AMED - Wezîrê Perwedeyê Neteweyî Yusuf Tekînî dîyar kerdbî ke do mektebê tutanê kênayînan abibê. Şêwirmenda Komeleya Xebatê Tutan (ÇocukÇA) Necla Korkmaze da zanayîş ke ganî seba tutan polîtîkayê yewîye bêrê averberdiş. 

 

20 serrî yo esasê qerarê îqtîdar û îstîmlakî de sîstemê perwerdeyî yeno rayraberdiş û na reye zî perwerdeyê têmîyan rojeve de yo. Wezîrê Perwerdeyê Neteweyî (MEB) Yusuf Tekînî dîyar kerdbî ke zêdebîyayîşê peymeyê wendişê tutê kênayî do mektebê tutanê kênayînan abibê. Nê vatişan ra dima reaksîyonê vera zîhnîyetê nêseyyewbînanîya cînsîyetî vejîya raşte. 

 

Şêwirmenda Komeleya Xebatê Tutan (ÇocukÇA) Necla Korkmaze derheqê perwerdeyê têmîyanî ke munaqaşayî rê ameyo akerdiş de ercnayîş kerd. 

 

Sîstem kesê goreyê xo awan keno 

 

Neclaye ard ziwan ke îqtîdar sîstemê perwerdeyî goreyê stratejîyê xo şekil dano û wina vat: “Sîstem wexto ke dest bi prosesêk awankerdişî keno dezgehê perwerdeyî sere de hedef gêno. Tabî qet şik çin o ke bi kesê zanistî reyde munaqaşa nêkenê. Beno ke munaqaşa bikerê la bi kesê goreyê xo reyde munaqaşa kenê.” 

 

Rêxistinê dînî cepheyê vernî de yê 

 

Neclaye dewamê qiseykerdişê xo de da zanayîş ke ganî tu eleqeyê perwerdeyî bi pereyî reyde çinî bo, la nika perwerde bîyo raşteyê bazirganî. Neclaye wina dewam kerd: “Ma ewnîyenê raşteyê perwerdeyî, sektorêk taybet esto û no sektor dewamê sîstemê kapîtalîstî yo. Sey dezgehê ke raşteyê bazirganîye de xebatan rayra benê vejîyenê vernîya ma. Çîyêk bîn zî dezgehê dînî yo, tarîkat û cemaetî. Vernîya rêxistinkerdişê dînî abeno. Na babete de problem çin o, bi temamî xora zemînêk muhafazakar ê hukmatî esto.” 

 

Perwerdeyî de cayê feqîrîye  

 

Neclaye dîyar kerd ke feqîrî zî yew babeta ke tesîr serê perwerdeyî de keno ya û wina vat: “Feqîrî tesîrêk gird serê perwerdeyî de kena. Feqîrî her rewşe de binpaykerdiş, îstîsmarî awan kena. Keyeyêk feqîr seba ke payan ser de vindero mecburo tutanê xo perwerde ra dûrî bikero. Coka ra ganî heqê tutan bi temamî bêro dest girewtiş. Awenkerdişê rojevê sunî tehlukeyêk gird o.” 

 

Perwerdeyêk baş û raşt  

 

Neclaye qiseykerdişê xo yê peyênan de wina vat: “Sîstemêk perwerdeyîya raşt ganî zaf ziwanî bibo, ganî yew tîpî nêbo û ganî cipersayîş bibo. Ganî nizdîbîyayîşêk zanistî bibo. Wexto ke perwerde yeno plankerdiş ganî goreyê her emrî bibo û plan goreyê tutan bêro kerdiş. Polîtîkayêk baş ê tutan ganî bi xebatêk ke pedagog, zanistê têkilî û tewrbîyayîşê tutan bikewo cuye.”