MERKEZÊ XEBERAN - Unîversîteya Dîstrîta ya Bogotaye de Konferansê bi sernameyê “Heta Awankerdişê Komelêk Demokratîke weriştişê vera Kapîtalîzmî” ame viraştiş. Tecrube û rayîrê çareserîye yê Kurdistanî ameyî muhaqaşakerdiş.

 

Unîversîteya Dîstrîtaye ya paytextê Kolombîya Bogotaye de Konferansê bi sernameyê “Heta Awankerdişê Komelêk Demokratîke weriştişê vera Kapîtalîzmî” ke 28ê Temmuze de dest pêkerdbî dewam keno. 15 welatan ra 50 organîzasyon tewrê konferanso ke paradîgmaya Rayberê PKKyî Abdullah Ocalanî yê “Konfederalîzmê Demokratîk û Neteweyê Demokratîke” gêno dest, bîyî.

 

Roja diyîne ya konferansî de komê ke xebatê cîyayan kenî ameybî awankerdiş. Na kome bi taybetî serê sernameyê sey “Rayberîya Xoser”, “Ekolojî û herême”, “Ekonomî û herême”, “Cinî û azadîya cinîye”, “Munaqaşayê fikiran”, “Ciwan” û “Demokrasî û dewlet” de vinderte. Nê xebatan de ke dormeyê nê sernameyan de ame rayraberdiş, ame waştiş ke hetê hemparî yê têkoşînê cografyayê cîyayî bêrî dîyarkerdiş.

 

Maseya Cinîye de tecrubeyê cinîyê kurd ame munaqaşakerdiş

 

Xebatê maseya cinîye de, bi xerîtayêk bale ancîya ke her cinîyêk kam cû welatî ra ya. Xebata na maseye de têgêrayîşê cinîya Kurd tecrubeyanê xo pare kerd û bi pêşnîyarê Konfederalîzmê Cinîya Dinya munaqaşayî rê rayîr akerd. Koma xebate dima ra serê babeta bingeyîn ya ke vernîya têkoşînê cinîyan de bena asteng de vindert. Organîzasyonê Meksîka, Perû û Kolombîyaye bi organîzasyonêk cîya tewrê atolyeya cinîye bîyî.

 

Maseya Dewlet û Demokrasîye 

 

Meksîka, Kolombîya, El Salvador û Kurdistanî ra kesî tewrê maseya ke babeta dewlet û demokrasîye tede ame munaqaşakerdiş, bîyî. Munaqaşayan de stratejîyê têkoşînî yê vera netew dewletan ameyî destgirewtiş.

 

Maseya Ekonomîye

 

Organîzasyonê Brezîlya, Kanada û bi giranî Kolombiyayî beşdarê masaya ekonomîye bî.

 

Masaya Ekolojî

 

Şarê herême yê Kolombiyayî û Afro-Amerîkiyê ke tîya de têkoşînê nasnameyî danê, tewrê masaya ekolojî bî. Projeyê mega yê şîrketê ke herre talan kenê û şarê herême herra înan ra kenê, bî rojeva  bingehîn. Qalê hêrişê serê xozaya Kurdistanî zî ame kerdiş.

 

Masaya Ciwanan

 

Rêxistinê Kolombiyayî û rêxistinê ciwanan ê Perûyî tewrê masaya ciwanan bî. Danasayîşê ciwanan ame kerdiş. Tevgerê Ciwanê Kurdistanî zî na kome de tecrubeyê xo pare kerd

 

Masaya Îdarekarîya Xoser

 

Kolombiya de xeylêk îdarekarê organîzasyonî beşdarê na masa bî. Paragûay, DYE û Kurdistanî de tewrbîyayîş virazîya.

 

Dinyayêke senîn ame munaqeşekerdiş

 

Masayêke peyîn de zî ewnîyayîşê cîya ameyî munaqeşkerdiş. Beşdarwanî persê “Ma dinyayêke senîn, sîstemêk senîn xeyal kenê” reyde cewabê felsefî gêrayî.