MERKEZÊ XEBERAN - Şewatê daristananê Merîwanî 3 rojî yo dewam keno. Çalakîkerê derûdorî û şarê herême hewl danê şewatî bitefênê. Heta nika 7 kesî seba şewatî birîndar bîyê.

 

19ê Temmuze saetê nîmrojî de daristanê dewa Kolkê Janî yê bajarê Merîwanî yê Rojhelatê Kurdistanî de şewat dest pêkerd û bi lez vilayê dewanê derûdorî bi.

 

Goreyê xebera Rojnewsî heta nika na herême de xeylêk daristanî veşayî û pêwa waştişê hetkarîya lezgîn a çalakîkeran û selahîyetdaran zî şewat heta nika nêameyo kontrolkerdiş.

 

Selahîyetdaran şewa 20ê Temmuze dîyar kerd helîkopterê awrijyayeyî Tehran ra vejîyayê û ver bi Merîwanî rê kewtê rayîr. Sewbîna şarê herême şewe û roje cayê hedîse de yê û hewl danê şewat kontrol bikerê.

 

Her serre daristanê herêma Merîwanî bi plankerde danê adir ver û no zî hîn rewşan de hetê kesê qezancan seba berjewendîyê şexsî û xeylê rewşan de bi plankerde û hetê hukmatî ra bi sebebê sîyasî yenê kerdiş.

 

Seba ke na herême de bi dewamî reynabîyayîşê şewatan, binê verasîya îdarekerdişê nêbaş ê îqtîdaran de nêbîyayîşê tesîsê munasibî yê seba tefênayîşê adirî û xemsariya hukmatî yê seba na herême, şarê herême her serre bi sebebê hewldayîşê tefênayîşê şewatê nê cayî, dinyaya xo bedelnenê û birîndar benê.