Oznur Deger

 

MÊRDÎN - Mamosteya reqsî Bêrîvan Sakine derheqê kursê hamnanî yê Komeleya Kultur û Hunerî ya Mezopotamyaye de qisey kerd û vat: “Komel bi kulturê xo, xo bîyaye keno. Wa keye bi hîssin têbigêro û tutanê xo bişirawî kursan.” 

 

Qezaya Qoserî ya Mêrdînî de Komeleya Kultur û Hunerî ya Mezopotamyaye seba ke kultur û ziwanê kurdî bida ciwîyayîş xebata xo rayra bena û vera polîtîkayê asîmîlasyonî de têkoşîn kena. Mamosteya folklorî Bêrîvan Sakine derheqê xebata komele û kursê hamnanî de qisey kerd. 

 

‘Komel bi kulturê xo esto’ 

 

Bêrîvane bale ant serê muhîmîya kultur û hunerî û da zanayîş ke aye heqîqetê xo bi kulturî vînena û wina vat: “Kultur û mîraso ke ma kal, pîr û serkêşanê xo ra girewto esto. Înan ra yew zî kulturê dengbêjîye yo. Vatişêk ma esto, vanê ziwanê kurdî vera ameyo qedexekerdiş, xo bi vengê xo îfade kenê. Komel bi kulturê xo xo bîyaye kenê. Bê kultur merdim çinî beno, komel çinî beno. Cinî û kultur zî manenê yewbînan. Cinîye porê ra heta kinc û xoradayîşê xobi tilîlî heta govende ke çarnenî kulturê xo danê ciwîyayîş. Kultur û cinî yewbînan ra cîya nîyê." 

 

‘Wa keye tutanê xo bîyarê kursan’  

 

Bêrîvana ke serra 2019î ra het nika Komeleya Kultur û Hunerî de falîyet rayra bena da zanayîş ke dersê sey saz, gîtar, erbane, reqs û tîyatroyî danê. Bêrîvane wina dewam kerd: “Ez dersê reqsî dana tutan. Seba saz eleqeyêk zaf gird esto. Ekonomîye vera keyeyê ke nêeşkenê tutanê xo bişirawê kursan estê. La ma na babete de hetkarîye danê tutan. Ma keyeyan ra hîsgerîye wazenê. Wa tutanê xo bişirawê kursan. Zafaneyê wendekarê ma cinîyan ra pê yeno. Eleqeya camêrdan hîna kêm o.”  

 

Seba konserê 25ê Temmuze veng kerd 

 

Bêrîvane qala xebat û falîyetê komeleye kerd û vat ke 25ê Temmuze de kafeya Şehrî Keyfî de do konserê Sîpan Xelatî pê bîyarî û wina dewam kerd: “Ez venga tewrbîyayîşî kena. Ganî heme şarê ma bêro komeleye. Ganî komeleye nas bikero. Wa bêrî ma nas bikerê û çayêka ma bişimnê.” 

 

'Ma sere çewt nêkenê’ 

 

Bêrîvane bale ant serê zextê kulturê kurdî ser û ard ziwan ke ciwanê kurdî hema zî seba deyîrê kurdkî vanê yenê qetilkerdiş û vat: “Ziwanê kurdî, kulturê kurdî ser de zext esto. Ganî şar nê çîyî baş bizano û vera nê de kulturê xo bipawo, tutanê xo bişirawo komeleyê ke kulturê xo musnenî. Tutî estrumanêk zî bimusê do wayîrê kulturê xo bivejê. Ma do qet vera zextan de sere çewt nêkerê.” 

 

Bêrîvane qiseykerdişê xo yê peyênan de vat ke kursê seba tutan mabenê 7 û 15 serrî de yo û kursê seba pîlan zî mabenê 15 û 30 serrî de yo û wina peynî kerd: “Heta emrê 30î ma wendekaran gênê. Seba tîyatroyê ‘Xal û Warza’ eleqeyêk gird esto. Nika kursê ma yê hamnanî newe dest pêkerdî. Waştişê ma no yo ke tewrbîyayîş û hîsgerî zêde bo. Kêmasîyê ma hema estê la ma do inan hemeyan çareser bikerê.”