RIHA - Eynî keyeyî ra 30 kesan qezaya Pirsûsî de hêrişê dikanêk kerdî. Netîceyê hêrişî de esnaf Mûstafa Subaşi û cinîya ci û 4 tutê înan ameyî birîndarkerdiş. 

 

Hemverê dikanê esnafê bi nameyê Mûstafa Subaşi ke serê Kuçeyê 11ê Nîsane ya Taxa Sarayalti ya Pirsûsî yê Rihayî de yo hêriş ame kerdiş. Netîceyê hêrişî de yew ci ra giran, bi pêroyî 6 kesî birîndar bî. Goreyê îdiayî; şerê mabêne tutan de dest pêkerdo û dima ra gird bîyo û keyeyan zî şer kerdo. Keyeyê Dîrîkî ra nêzdîyê 30 kesî hêrişê dikanê Mûstafa Subaşi kerdî. Şer de kardî û asinî ameyî şuxulnayîş. Netîceyê hêrişî de Mûstafa Subaşi bi giranî birîndar bi, di lajê ci, kênaya ey û cinîya ey zî birîndar bî. 

 

Dimayê mudaxileyê ewilî birîndar bi ambulansan wedarnayî Nêweşxaneyê Dewlete ya Pirsûsî. Pêwa ke dîmenê hêrişî estbî zî heta nika tu kes nêameyo destbendkerdiş. Ame zanayîş ke awanîya emniyetê qeza 300 metre dûrê cayê hedîse ya la heta hêriş peynî nêbîyo, polîsî nêameyê cayê hedîse.

 

Keyeyê Subaşi, bi rayîrê avûkatanê xo Serdozgerîya Komare ya Pirsûsî rê gerreyê endamê keyeyê Dîrîkî kerdî.