AMED - Rayberê PKKyî Abdullah Ocalan ke binê tecrîdê giran de yo, 29 aşmî yo tu agahî ci ra nîna girewtiş. Pinar Sakik Tekîn ke derheqê tecrîdî de qisey kerde, dîyar kerd ke Abdullah Ocalan rayîrêk hîrêne pêşkêşê dinya keno.

 

Rayberê PKKyî Abdullah Ocalan ke 15ê Sibata 1999ine de Îmraliyî de tepişte yo, 29 aşmî yo agahî Abdullah Ocalan û tepişteyanê bînan ê verê ci de yê; Hamîlî Yildirim, Omer Hayrî Konar û Veysî Aktaş nîna girewtiş. Pêvînayîşê avûkatan tewr peyîn 7ê Tebaxa 2019ine de pê ame û pêro muracatê avûkatan yeno redkerdiş. Keyeyî zî tewr peyîn 25ê Adara 2021ine de pêvînayîşêk telefonî kerdibî. Verfeka Partîya Çep a Keske ya Amedî Pinar Sakik Tekîn derheqê tecrîdê giran de qisey kerd û da zanayîş ke tecrîd şexsê Abdullah Ocalanî de serê pêro şarê kurdî de pê yeno.

 

‘Tecrîd Tirkîya de metodêk îdarekerdişî yo'

 

Pinare dîyar kerd ke tecrîd Tirkîya de metodêk îdarekarî yo û polîtîkayêke yo û wina vat: "1999ine de Abdullah Ocalan ardî Tirkîya û tecrîd sîstematîk zî dayî destpêkerdiş. Bi ardişê Abdullah Ocalanî reyde Îmraliyî de sîstemêk newe ame awankerdiş. Zîndan ardî rewşêka ke yew kes eşkeno ci de bimano."

 

‘Heqîqetêk yeno tecrîdkerdiş'

 

Pinare dewam de ard ziwan ke tecrîd zafhetî yeno rayraberdiş û wina vat: "Ma eşkenê serê keyeyanê kurdan ê ke Kurdistan ra ameyê surgunkerdiş ramojnê. Seba tecrîdê serê Birêz Ocalanî bêro fêmkerdiş, ganî ma babetê ke temsîl kenê, biewnê. Pêro şarî nêvînaye yenê û çin hesibnenê. Abdullah Ocalan rayberê serewedaritişê hemverê nê de yo. Seba nê wazenê, şaran çin bikerê. Wazenê heqîqet tecrîd bikerê.”

 

‘Rojeva tepişteyê nêweşan zî girêdayeyê tecrîdî yo'

 

Pinare bale ant serê tepişteyanê nêweşan û wina vat: “Tecrîdê serê  Abdullah Ocalanî tesîr serê pêro tepişteyanê sîyasî û komelî de keno.  Sere de cinî û ciwanî bi tesîr benê. Tepiştişê keyfî yenê kerdiş. Tepişteyê nêweşî bi hawayêkê keyfî  terkê mergî kenê. Înfazê tepişteyan yeno veşnayîş. Tecrîdê serê Abdullah Ocalanî tesîrêk pîl serê cinîyan de zî keno. Feshkerdişê Peymana Stenbolî, munaqeşeyê nefeqeyî, qerarê tedbîrî yê seba cinîyan nînê girewtiş û xeylê çî bînî. Hêrişê serê aktîvîstanê TJAyî û siyasetmedarê cinî. Nê pêro girêdayeyê tecrîdî yê.”

 

‘Abdullah Ocalan rayîrêk hîrêne pêşkêşê dinya keno'

 

Pinare amancê tecrîdê girankerde bi nê vatişan ercna: "Komare kewena seserra diyîne. Abdullah Ocalan ke paradîgmaya neteweyê demokratîke awan kerd û mimarê no yo, rayîrêk hîrêne pêşkêşê dinya kerd. La sîstem nê qebûl nêkeno. Seba na paradîgma vernîya dewamkerdişê rejîmê zextwerd gêna. Seba nê zî Birêz Ocalan yeno tecrîdkerdiş. Tecrîdê serê Ocalanî, tecrîdo tewr giran tarîxê dinyaye yo. 29 aşmî yo agahî birêz Ocalanî û tepişteyê bînî yê verê ey de çin a. Oyo ke serê Abdullah Ocalan û şarê kurdî de pê yeno huqûqê xususî yo."

 

‘Ma do aştîya komelî awan bikerê'

 

Pinare tewr peyîn qiseykerdişê xo de derheqê têkoşînê ke hemverê tecrîdî de tecrîdî de bidê wina vat: "Seba problemê komelî pêşnîyazê çareserî û polîtîkayê ma estê. Sere de problemê kurdî, seba pêro nasname, koman, waştişê heqî, cinîyan, ciwanan pêşnîyazê ma yê çareserî estê. Ma do rolê Birêz Ocalan ê komelî de qal bikerê. Ma  Partîya Çep a Keske şinê kongre. Ma do bi qerarê kongre tecrîdê serê Birêz Ocalanî îfşa bikerê. Ma do awankerdişê aştîya komelî pê bîyarê. Problemê komelî bi komelbîyayîşî eşkeno bêro çareserkerdiş."