AMED - Sereka Koperatîfê Cinîyan a Şîmelî, Şîmel Begîke da zanayîş ke ke semedê paştîdayîşê problemê ke cinîye hetê ekonomîye de ciwîyenê tîya ameyo awankerdiş û vat ke keda cinîyan do tîya de bêra dîyîş. 

 

Welat de krîzê ekonomîye her ke şino giran beno û kesê ke tewr zêde nê prosesî ra tesîr benê zî cinî yê. Cinî bi paştîdayîşî hewl danê problemê feqîrîye şenik bikerê. Nê raşteyan ra yew zî koperatîf ê. Koperatîfê Cinîyan a Şîmelî di aşmî verê cû Amed de ame awankerdiş. Komele semedo ke keda cinîye bêra dîyîş, semedo ke cinîyan rê raşteyê îstîhdamî bêro awankerdiş, ame awankerdiş. 

 

Sereka Koperatîfê Cinîyan a Şîmelî, Şîmel Begîke qala amacê awankerdişê koperatîfî kerd. 

 

Hîna zêde îstîhdamê cinîye amacê înan o 

 

Şîmele cayê cinîye yê komelî de rexne kerd û vat ke cinî yena sînorkerdiş û wina vat: “Cinîye her tim planê peynî de ya. Heq seba cinîyan nîno dayîş û yenê astengkerdiş. Bi nê astengkerdişî reyde cinî nêeşkena xo bimojna. Bi amacê girdkerdişê îstîhdamî cinîye, mi koperatîf akerd. Nika ma koperatîfan ewnîyenê, ganî her yew 7-8 endamê ci bibê. Ganî înan ra tewr zêde 6 hebî cinî bê. No seba cinîyan îmkanêk gird o.” 

 

‘Wazena cinîyan rê biba hetkar’ 

 

 

Şîmele da zanayîş ke semedo ke cinî keye de berardiş bikerê, semedê cinîyê ke nêeşkenê bazarê xo awan bikerê, semedo ke koperatîf bibo hetkar, ma no koperatîfî awan kerd û wina dewam kerd: “5 serrî yo Unîversîteya Dîcleyî de werdê herêmî virazena, berardişê xozayî kena. No 5 serran de mi bi cinîyan reyde xebate rayra berd û mi qerar da ke ma şêrê koperatîf. Nika 8 cinî nê koperatîfî de yê. Amacê ma no yo ke ma seba cinîyan îstîhdam awan bikerê. Ma her endamêk koperatîfî wazenê sey koperatîfêk gird bikerê. Ma 8 kesî dest pêkerd û amacê ma tena 8 kesî reyde kar nîyo. Ma wazenê xo biresnê hîna zêde cinîyan.” 

 

‘Heme çîyê tîya ma virazenê’ 

 

 

Şîmele dewamê qiseykerdişê xo de dîyar kerd ke heme çîyê koperatîfî ê virazenê û domna: “Mi bi cinîyê dormeyê xo reyde koperatîf awan kerd. Ma bi berardişanê xo ra areyî danê. Cayê ma Pirdê Desberin o. Ma cayêk turîstîk de koperatîf akerd û amacê ma antişê turîstan o û werdê herêmî yê Amedî naskerdiş o. Cinîyan de azadîya ekonomîye çin a. Koperatîf seba cinîyan zaf muhîm o. Cinîyê ke azadîya ekonomîye ya înan esta hetê camêrdan ra yenê astengkerdiş. Cinîyê ke koperatîf de ca gênê problemê înan yê ekonomîye yê cidî estê. Ma wazenê seba înan bibê hetkar.” 

 

‘Do heqê keda xo bigîrê’ 

 

Şîmele qiseykerdişê xo yê peyênan de bale ant keda cinîyan ke nîna dîyîş ser û vat: “Keda cinîye nîna dîyîş. Do keda cinîye bi koperatîfan bêra dîyîş. Cinî berardoxkar a. qet veng nêmanena. Ganî cinî payanê xo ser de vinderê. La cinî her tim çinî yena hesibnayîş. Wa cinîyî qet nêtersê. Eke îmkanê înan bibo wa payanê xo ser de vinderê.”