî bêro taqîbkerdiş. CTP eşkerakerdişê raporî red keno. La no nîno qebûlkerdiş. No hemverê peymane yo. Hukmê Peymane aşkera yê. Problemê kurdî bi serran o hetê îqtîdarê tirkî ra yeno girankerdiş. Îqtîdaro bîyaye tecrîd nêqedêneno. Ganî hukmat avuryo. Goreyê mi  îqtîdaro bîyayeyê Tirkîya seba demokrasî çîyêk nêkeno. Seba nê ganî vurnayîşê bi kokî bêrê kerdiş. Dejê pîlî ameyî ciwîyayîş. Ganî şorişê demokratîk pê bêro.”

 

‘NATO de serê kurdan de bazar yeno kerdiş’

 

Jessîca da zanayîş ke NATO de serê kurdan de bazar yeno kerdiş û wina qedêna: “Bazarê endamîya NATOyî ya Tirkîya û Swêdî de reyna kurdan dayî serê maseye û babeta radestkerdişê sîyasetmedaran. Xoverdayoxî her tim terorîst yenê îlankerdiş. Ez nê ra bîya rincan û nêrehet a.  Partîya mi sere de pêvînayîşê NATOyî de seba kurdan têkoşîn da. Ez bi nê serberz a. La seba nê bazarîye zî şerm kena. Ez xo sey kes mahcup vînena. Seba endamîya heqê merdiman nêeşkenê çin bêrê hesibnayîş. Seba kêfweşkerdişê dîktatorêk sey Erdogan heqê merdiman nêeşkeno bêro çinkerdiş. No bazarêk lêşîn o û seba nê şerm kena.”