MERKEZÊ XEBERAN - Bajarê Lozanî yê Swîsre de do konferansê mîyanneteweyî ke tede ameyox û demê verêne yê kurdan ser de nîşan bêro mojnayîş, pê bêro. Vera konferansî do ewro rayîrşîyayîşêk bêro viraştiş. 

 

100ine serrgêra îmzekerdişê Peymana Lozanî ya.  Bajarê Lozanî yê Swîsre de do konferansêk mîyanneteweyî pê bêro. Heto bîn de do bajar de rayîrşîyayîş û mîtîngêk merkezî zî pê bêro. Seserra peyînî de hêrişê qirkerdişî yê serê kurdan esas ame girewtiş û hêriş zêdîya. 

 

Do konferans di roje dewam bikero  

 

Konferanso do 600 meymanî ra zêde tede hadre bibê û Peymana Lozanî bêra munaqaşakerdiş do Salona Kongreye ya Beaulieu (Salle de Congrès de Beaulieu) de bêra viraştiş. 

 

Konferanso ke do roja şemeyî pê bêro û di rojan dewam bikero de panelo yewine de do Peymana Lozanî û netîceyê ci yê Kurdistanî bêrî munaqaşakerdiş. Panelo ke do bi moderatorîya Selma Irmak û Xelîl Xezerî pê bêro de, tarîxnasê têkilîyê mîyanneteweyî Dr. Suheyla Qadirî, Unîversîteya Selahedînî ra Prof. Narmen Muhamad Amîn Alî, Hemserekê Komîteya Kordînasyonê Unîversîteyê Bakur û Rojhelatê Sûrîye Dr. Abdulilah Al Mustafa û Cigêrayox û Nuştox Mehmet Bayrakî do sey qiseykerdox ca bigîrê.  

 

Roja diyîne ya konferansî de do di roniştişî bêrî viraştiş. Panelê yewine yê bi sernameyê “Rewşa cinîyan û têkoşînê cinîye” de do moderatorîya panelî Kurdê Omer û Seher Aydarî bikerî. Unîversîteya Bremenî ra Munevver Azîzoglu û Berpirsîyara Dezgehê Cinîyan a Silêmanîye Nermîn Osmane sey qiseykerdox panel de ca bigîrê.  

 

Roniştişê diyîne de do ‘rewşa şarê armenî, asûrî û keldanî’ bêra munaqaşakerdiş. Nê roniştişî de Cigêrayox, Nuştox Aydin Aslan û perwerdekar Nayrî Muradiane do bibî qiseykerdox.  

 

Roniştişê peyînî yê bi sernameyê ‘100 serrî têkoşînê vera netîceyê Peymana Lozanî’ do bi moderatorîya Behre Mohamed Mehmod û Rojan Hazime bêro munaqaşakerdiş. Panel de Fakulteya Huqûqî ya Unîversîteya Vîyanaye ra Prof. Dr. Naîf Bezwan, Unîversîteya Jagiellonian ya Polonyaye ra Dr. Azad Hajî Aghayî, Nuştox Arêz Abdullah û Nuştox Dr. Heval Ebubekîrî do bibê qiseykerdox.  

 

Beşê peyînî de do "Çareserî û Deklarasyonê Konferansî" bêro eşkerakerdiş û deklarasyon û munaqaşakerdişê betalkerdişî bêrî rayraberdiş. Deklerasyonê peynî yê konferansî do 24ê Temmuze de roja dişeme saet 10.00î de kişta awanîya Château d'Ouchy de bi eşkerayîyêk çapemenîye rayaumûmîye rê bêro eşkerakerdiş.  

 

Do rayîrşîyayîş û mîtîng bêrê viraştiş  

 

Şarê Kurdistanî seba rayîrşîyayîş û mîtîngî ke paralelê konferansî bêrî viraştiş ewro saet 11.30î de do Lozan de Place de la Navîgationî de arê bibî. Çalakger do saet 13î de rayra şêrê û dima ra mîtîngêk bêro viraştiş.  

 

Endamê Komîteya Lozanî Yuksel Koç, Hemsereka KNKyî Zeynep Murad, Endama Polîtburoya YNKyî Blese Cebar Ferman, Hemsereka PYDyî Asya Abdullah, Serekê Komeleye Îbrahîm Alizade, Temsîlkara TJK-Eyî Şukran Sîncar û hunermend Necmedîn Xulamî, Şivan Perwer, Çopî Fettah, Mizgîn Tahîr, Nasir Rezazî û Hozan Comerdî tewrê çalakîye bibê.