Rozerîn Gultekîn

 

STENBOL - Rumeysa Bozkurte derheqê kampanyaya "Hemverê şerê taybetî têkoşînêk bi heybet" ê hetê Meclîsa Ciwanan ê Partîya Çep a Keske ra ameyo destpêkerdiş de qisey kerd û vat ke ê do taxan de hemverê tiryakî do panel, şahî, pîknîk, tûrnûvayan organîze bikerê û taxan de hemverê tîryakî nobete bigîrê. 

 

Meclîsê Ciwanan ê Partîya Çep a Keske 5ê Tebaxe de bi sloganê “Hemverê şerê taybetî têkoşînêk bi heybet” kampanyayêke newe da destpêkerdiş. Endama Meclîsê Ciwanan ê Partiya Çep a Keske Rumeysa Bozkurt, derheqê amancê kampanyaya hemverê polîtîkayê şerê taybetî yê hukmatî û tecrîdê serê Rayberê PKKyî Abdullah Ocalanî ke pêro raşteyê cuye de pê yeno, ercnayîş kerd.

 

'Amancê ma eşkerakerdişê şerê taybetî yo’

 

Rumeysa bale ant serê amancê destpêkerdişê hemleyê "Hemverê şerê taybetî têkoşînêk bi heybet" û vat ke seba eşkerakerdişê hîrayê hêrişî û hîrakerdişê têkoşînê xo dest bi kampanya kerdê. Rûmeysa wina vat: “Ewro ma vînenê ke şero tewr pîl serê şarê kurdî de yeno kerdiş, şerê taybet o. Seba vindarnayîşê polîtîkayê şerê taybetî ma kampanyayêke da destpêkerdiş. Amancê ma yê sereyîn eşkerakerdişê şerê taybetî yo. Sewbîna ma vînenê ke na kampanya seba ciwanê ke ma înan reyde ameyê têhet ma pîya girêdayeyê, heyecan û cigêrayîşêk newe dayê destpêkerdiş. Bi rastî zî ewro ciwanî paweyê ke kampanyayêke wina bêra destpêkerdiş. Şahîyê ke ma organîze kenê, hêvîyêke newe danê embazê ma yê ke ma înan reyde têkilî de yê."

 

‘Komel ano merheleya qirkerdişî’ 

 

Rumeysaye bale ant serê nê çîyî ke amacê polîtîkayê şerê taybet ke çarçeweya tecrîdî de yeno rayraberdiş ke şar nasnameyê xo ra dûrî bikero û seba menfîetê xo bişuxilno û wina vat: “Hukmat wazeno ke ma kulturê xo bi temamî xo vîra bikerê. Nê zî polîtîkayê şerê taybetî yê. Amac keno ke kultur, ziwan û ercê bîyaye yê ferd û komelî nêvînayîşî ra bêro û komelî de bêberpirsîyarî awan bikero. Rejîmê faşîst ê AKP-MHPyî heme polîtîkayê xo yê lêşinî serê cinî û ciwanan de rayra beno. Polîtîkayê şerê taybetî binê nameyê azadîya yewkesîye de, bi qetilkerdişê cinîyan, bi pelçiqnayîş, tepiştiş, ajanî vera komelî de yeno rayraberdiş. Wexto ke merdim ewnîyeno sîstemî, zîhnîyetê kamî beno, kerdişê înan zî xizmetê ci keno. O wext seba xizmetê komel û şarê xo lazim o ma zîhnîyet û hêzê fikrî yê raşt û mird dest bifînê. Dewlete bi caaerdişê şerê taybetî komelî vila kena. Mekteban awan kena, leşkeran perwerde kena û ciwan, cinîyê ciwanî ancena mîyanê tiryak û fuhûşî û zîhnîyetê xo ma ser de ferz kena. Her çîyo ke aîdê ma yo çinî kena û komelî ana merheleya qirkerdişî.”

 

'Weçînitişê cinî û ciwanan tesaduf nîyo' 

 

Rumeysaye ard ziwan ke tesaduf nîyo ke cinî û ciwanî sey hedef ameyî mojnayîş û vat ke sîstemê kapîtalîst ê bîyaye cinîyan ra terseno. Rumeysaye wina vat: “Sîstem terseno ke wexto ke cinî nasnameyê xo nas bikera û se bikera. Ma nê Şorişê Cinîye yê Rojawan û çalakîya Jîna Mahsa Emînîye ra zanê. Ma cinîyê ciwan sey serkêşê na kampanyaye ewro reyna benê şahid ke cigêrayîşê ma ganî yê Zîlanan û Semayan bo. Xora cinîya ke nasnameyê cînsîyetî nas bikera, tehlukeyê tewr gird ê sîstemî ya. Çike cinî organîzator ê û komînal ê." 

 

Ganî ciwan se bikerê?

 

Rumeysaye derheqê ciwanê ke ganî hemverê polîtîkaya şerê taybetî de bêrî rêxistinkerdiş de zî vat: “Yewine nimuneyê şexsîyetî ke ganî ciwan awan bikerê, Rayberê şarê kurdî Abdullah Ocalan o. nizdîbîyayîşê Rayberê şarê kurdî Abdullah Ocalanî de rijnayîşê faşîzmî û newera awankerdişê komelî esto. Ma zanê ke hemverê hêzêk ke xo birêxistin bikera û xo newera newe bikera de mumkun nîyo ke kesêk bibo asteng. Yanî bîyayîşê lehengîyêk tena sereyê xo ercêk o.” 

 

Atolye, panel, şahî, nobeda vera tiryakî 

 

Rumeysaye peynîya qiseykerdişê xo de qala xebata ke do çarçeweya kampanyaye de pê bîyarê kerd û wina qedênaye: “Ma do taxan de vera tiryakî, vera polîtîkaya şerê taybetî ke hetê sîstemî ra yena awankerdiş, atolyeyê şerê taybet, panel, şahî, pîknîk, turnuva û nobede vera caardişê AKP -MHPyî de bigîrê.”