ANQARA - Sarah Glyyna Temsîlkara Nobeda Daîmîye ya seba Abdullah Ocalanî da zanayîş ke tecrîd zalimtî yo û wina vat: "Ganî ma bi qaseyo ke bieşkê ra hîna zêde têgêrayîşê xo hîra bikerê. Ganî ma vera tecrîdî de têkoşînê xo gird bikerê.” 

 

"Kampanyaya seba Abdullah Ocalanî Azadî" ke merkezê ci Îngilistan o derheqê tecrîdê serê Rayberê PKKyî Abdullah Ocalanî de kişta Parlamentoya Ewropaye (AP) ya ke merkezê ci Brukselê Belçîkaye ya de 26ê Temmuze de kombîyayîşê çapemenîye ya lezkî daye. Kesê ke kampanyaye danê rayraberdiş dîyar kerdî ke Abdullah Ocalan 24 serrî yo hucre de yeno tepiştiş û derheqê ci de tu xeberêk nîna girewtiş  û na rewşe zî merdiman kena mîyanê fikaran. CPT derheqê zîyaretê Tirkîyaye de tu malumat nêda û no zî merdiman keno mîyanê fikaran. Tîya de venga eşkerakerdişê raporê CPTyî ame kerdiş. Eynî wext de kesê ke tewrê eşkerayî bîyî bale antî serê konfederalizmê demokratîke ya Rojhelatê Mîyanênî.   

 

Sarah Glyyne ya ke Temsîlkara Nobeda Daîmî ya seba Abdullah Ocalanî derheqê babete de qisey kerd. 

 

'Amacê ma no yo ke zext bi Tirkîya bêro kerdiş’ 

 

Sarahe da zanayîş ke aye destpêk de hetê medimîye ra ewnîyena tecrîdî û wina vat: “Tecrîdê serê Abdullah Ocalanî vera heme normê huqûqî de yo. Ez avûkat nîya la ez hetê merdimîye ra ewnîyena babete. Wexto ke ez hetê huqûqî ra ewnîyena ez vînena ke vera huqûqê merdimîye yê mîyannteweyî de yo. Ez na rewşe baş zana. No vera huqûqê Tirkîya yo zî. No tecrîdêk exlaqî nîyo û xidar o. No îşkence yo û eleqeya ci bi edaletî reyde çin a. Coka ra 26ê Temmuze de eşkerayîyêk da. Amacê ma no bî ke ma zext bi Parlamentoya Ewropaye û heme parlamenteran bikerê. Çike tay bo zî do merdim û dezgehî serê Tirkîya de zext bikerê. Hêvîya ma na babete de esta. Wexto ke ma ewnîyenê ci heta nika ma ser nêkewtî. Bi raştî zî zehmet o û bi serran o dewam keno.” 

 

'Ganî têgêrayîşêk girseyî bêro awankerdiş'  

 

 

Sarahe ard ziwan ke ganî têkoşînêk girseyî bêro awankerdiş û wina dewam kerd: “Xeylê dezgehî seba tecrîdî raybazê cîya cîyayî ceribna. Strasburgî de xeylê dezgeh û têgêrayîş estê la seba tecrîdî nêkewenê mîyanê têgêrayîşî. Komîteya Vernîgirewtişê Îşkenceyî CPT payîza serra verêne de ame zîyaretê Tirkîya. Ma hema zî hêvîya gelo zîyaretê Ocalanî kerdî ya nê de yê. Nê dezgehê ke newe ameyî awankerdiş ra nîyê û no dezgeh hetê endamê Konseyê Ewropaye ra ame awankerdiş. Seba ke peynîya heqê merdiman ra şêrê û her kesî goreyê huqûqê heqê merdiman têbigêro awan bîyî. Eke heqê merdiman, serdestîya huqûqî bi hawayêk fîîlî pê nêrê, nê dezgehan eşkenê birijnê. Çalakîyê ma seba awankerdişê zextî mird nêkenê. Çîyo ke ez wazena vaja awankerdişê zextî yê serê Tirkîya muhîm o la ganî têgêrayîşêk komî bêro awankerdiş. Îtalyaye ra zî merdim ameybî seba xebere bigîrê. Wexto ke fikrê Abdullah Ocalanbêrî munaqaşakerdiş no muhîm o. seba azadîya Abdullah Ocalan akerdişê dewaye û vilabîyayîşê fikrê ci muhîm o. Xeylê merdimî seba nê çîyî ameyî têkişt. Eşnawitişê nê çîyî merdiman cesaret keno.” 

 

'Abdullah Ocalan vera sîstemo ke ma çinî hesibneno alternatîfan pêşkêş keno'  

 

Sarahe dewamê qiseykerdişê xo de da zanayîş ke Abdullah Ocalan vera sîstemo ke ma çinî hesibneno alternatîfan pêşkêş keno û coka ra zî yeno tecrîdkerdiş û wina vat: “Bêvengîya dezgehê mîyanneteweyî seba menfîet û sîyasetê dihetin a. No polîtîka yo. No sîyasetê di hetin seba ke asan bibo pê yenê. Sebebê ci yê ekonomîye estê. Sebebê ci yê stratejîk estê. Tîya de eynî wext de ma qala merdimê ke sîstemê kapîtalîzmî pawenê kenê. CPT keweno zîndanê ke kes nêeşkeno bikewo tede la raporê ke amade keno bi welatê ke înan rexne kenê reyde pare nêkeno. Heto bîn de bi destûrê înan welatan encax eşkeno nê raporî pare bikero. "  

 

'Vetişê PKKyî ya lîsteya terorî ra xeylê muhîm o’ 

 

Sarahe qiseykerdişê xo yê peyênan de vat ke eslê xo de çareserîya meseleya kurd zaf asan o û vat: “Vetişê PKKyî ya lîsteya terorî ra xeylê muhîm o. Çike merdim vanê erê ‘terorîst o’ û munaqaşayan gêno. Ê terorîst nîyê. Bîyayîşê PKKyî yê lîsteya terorî de qerarêk sîyasî yo. No tecrîdî ser de zî tesîr virazeno. Seba tecrîd û çareserîye do vengê ma dewam bikerê. Do hîna zêde zextê ma dewam bikerê. No rih tesilî badê kombîyayîşî ame hêzkerdiş. Ameyîşê têhetî yê merdiman hetê cîya ra bi raştî çîyêk baş bî. Coka ra seba ke na babete rojeve de bimana ma do bi merdimê welatê cîyayan reyde qisey bikerê. Ganî ma bi qaseyo ke bieşkî ra hîna zêde têgêrayîşê xo hîra bikerê. Ganî ma vera tecîrdî de têkoşînê xo gird bikerê.”