Elfazî Toral

 

STENBOL- Şukran Afşare ya ke zîndanê Bakirkoyî de yena tepiştiş û 15 serrî ya tepiştişê xo de teşîsê şîzofrenî aye rê ame ronayîş, her çend ke nêweşîya aye giran biba zî ne yena dermankerdiş û ne zî serbest yena tehlîyekerdiş 

 

Rayberê PKKyî Abdullah Ocalan 24 serrî yo girava Îmraliyî de binê tecrîdêk giran de yo 29 aşmî yo ke ci ra tu xeberêk nîna girewtiş. Polîtîkaya tecrîdî ke serê Abdullah Ocalanî de yena rayraberdiş heme tepişteyan ser de tesîr viraşto. Zîndanê Tirkîya û Kurdistanî de serê tepişteyê nêweşî de polîtîkayê tecrîdî pê yenê û bi bahaneyê kêfî tehlîyeya tepişteyan yeno astengkerdiş. Xeylê tepişteyê nêweşî yê verê mergî ke yenê tehlîyekerdiş badê serbestverdayîşî dinyaya xo bedilnenê. Heto bîn de tepişteyê nêweşî yê giran bi raporê ATKyî yê sey ‘eşkeno tepişte bimano’ ke dîyeno terkê mergî yenê kerdiş. 

 

Hîrê aşman de 968 binpaykerdişê heqan ameyî ciwîyayîş 

 

Komîsyonê Zîndanan ê Komeleya Heqanê Merdiman (ÎHD) ya Stenbolî rojanê verênan de derheqê muracatê zîndanan yê herêma Marmara û zîndanê herêmê bîn îke ameyî tesdîqkerdiş de raporêk hîrê aşman ê bi nameyê ‘Raporê binpaykerdişê heqan ê zîndanê herêma Marmaraye’ eşkera kerd. Goreyê raporê aşma nîsan, Gulan û Hezîrane ya 2023yî de bi temamî 11 zîndanan de 30 muracatî ameyî kerdiş. Rapor de ame vatiş ke derheqê binpaykerdişê heqan de aşma nîsane de 12, aşma Gulane de 9, aşma hezîrane de 9 muracatî ameyî kerdiş. 30 muracatî ra 24ê ci camêrd û 6ê ci zî cinîyan ra pê yeno. 27 zî tepişteyê sîyasî bî. Aşma nîsane de 298, aşma Gulane de 186, aşma hezîrane de zî 242 bi temamî 726 binpaykerdişê heqan ameyî ciwîyayîş. Heto bîn de zî 242 heb zî rayîrê çapemenîye ameyî qeydkerdiş. Bi temamî hîrê aşman de 968 binpaykerdişê heqan ameyî ciwîyayîş. 

 

Şukran Afşare mîyanê lîsteya tepişteyê nêweşî yê giran yê Herêma Marmaraye ya ÎHDyî de ca gêna. Şukrane serra 1977î de dewa Hevîya Kurdî ya qezaya Bismilî ya Amedî de ameya dinya. Şukrane mîyanê keyeyêk 10 waye û birayî de ameya dinya. Şukrane serra 2008î de Mersîn de yena tepiştiş. 36 serrî ceza aye rê yena birnayîş. Aye erşawenê zîndanê Sîlîfkeyî. Xeylê zext û tecrîdî reyde rî bi rî manena. Uca ra surgunê zîndanê Karataşî yê Edeneye yena kerdiş. Dima ra surgunê zîndanê Tarsus, Sêrt, Îzmîrî zî yena kerdiş. 5 serrî yo zî surgunê zîndanê Cinîyan ê Bakirkoyî ameye kerdiş. Ewja de teşîsê şîzofrenî aye rê ame ronayîş. Şukrana ke nêweşîya aye ya giran a psîkolojîk esta, ganî goreyê raybazan bêra dermankerdiş. La çi heyfo ke nêeşkena xo biresna heqê weşîye. Rewşa aye zî her ke şina giran bena. 

 

Waya aye Rukîye Afşare derheqê nêweşî û têkoşînê Şukrane de JINNEWSî rê qisey kerd. 

 

Xoza û têkoşînî ra hes kena  

 

Rukîyeye da zanayîş ke Şukrane qet neheqî qebul nêkerda û cinîyêke zaf dirust a û vat: “Tutan, cinîyan û cuye ra zaf hes kerdêne. Şukrane her tim têkoşer bi. Şukrane xoza ra zaf hes kerdêne. Herr û nebatan ra zaf hes kerdêne. Dayîk û embazanê xo ra zaf hes kerdêne. Ez şina zîyaretê aye, mi ra tena fotografê xozaye wazena. Embazê aye yê zîndanî zaf aye ra hes kenê. Berpirsîyarî gêna milê xo ser û têkoşîn dana.” 

 

Wa heme tepişteyê nêweşî serbest bêrê verdayîş 

 

Rukîyeye dîyar kerd ke nêweşîya waya aye her ke şina giran bena û nîna dermankerdiş û wina qiseykerdişê xo peynî kerd: “Şukrane eynî wext de mîdeya xo ra zaf nêweş a. her tim ceza danê waya mi Şukrane. Xeylê reyan cezaya hucreyî dîyena aye. Ganî ma wayîrê tepişteyê nêweşî bivejî. Ganî tepişteyê nêweşî bi lez serbest bêrî verdayîş. Waya mi nêweş a û ganî serbest bêra verdayîş. Ganî peynîya nê tecrîdî bêro. Ganî heme tepişteyê nêweşî bêrî dermankerdiş û tehlîyekerdiş.” 

 

Rukîyeye ard ziwan ke dayîka înan Raîfe nêweş a û erd de ya û vat ke yewine waştişê dayîka aye dîyîşê Şukrane yo û aye nêwazena çimê dayîka aye akerde şêro.