AMED - Cinîyê ke Ben û Sen de ciwîyenê, bale antî serê polîtîkayê şerê taybetî û dîyar kerdî ê tenê aramî wazenê û wina vatî: "Êdî bes o, wa destê xo yê lêşin serê tutanê ma ra biancê.”

 

Kurdistan de no bi serran o bi destê dewleta tirke polîtîkayê şerê taybetî yenê rayraberdiş. Nê polîtîkayî herêm bi herême bêmabên dewam kenê.  Herêma ke na polîtîka yena rayraberdiş, yew zî ci ra 'Ben û Sen o'. Welatijê Ben û Senî bi taybetî dimayê şerê Sûrî bi destê dewlete keyeyê xo ra ameyî vetiş û yê ke mendî zî bi feqîrîyêk ke her ke şina xorîn bena rî bi rî manenê. Polîtîkayê şerê taybetî yê dewleta tirke bi rengêke lêşin, serê ciwanê Ben û Senî de bi vilakerdişê tiryakî zî yeno rayraberdiş. Cinîyê Ben û Sen de ciwîyenê, derheqê nê polîtîkayan de gerreyê xo kerdî. Sewbîna venga têkoşînê hempar hemverê nê polîtîkayan de kerdî.

 

'Ma şan de bi zerrîyêka rehet nêeşkenê rakewê'

 

Kiymet Ozgara ke qezaya Karazî de ameya dinya, dimayê zewacê xo ameya Ben û Sen û bi 33 serrî yo tîya de ciwîyena. Kiymete dîyar kerd ke wexto ke newe ameya Ben û Sen şahî û aramî bîya û wina vat: "Verê Ben û Sen zaf weş bî, qelebalix bi, dimayê şerê Sûrî xeylêk keyeyî ameyî xirakerdiş. Cîranê ma mecbûrî tîya ra vejîyayî û şî. Ma nika tenê mendê. Verê zî feqîrî estbî û ma xeylêk zehmetî ant, labelê reyna zî ma nêtersayîne û qet nêbo zî şewe bi zerrîyêke rehet ma rakewtêne. Nika wina nîyo. Ma tersenê.”

 

'Mîyanê ciwananê Ben û Senî de jehrî vila kenê’

 

Gozel Temircana ke 40 serrî yo Ben û Sen de ciwîyena û tornê aye tiryakî şuxulneno, dîyar kerd ke ciwanê Ben û Senî bi destê dewlete yenê jehrkerdiş. Gozele wina dewam kerd: " Kewtî mîyanê ma û na jehrî mîyanê ciwananê ma de vila kerdî. Wexto ke ez newe amebîya Ben û Sen çîyê winasî qet çinbî."

 

'Tiryakî bi hawayêk sîstematîk yenê vilakerdiş'

 

Zeynep Metîn zî ard ziwan ke Ben û Sen bi zaneyî bi feqîrîyêk pîl yeno verdayîş. Zeynebe da mojnayîş ke aye êdî Ben û Senî de xo û tutanê xo asayîş de hîs nêkena û wina vat: "Tu ça biewnê tiryaker estê. Ez tersena ke tutê xo bişirawî dikan. Seba ke ez nêzana rayîr de çîyêk xirab do bêro sereyê înan yan nê. No belayê tiryakî nişkave ra nêvejîya, sey bi hawayêk sîstematik yeno rayraberdiş. Seba ke dimayê şerê Sûrî vejîya werte.”

 

Şarê Ben û Senî bi feqîrîyêke xorîn reyde rî bi rî yê

 

Zeynebe da zanayîş ke tutê Ben û Senî kêmîyê werdî ancenê û no çî zî seba resnayîşê tutan astengîyêk pîl o. Zeynebe wina vat: "Mêrdeyê mi bazirgan o û dendikan roşeno. Reyan şuxulêno, reyan nêşuxulêno. 3 tutê mi estê. Ma nêeşkenê debara xo bikerê. Tutê min o tewr qij şino pêşdibistane û ez reyan nêeşkena tu çîyêk bikerî çanteyê ci ke dibistane de biwero. Welatijê Ben û Senî cêr û cor eynî rewşe de yê.”

 

Tenê cuyêke aram wazenê

 

Belkis Demîra ke 8 serrî yo Ben û Sen de ciwîyena wina vat: "Cayê ke keyeyê rijyayê, pêro bîyê herre û gemar û wexto ke şilî virazêna, pêro serê ma de rijîyena. Dimayê şerê Sûrî, Ben û Sen werte de nêmend. Çend rojî verê ez bi tutanê xo reyde vejîyaya teber, mîyanê ciwanan de şer vejîya û bi çekan dayî yewbînan ro. Ez mecbûrî reyna agêraya keye. Ma êdî nêeşkenê keyeyê xo ra vejîyê. Ciwanê ma verê wina nêbî. Nika kewtê na rewşe. Ma tîya cuyêka aram wazenê."

 

'Destê xo yê lêşin serê tutanê ma ra biancê’

 

Tulay Orak bale ant serê ekonomîye Ben û Senî û dîyar kerdî ke nêeşkenê debara xo bikerê. Tulaye wina ard ziwan : "Ka bêrê keyeyê ke ez ci de manena bivînê. Ez nêeşkena bivejî zî. Keyeyî zaf vay ê. Mar keweno keyeyê mi. Beno zimistan awe serê ma de herikîyena. Her roje her çî vaye benê. Ma nêeşkenê tutanê xo rê werd bigîrê û tutê ma wexto ke vejênê teber, zerrîya ma rehet nêbena. Tiryakî kerdî mîyanê tutanê ma. Êdî bes o, wa destê xo yê lêşin serê tutanê ma ra biancê.”