Marta Somek

 

STENBOL - Hemverfeka Meclîsê Cinîyan ya HDKyî ya Stenbolî Nazli Buket Yaziciye da zanayîş ke çarçeweya 100ine serrgêra Lozanî de do 30ê Temmuze de bi sernameyê ‘Seserre de Lozan: Muhasebe û Îmkan’ panelêk pê bêro û seba ke heme şar bieşko xo îfade bikero ganî tewrê panelî bibo. 

 

Kongreya Demokratîke ya Şaran (HDK) bi wesîleya 100ine Serra îmzekerdişê Peymana Lozanî do bi sernameyê ‘Seserre de Lozan: Muhasebe û Îmkan’ panelêk pê bîyaro. 30ê Temmuze de Şîşlî de Merkezê Kulturî yê Nazim Hîkmetî de do panel bi 2 roniştişan pê bêro û her hetî ra kesî do tewrê panelî bibê. 

 

Roniştiş û qiseykerdoxî 

 

Panel saet 10.30î de bi qiseykerdişê hemverfeka HDKyî Esengul Demîre do dest pêbikero. Roniştişê ‘Seserra Lozanî’ bi moderatoriya Nazli Buket Yaziciye do dest pêbikero. Siyasetmedar û mamosteyê tarîxî Mutlu Ozturk do bi sernameyê ‘Seserre de Lozan’, avûkat Emran Emekçî bi sernameyê ‘Seserra Lozanî de Kurd’, edîtorê AGOSî Pakrat Estukyan bi sernameyê ‘Seserra Lozanê de Kêmarî’, nuştox rojnameger Erdogan Aydinî zî do bi sernameyê ‘Lozan ra ver û badê ci' qiseykerdişan bikerê. 

 

Mabenê saet 14.00 û 17.30î de zî do roniştişê diyîne bi sernameyê ‘Îmkanê Ameyoxê Hempar’ pê bêro. Bi moderatorîya endama PMyî ya HDPyî Elî Bulute do roniştiş pê bêro. Siyasetmedar Baskin Oran do bi sernameyê ‘Derheqê Sevrê de, taybetîyê Lozan û hukmê derheqê kurd û armenîyan’, nuştox Rojda Yildize bi sernameyê ‘Derbasbîyayîşê Netew Dewlete: Lozan û Cinî’, nuştox Osman Tîftîkçîyî zî bi sernameyê ‘Dimayê seserranê diyîne de komarêk senî’ qisey bikerê. Panel do bi pers û cewaban peynî bibo.  

 

Hemverfeka Meclîsê Cinîyan a Stenbolî ya Partîya Demokratîke ya Şaran (HDP) Nazli Buket Yaziciya ke do roniştişê yewine de moderatorî bikera derheqê panelî de qisey kerd. 

 

Lozan û raştîya dewleta 100 seserrî  

 

Nazliye da zanayîş ke Lozan pêkerdişêk ke kodê pawitişê dewlete tede ameyî qiseykerdiş û ameyî îmzekerdiş o û vat: “Seserra 100ine ya Pêkerdişê Lozanî de seba ma çîyo muhîm raştîya dewletêka seserre ya. Fehmkerdişê înan kodan, ewro seba ma seba HDKyî muhîm o. Munaqaşakerdişê prosesê îmzekerdişê Lozanî zî muhîm o.” 

 

'Înkar û asîmîlasyon 100 serrî yo dewam keno’ 

 

Nazliye wina dewam kerd: “Asayîşê bîyayîşê şaran bi Lozanî reyde yeno dayîş. Dima ra maseya pêkerdişî newe ra yena awankerdiş û metnêk Îmzeyî yeno awankerdiş. Nê metnî de bîyayîşê armenî, rûm, suryanî û şaranê bînan keweno rojeve, seba kurdan eynî çî derbazdar nîyo. Kurdî raşte de yenê verdayîş. Seba ke vanê ‘kurd û tirkî yew ê’ û pêkerdişî îmze kenê. Nuqtaya ke şarê kurdî sahneya tarîxî ra bêro pakîkerdiş de na game muhîm yena dîyîş. Na nuqtaye de Pêkerdişê Lozanî seba ma nuqtaya ke ganî ma vera ci de têkoşîn bikerî de vindeno. Înkar û asîmîlasyon 100 serrî yo dewam keno.”  

 

Nazliye dewamê qiseykerdişê xo de dîyar kerd ke heme şar 100 serrî yo xover dano û nasnameyê xo paweno û vat: “No kultur averşîyayîşî domneno. HDK têkoşînê înan dewam keno û sey fikrîyatê kongreyî vejîya raşte. Seba cuyêka newe vejîyaye raşte. Coka ra no panelo ke ma pê anê zî xeylê muhîm o. Vera çîyê ke Lozan de ma rê ameyî ferzkerdiş de pîya eştişê game seba cuyêka newe muhîm a." 

 

Do cuyêka seyyewbînan bêra munaqaşakerdiş 

 

Nazliye tewr peynî ard ziwan ke yew nuqtaya bîn ke do bêro munaqaşakerdiş zî heqê Lozanî de ya û wina peynî kerd: “Zamîrê babete yanî şar uca de çinî bî. La panelo ke HDK do pê bîyaro de zamîrê babete şar û temsîlkarê şarî uca de yê û seba awankerdişê zemînê cuya seyyewbînane do munaqaşa bikerê. No seba ma muhîm o. Zemînê HDKyî de, seba ke heme şar bi cîyayeyanê xo vera asîmîlasyonî de têkoşîn bikero ma venga meclîsbîyayîşî kenê. Ma her kesî dawetê panelî kenê. Do pers û cewab bibî. Tewrbîyayîş do ma xurt bikero.”