AMED - Dayîka Aştîye Rahîme Çelîke badê lajê xo yê ke Kobanê de hetê DAIŞî ra şer de dinyaya xo bedilna, Meclîsê Dayîkanê Aştîye de dest bi têkoşînî kerd. Rahîmeye dîyar kerd ke şarê kurdî seba nasname, ziwan û heqanê xo yê ke ameyî înkarkerdiş têkoşîn keno. 

 

Vera şerî de yê ke tewr zêde xover danê û vengê xo berz kenê dayîk ê. Dayîkê Kurdistanî kişta dejê zerrîya xo seba ke gonî nêra rijnayîş û aştîya daîmî pê bêra bi serran o mîyanê têkoşînî de yê. Dayîkê Aştîye seba ke vera şerî de têkoşîn bikerê Meclîsê Dayîkanê Aştîye awan kerdî û binê banê meclîsî de hem Kurdistan û hem zî Tirkîya de xebata xo rayra benê. Hîkayeya her yew dayîkêk bi têkoşîn û dejî ameya ristiş. Nê dayîkan ra yew zî Rahîme Çelîke ya 60 serrî ya. Rahîmeya ke şertê zehmetinan mîyan de cuya xo dewam kena bado ke lajê aye şerê Kobanê de dinyaya xo bedilna, seba ke şerî rê vaja nê mîyanê dayîkê aştîye de ca girewte. Dayê Rahîmeye qala cuya xo kerd.  

 

‘Heskerdişê mi yê wendişî zerrîya mi de mend’  

 

Rahîmeye bi eslê xo dewa Bênîn ya girêdayeyê qezaya Pasûrî ya Amedî ra ya. Rahîmeye wina qala tutîya xo kerd: “Tutîya mi xora dewe de derbaz bî. Ma 4 waye û 6 bira bî yî. Ma bi karê tutûnî reyde îdareyê xo kerdêne. Tutîya mi de çîyo ke tewr zêde zerrîya mi de mend heskerdişê mi yê wendişî bî. Mi xeylê waştêne ke ez biwana û perwerde bivîna. Mi xeylê waştêne şêra mekteb la keyeyê mi mi nêerşawit mekteb. Mi reyna zî hewl dayêne ke wendiş û nuştişî bimusa. Gama ke embazê mi mektebe ra ameyêne ez şîyêne kişta înan û ê çi bimusayêne ez zî înan ra musayêne û bi no hawa ez zî musaya.” 

 

‘Cuya mi zehmet derbaz bî’  

 

Rahîmeye da zanayîş ke aye emrê tutîye de ameya zewecnayîş û vat: “Ez 16 serrî ya xo de ameya zewecnayîş. O wext ez hema şenik bîya. Bado ke ez ameya zewecnayîş ez şîya dewa Licê û uca de mi cuya xo dewam kerd. Dimayê demêk mêrdeyê mi çarçeweya tehqîqatêk pêkewtişî de kewt zîndan. Bado ke zîndan ra vejîya karê xo yê sîyasî vera reyna ame tepiştiş û 12 serrî ceza ci rê ame birnayîş. O wext tutê mi hema şenik bî. Dewa ma ameye veşnayîş û ma mecburî ameyî bajara û mi hewl da îdareyê keyeyê xo bikera. Aye wext mi xeylê zehmetîyan ant. Keyeyê ma çinî bî, çîyêk ma zî çinî bî. Mi zî bi neqş û karê deştişî hewl da îdareyê xo bikera. Hetêk ra zî ez şîyêne karê çinitişê tutûnî û bi no hawa mi îdareyê keyeyê xo kerdêne. La reyna zî mird nêkerdêne. 6 tutê mi estbî, heme zî şenik bî û wendêne. Lajê mi yê gird 12 serrî bî û mektebe de xeylê serkewte bî la waşt ke seba îdareyê keyeyî fek mektebe ra biverdo. Mi nêwaşt o mekteb ra fek vera bido, la vera pêroyê israranê mi zî fek ferda û xebetîya. Reyna kênaya mi ya ci ra şenikêr seba îdareyê keyeyî mektebe ra vejîya û xebetîya. Seba ke tutê mi fek perwerde ra verdayî ez xeylê hîssin bîya. Mi tutanê xo bi feqîrî û belengazîye gird kerd. Mi xeylê zehmetîyî ant.” 

 

‘Lajê mi hemverê zulm û nêheqî tewrê tevgerî bi’  

 

Rahîme, dîyar kerd ke dimayê ke tutê aye pîl bî, cuya aye tewr zêde zehmet bîya û vat: “Lajê min o qij, seba ke biwano mi xeylêk hewil da û ser de vinderta. Tewr peyîn mi unîversîte zî qezenc kerd û wend. La ê zî zilm û nêheqî serê şarê xo de qebûl nêkerd û tewrê mîyanê tevgerî bi. Wextê ke şerê Kobanê dest pêkerd, lajê mi verê xo da Kobanê. Ma demêk derg ci ra zanayîş nêgirewt. Dima ra ma musayî ke şehîd bîyo.”  

 

‘Seba aştîyêke mende kewta mîyanê dayîkê aştîye’  

 

Rahîme, da zanayîş ke aye dimayê şerê Kobanê kewta mîyanê dayîkê aştîye û wina vat: “Dimayê şehadetê lajê xo ez xeylêk dejaya. Seba ke şer ra vajî nê û aştîyêke mende pê bêro, mi Meclisê Dayikê Aştîye de ca girewt. Ma dayîkî zerrîya ma xeylêk dejena. Pêwa nê dejê zerrîya ma, ma nêwazenê dayîkî bibermê û gonî birijîyo têkoşînê xo dewam kenê. Heqê şarê ma çin yeno hesibnayîş, ziwanê ma qedexe yo, nasnameyê ma nîno qebûlkerdiş. Serê nê caardişan ciwanan ra bigî, heta dayîkan têkoşînêk pîl yeno dayîş. Ma zî seba aştîyêke mende têkoşîn danê. Dayîkî nêwazenê ke tutê înan bêrê kiştiş. Hesrê pêro dayîkan eynî rengî yo.”