AMED - Nuştoxe Gulazer Akina ke 28 serrî yo tepişte ya û xeylê nêweşîyê aye zî estê serbest nîna verdayîş. Kîtleya ke qirikê aye de esta vera êdî destê aye nêtepişenê û rewşa aye her ke şina tehluke bena. 

 

Zîndanê Kurdistan û Tirkîya de her roje tepişteyî raştê binpaykerdişê heqan yenê û rewşa înan zî roj bi roje giran bena. Muracatê keye û avûkatê tepişteyê nêweşî ke yenê kerdiş zî hetê Dezgehê Înfazî yê Zîndanî ra bê netîce yenê verdayîş. Eynî wext de seba tepişteyê nêweşî yê giranî bêrî tehlîyekerdiş muracatê ke Dezgehê Tibê Edlî (ATK) yenê kerdiş rê zî raporê ‘eşkena zîndan de bimana’ yenê dayîş û serbestverdayîşê înan yeno astengkerdiş. Tepişteyê ke zîndan de lîsteya tepişteyê nêweşî de ca gênê ra yew zî nuştoxe Gulazer Akine ya.  

 

Bi îşkenceyêk giran reyde rî bi rî manena 

 

Gulazer Akine 1975î de qezaya Xelatî ya Bedlîsî de mîyanê keyeyêk welatperwer de yena dinya. Hema emrê xo yê şenikîye de zextê dewlete reyde rî bi rî manena. Gulazer û keyeyê aye serra 1993yî de zextê dewlete vera koçê bajaranê sey Mêrsîn, Edene û Stenbolî kenê. Gulazere seba ke zextê serê keyeyê aye nêqedîyenê serra 1993yî de tewrê PKKyî bena. Gulazere wexto ke seba tedawî yena Stenbolî serra 1996î de yena destbendkerdiş. Gulazere tîya de 10 rojan destbendkerde manena û bi îşkenceyêk giran ê polîsan reyde rî bi rî manena. Gulazere bado ke yena Bedlîs uca de zî 20 rojan destbendkerde manena û uca de zî binê îşenceyêk giran de manena. Gulazere dima ra yena tepiştiş û cezaya muebbetî aye rê yena birnayîş.  Gulazera ke 28 serrî yo tepişte ya zîndanê sey Amed, Mîdyad, Anqara, Stenbol, Mereş-Elbîstan, Semsûr, Gebze de mend û nika zî Zîndanê Padaye yê Cinîyan ê Bunyanî yê Kayserîyî de yena tepiştiş.  

 

Xeylê nêweşîyê aye estê 

 

Gulazera ke xeylê zîndanan de cezaya dîsîplîn û hucreyî aye rê ameya birnayîş, nê prosesî mîyan de nêweşîyê aye zî giran bîyî. Gulazere verê ke bêra tepiştiş nêweşîyê sey ûr (kîtle), sîneyê aye de, nêweşîyê cinîyan û helîyayîşê esteyî aye de estbî. Gulazere wexto ke Semsûr de tepişte mend sereyê xo ra amelîyatê ûrî bî, Gebzeye de zî ûrê sîneyê xo vera amelîyat bî. Vera heme nêweşîyan zî zîndan de bi korona (Kovîd-19) kewena. Gulazere helîyayîşê esteyî vera roj bi roje zeyîf bena û keyeyê xo rê vata ke kîtleya qirikê xo vera nêeşkena çîyêk biqurtna. Rewşa kîtleya qirika aye ameya merheleyêka berz û nê semedî ra destê aye êdî nêtepişenê. 

 

‘Waya mi sey findî roj bi roje helîyena’ 

 

Waya Gulazere, Refîka Akine reyde wexto ke ma qisey kenê, dîyar kena ke Gulazere qet qiseykerdişanê xo yê keyeyê xo de qala nêweşîyanê xo nêkena. Refîkaye dîyar kerd ke rewşêka zaf xirab de ya, kîtleya qirika aye de resaya merheleyêka berz û nê semedî ra zî nêeşkena çîyêk biqurtna. Refîkaye da zanayîş ke her ke şinê pêvînayîş vînenê roj bi roje waya aye helîyena. Refîkaye ard ziwan ke waya aye bi vîrusê Kovîd-19î zî kewta la înan rê tu çîyêk nêameyo vatiş û wina vat: “Waya mi xo ra hîna zêde keyeyê xo fikirîyena. Coka ra ma rê zêde qala nêweşîyanê xo nêkena. La na reye rewşa aye zaf tehlukeyin bî. Coka ra qala rewşa xo kerd.”