Nûjîn Nazlican Yildiz  

 

ÎZMÎR - Cinîyan dîyar kerd ke pêvînayîşê TÎSî ke do aşma Tebaxe de pê bêro de ganî waştişê cinîyan serê maseye de bibî û vatî ke Memur-Sen cinîyan çinî hesibneno. Cinîyan vatî ke heta waştişê înan nêrê caardiş do têkoşîn bikerê. 

 

Cinîyan dîyar kerd ke seba waştişê cinîyan pêvînayîşê 7ine Peymana Karî ya Komî (TÎS) de ca bigîrê do têkoşîn bikerê û vatî ke 6 pêvînayîşê verênan de mekanîzmayê qerarî de tena camêrdî estbî û cinî çinî ameyî hesibnayîş. Cinîyan dîyar kerd ke qanûnê hûmara 4688î de heqê grevî çin o, temsîlkarîya cinîyan çin a, îradeyê kedkarê cemawerîye nînê mojnayîş û meseyêk winasî seba înan çin a. 

 

‘Qanûnê 6488î de heqê grevî çin o’  

 

Hemsereka Pêroyî ya Sendîkaya Kedkarê Weşîye (SES) Gonul Adibellîye da zanayîş ke wextê Peymana Karî ya Komî ke di serran de reyêk seba kedkarê cemawerîye yeno kerdiş de waştişê cinîyan anî ziwan ser û vat: “Her çend ke bi serran o ma têkoşîn danê zî hema heqê grevî qanûnê 4688î de çin o. Ma her tim vat no qanûn ma temamî nêgêno mîyanê xo, qanûnêk winasî zêde bi tesîrin nîyo. Ganî no qanûn bêro bedilnayîş. Sendîkayêk zafane yeno dîyarkerdiş û no sendîka serê na maseye de seba karkerê cemawerîye îmze erzeno binê heq û waştişan. Ma do îtîraz û têkoşînê xo dewam bikerê.” 

 

Yew waştişê tewr muhîmî: Seba tutan kreşê bê pere û bi ziwanê dayîke  

 

Sekretera Huqûqî û TÎSî ya Merkezê Pêroyî ya SESî Eylem Kaya Erogluye zî dîyar kerd ke bi serran o pêvînayîşê TÎSî de talebê înan nînê caardiş û dewam kerd: “Problemî bi israr nînê dîyîş. Her çend ke heqê keyeyî bibo zî cinî 7-24 yena xebetnayîş û cayê asayî ke tutanê xo tede ronî çin o. Waştişê tewr muhîm kreşê bê pere û bi ziwanê dayîke yo. Heto bîn  de bi baskê karî yê xizmetê weşî û komelî reyde şîdetê cînsîyetî, psîkolojîk û îdîayê tacîzî xeylê zêde yê. Derheqê astengkerdişê şîdetê serê cinîyan de waştişê ma yê cîdî û muhîmî estê. Dimayê feshkerdişê Peymana Stenbolî no bî waştişê ferz. Ma wazenê ke no waştişê ma binê pawitişê TÎSî de pê bêro. Ganî 8ê Adare sey mabendayîşê fermî bêra îlankerdiş û reyna demê reglî de seba cinîyan destur bêro dayîş. Pedê hîjyenî ganî bê pere bibê. Nê heme mîyanê waştişanê ma yê TÎSî de ca gênê.” 

 

Eyleme sewbîna ard ziwan ke xeylê waştişê înan estê û wina qiseykerdişê xo peynî kerd: “Eynî wext de seba pawitişê tutanê ma, derheqê weşîya kar û asayîşê karî de waştişê ma estê. Wextê pandemîyî de kedkara weşîye Fatma Akyuza ke kreş çinî bî ke tutan biverda û cayê binê pawitişê dewlete ke tutanê xo tede biverda çinî bî, di tutê xo da cîrananê xo û şewato ke vejîya de wirdî tutê xo vînî kerd. Ma do nê çîyî qet xo vîra bikera. No waştişê ma xeylê muhîm o. Ma do her tim waştişê xo bîyarî ziwan ser.” 

 

'6 deman camêrdî mase rona'  

 

Hemsereka KESKî Şukran Kablane zî pêvînayîşê Pêkerdişê Karî yê Komî virst vîr û vat ke pêvînayîş do aşma tebaxe de dest pêbikero. Şukrane nê çîyan ard ziwan: “6 reyo ke camêrd maseye awan kenê. Camêrdî munaqaşayan kenê û cinîyî nê maseyan ser de çin ê. Seyyewbînanîya cînsîyetê komelî ame redkerdiş. Maseya ke Memur-Sen û Kamu-Senî awan kerdî 6 demî yo ke cinîyan çinî hesibnenî. Sey KESKî ke roja ewilî de vat ganî waştişê cinîyan cîya bêro destgirewtiş. Maseya ke temsîlkarîya cinîye tede çin a, seba ma çin a û hukmê ci zî çin o. Ganî caardişê ke seyyewbînanîye raşte ra wedarneno bikewo cuye. Ma sey kedkarê cinîye yê cemawerîye vera înan probleman de têkoşîn kenê. Ma cinîyê KESKî verê cû ra nata pîya têkoşîn kenê û ma do têkoşînê xo dewam bikerê.”