Nazlican Yildiz

 

ÎZMÎR - Cinîyê derheqê qirkerdişê daran ê Akbelen û Cudî de qisey kerdî, dîyar kerdî ke çîyê ke Cudî de yenê ciwîyayîş zêde reaksîyonan nêvînenê û vatî çîyê ke Akbelen û Cudî de yenê ciwîyayîş dûrê yewbînan nîyê.

 

Hemverê qirkerdişê Daristanê Akbelenî yê Îkizkoyê qezaya Mîlasî ya Mûglayî de seba komir bidê Santralê Termîkî yê Yenîkoyê Kemerkoyî yê girêdayê Holdîngê Limakî, xoverdayîş dewam keno. Heto bîn ra bahaneyê asayîşê herêma Besta û Cudî yê Şirnexî 8ê teşrîna verêne 220ine de qirkerdişê daran yê ke amebî destpêkerdiş hema rojeve de yo. Şewatê Cudî destpêkerdibi zî mudaxeleyê ci nêamebi kerdiş û no zî bibi sebebê reaksîyonan. Welatijê herême ke waştibî vernîya şewatî padê, amebî astengkerdiş.

 

Cinîyan dîyar kerdî ke Akbelen de bi amancê rantî şîrket yeno pawitiş û Cudî zî bi amancê ke herême bê merdimî bêrê verdayîş şewat û birnayîşê daran yeno kerdiş. Cinîyan vat, vengê seba Akbelenî vejêno, ganî seba Cudî zî bêro berzkerdiş.

 

‘Xoza yew a’

 

Meclîsê Cinîyan ê HDPyî yê Îzmîrî Mehtap Alîşan da zanayîş ke qirkerdişê daran yê Akbelenî Cudî de hetê îqtîdarî ra yeno kerdiş û vat: “Dewlete bi destê xo daristanî çin kena, dare çin kena. Xoza sey yewbînan nêvînena. No çî de ziwan nîjad û dînî ci çin o. Çira  Cudî de qirkerdişê dewlete esto, çira kes vera nê vengê xo berz nêkeno. Ma zî nê persî persenê. Tu ferqê Akbelen û Cudî çin o. Çi Akbelen de yeno kerdiş, Cudî de zî yeno kerdiş.”

 

‘Ganî Cudî zî bêro pawitiş’ 

 

Endama Meclîsê Partîye ya HDPyî Besriye Tekgure zî  da zanayîş ke no di serrî yo Koyê Cudîyî de qirkerdişê daran yeno ciwîyayîş û vat ke kişta Akbelenî de ganî Cudî bêro pawitiş û wina dewam kerd: “Ganî ma xozaya xo bipawî. Ganî ma raşteyê cuye bipawî. No wezîfeyê dewlete yo la dewlete nêkena. Ganî şar wezîfe bigêro milê xo ser. Akbelene de seba ke gişta rantî esta dewlete şîrketan pawena. Hêrişê şarî kena. La Cudî wina nîyo. Cudî de wazena herême bê merdim bikera. Bi destê dewlete qirkerdiş yeno kerdiş. Şewat vejîyeno û nîno hewnakerdiş.” 

 

‘Sebeb polîtîkayê şerê taybetî yê'

 

Besrîye dewam de dîyar kerd ke qirkerdişê daran ê Cûdî, yeno manaya mudaxaleyê heqê cuya şarî kurdî û wina qedêna: “Amanc oyo ke herême bê merdim bêra verdayîş. No zî zilmêk bîn o. Dewlete serê şarê kurdî de polîtîkayê şerê taybetî kena. Ganî no wina bêro vînayîş. Ewro seba Akbelenî veng yeno vetiş, ganî seba Cûdî zî veng bêro berzkerdiş. Çi heyf wexto ke babete bena herêma kurdî zêde veng nînê vetiş. Ganî no bêro zanayîş.”

 

‘Tu cîyayîya mabêne înan de çin o’

 

Endama Heyetê Îdarekarîya ÎHDyî Vetha Aydin zî dîyar kerd ke bi serran o Kurdistan de daristanî yenê veşnayîş û wina vat: “Xoza yena talankerdiş. Xoverdayîşê Akbelenî zêde beno. La Cûdî bi serran o veşnayîşê daristanan dewam keno û ganî pêro hetê sosyalîst û demokratîkî hemverê nê de vengê xo berz bikerê. Ganî ma hemverê qirkerdişê daran, daristananê Cûdî zî vengê xo berz bikerê. Heysîyetê hemverê Akbelenî de ganî seba Cûdî zî bêro mojnayîş.”