Qeder Kar

 

MEXMÛR - Mamoste Nûjîn Kara derheqê rêzeçalakî û xebatê seba azadîya fîzîkî ya Rayberê PKKyî Abdullah Ocalanî yê Wargehê Mexmûrî dîyar kerd ke Abdullah Ocalan îradeyê şarê kurdî yo û wina vat: “Seba azadîya fîzîkî ya Rayber Apo ma do xebatanê xo dewam bikerê. Ma wayîrê îradeyê xo vejîyê.”

 

Wargehê Şehîd Rustem Cûdî (Mexmûr) rêzeçalakîyê seba azadîya fîzîkî ya Rayberê PKKyî Abdullah Ocalanî dewam kenê. Cinî rayberîya nê çalakîyan kenê û bi hawayêkê çalak tewr benê. Mamoste Nûjîn Kara ke bi hawayêkê çalak tewrê çalakîya seba azadîya Rayberê PKKyî Abdullah Ocalan bena, derheqê babete de wina ercna: “Hemverê nê de bi çalakîyê xo yê sey rayîr ra şîyayîş, semîner, nobet û sewbîna ma hewl danê Rayber Apo bireso azadîya xo ya fîzîkî. Ma bi nê rengî hewl danê vengêk vejê û xo biresnê Rayberê xo.”

 

‘Şarê kurdî Rayber Apo sey îradeyê xo vîneno’

 

Nûjîne da zanayîş ke şarê kurdî Rayberê PKKyî Abdullah Ocalanî sey îradeyê xo vîneno û wina vat:“Sebebê rêzeçalakîyê ma tecrîdê serê Rayber Apo yo. Ma wazenê Rayber Apo bi hawayêkê fîzîkî bireso azadîya xo. Coka zî ma çalakîyan organîze kenê. Seba no zî di serran zêdeyêr o bi tu hawayî agahî Rayberê ma ra nîna girewtiş. Pêvînayîşê bi ey reyde  hem keyeyî reyde, hem zî avûkatan reyde yeno  qedexekerdiş û astengkerdiş. No zî bêşik mabêne kurdan de rewşêke bi endîşe vejeno werte. Mîyanê şarê kurdî de no sebebêk xeylêk pîl o. Çike şarê kurdî Rayber Apo seke îradeyê xo vîneno.” 

 

‘Wayîrvejîyayîşêk fikrê Rayber Apo esto’

 

Nûjîne dîyar kerd ke Abdullah Ocalan eşkeno prosesî rê bibo cewab û wina vat: “Dewleta tirk a faşîste zî nê çî baş zana. Wazena şarê kurdî îradeyê xo ra bivisna. Sewbîna bê îrade verda. Çike fikrê Rayberê Şarê Kurdî bi kurdan sînordar nêmaneno. Rojhelatê Mîyanên û dinya de veng dano. Wayîrvejîyayîşêk  fikrê Rayber Apo esto. Dewleta tirke zî nê çî vînena.  Zana ke muxatabê çareserkerdişê problemê kurdî zî Rayber Apo yo. Zanê oyo ke eşkeno nê prosesî rê bibo cewab Rayber Apo yo. Serê nê esasan dewleta tirke hêrişê xo yê tewr bi şîdet hem şarê kurdî rê hem zî Rayber Apo kena.” 

 

Qanûnê mîyandewletî yenê binpaykerdiş

 

Nûjîne bale ant serê qanûnê mîyandewletî û wina vat: “Rayaumumî ya mîyanneteweyî seba berjewendîyê xo yê bi dewleta tirke reyde bêveng manena. Dewleta tirke seba nê helwestê înan zirar dana înan zî. Çike qanûnê mîyandewletî binpay kena. Hemverê nê de  bi çalakîyanê xo yê sey rayîr ra şîyayîş, semîner, nobet û sewbîna ma hewl danê Rayber Apo bireso azadîya xo ya fîzîkî. Ma bi nê rengî hewl danê vengêk vejê û xo biresnê Rayberê xo.”

 

‘Pêro çalakîyan de cinî vernê de yê’

 

Nûjîne dewam de wina vat: “Nêzdîyê di aşman o na  çalakîya nobete dewam kena û beşdarbîyayîşê cinîyan ê seba çalakîya nobete baş a. Pêro çalakîyan de cinî vernê de yê. Cinî zanê wexro ke xo ver nêdê, reyna tewr zêde bi şîdetî rî bi rî bimanê û bêrê pelçiqnayîş cinî yê. Seba nê tewr zêde cinî hemverê nê hêrişan xo ver danê. Vengê xo vejenê.”

 

Venga têkoşînê hempar 

 

Nûjîne venga têkoşînê hempar kerd û wina qedêna: “Ma venga pêro kurdan kenê, kurdê teberê welatî û çar hetê ke bi hawayêk çalak tewrê nê prosesî bibê. Seba ma bieşkê hîn zêde vengê xo biresnê dinya ke  no tecrîdo giran ê serê Rayber Apo wextêk nêzdî de bêro peynîkerdiş û Rayberê ma azad bibo.”