MERKEZÊ XEBERAN - Dîwanê Edebîyatî komxebatêk edebîyatî seba cinîyê ciwane da destpêkerdiş. 11 cinîyê ciwanê kurd û erebî komxebate de ca gênê û musenê nuştoxîye. 

 

Her serrre Dîwanê Edebîyatî yê Bakur û Rojhelatê Sûrîyeye ‘Hewteyê Hunerî’ pê ano. Hewteyê hunerî yê serra 2022yî de hetê nuştoxê hadre ra qerarê caardişê ‘Komxebata Gurkerdişê Eserê Edebîyatî yê Cinîyê Ciwan’ amebî dayîş. 

 

Emserr 15ê Tebaxe de komxebata ke bi tewrbîyayîşê 11 cinîyê ke kurd û erebanê herêma Cizîrî ra pê ameyêne, dest pêkerd. Hewte de di reyan cinîyê ciwan Qamişlo de arê benî û hetê mamsoteyê pisporî ra musenê huner û şeklê nuştişî. 

 

Verfeka Dîwanê Edebîyatî yê Bakur û Rojhelatê Sûrîye Narîman Evdikê ajansê ANHA rê qisey kerd û da zanayîş ke seba paştîdayîşê cinîyê ciwanî yê ke wazenê derbasê raşteyê nuştişî bibî, na komxebate dayî destpêkerdiş û wina vat: “Dersî bi kurdî û erebî yê. Ma waşt şert û mercê nuştişî bi zelalî bi înan reyde pare bikerê.” 

 

Sewbîna kişta Dîwanê Edebîyatî yê Bakur û Rojhelatê Sûrîyeye de nuştiş û kitabê cinîyan bi hawayêk cîya yenê ercnayîş. Narîman Evdikê derheqê babete de vat: “Seba ke hîssê cinîyan ê nazik o, kalemê înan zî cîya yo; tewr zêde zî no edebîyat de vejîyeno raşte."