ŞIRNEX - Serekê Ocaxê Têgêrayîşê Taybet ê Bajarî Îbrahîm Barkinî Sakîne Kulture qetil kerdbî û dewa ci rê ameybî akerdiş. Bi waştişê dozgerî, mehkema qerar da ke roniştişê bîn de lajê Sakîne, Mehmet Kulturî bêro goşdarîkerdiş. 

 

Serekê Ocaxê Têgêrayîşê Taybet ê Bajarî Îbrahîm Barkinî 13ê gulana 2022yî de cinîya bi nameyê Sakîne Kulture qezaya Silopî ya Şirnexî de qetil kerdbî û dewa ci rê ameybî akerdiş. Kiştişê Sakîneye vera bi sebebê ‘Bi plankerde kiştiş û bi ezîyet kiştiş’ ra derheqê  Îbrahîmî de dewa ameybî akerdiş. 4ine roniştişê dewaye 2ine Mehkemaya Cezaya Girane ya Şirnexî de ame dîyîş. Avûkatê Komîsyonê Cinî û Tutan ê Baroyê Şirnexî û yê Wezîrîya Polîtîkayê Keye û Xizmetê Komelî tewrê roniştişî bîyî. Kiştox Îbrahîm Barkinî zî zîndano ke tede yeno tepiştiş ra bi rayîrê Sîstemê Veng û Dîmenî (SEGBÎS) tewrê roniştişî bî. 

 

Do lajê Sakîneye bêro goşdarîkerdiş 

 

Avûkatê Wezîrîya Polîtîkayê Keye û Xizmetê Komelî û Komîsyonê Cinî û Tutan ê Baroyê Şirnexî waştî ke rewşa tepiştişî ya kiştoxî dewam bikera. Heto bîn de dozgerî waşt ke roniştişê bîn de lajê Sakîne Kultur, Mehmet Kulturî bêro goşdarîkerdiş. 

 

Kiştox waşt tehlîye bibo  

 

Kiştox Îbrahîm Barkinî zî vera mutalaaya dozgerîye pawitişê xo yê verê cû dibare kerd û waşt ke bêro tehlîyekerdiş.   

 

Roniştiş taloqê 5ê Teşrîna Verêne ame kerdiş 

 

Heyetê mehkema qerar da ke rewşa tepiştişî ya kiştoxî dewam bikera, roniştişê bîn de Mehmet Kulturî bêro goşdarîkerdiş û roniştiş taloqê 5ê Teşrîna Verêne kerd.