Nûjin Nazlican Yildiz

 

WAN - Sîyasetmedaran dîyar kerdî ke Kurdistan her raşte de beno hedef û vatî, welatijê ke tîya de ciwîyenê, bi binpaykerdişê heqan reyde rî bi rî yenê verdayîş. Sewbîna ame vatiş, Kurdistan bi operasyon û talankerdişê xoza ameyo ablûqakerdiş!

 

Xeylêk herêmê Kurdistanî de operasyonê leşkerî, îlankerdişê herêmê qedexe dewam kenê. Bi sebebê operasyonan, xeylêk kesî yenê destbendkerdiş û îşkence înan rê yeno kerdiş. Sewbîna cayê operasyon ci de yenê destpêkerdiş, leşker adir bi daristanan fînenê. Bi sebebê "asayîşî" Kurdistan de talanê ekolojîk zî rî dano.

 

Parlamenterê Partîya Çep a Keske Oznur Bartin û Semra Çaglar dayî zanayîş ke no cardiş seba polîtîkayê înkar û îmhayî yê hemverê şarê kurdî yo.

 

Konseptêk şerî yê cîya Kurdistan de yeno caardiş

 

Parlamentera Partîya Çep a Keske ya Colemêrgî Oznur Bartin da zanayîş ke îlankerdişê herêmê qedexe û operasyonî çîyêk newe nîyê û wina vat: "Nê nimûneyî awankerdişê komare rê bi caardişê Qirkerdişê Zîlan û Dêrsimî yenê zanayîş. Bi prosesî girêdaye nê hêrişî tewr zêde benê. Konseptêk şerî yê cîya Kurdistan de yeno caardiş. No tenê hemverê dewijan nîyo. Hemverê cinî, ciwan, citkar, kesê bi heywanan reyde eleqedar benê, hemverê kesê ke sîyasetê demokratîk rayra benê, no şer yeno rayraberdiş. Cografya ma bi temamî bîya hedef û wazenê ke ma sere bitewnê. Labelê nê şarê têkoşer sere nêtewêneno, fek têkoşînê xo yê demokratîk ra vera nêdano. Do têkoşînê demokratîk dewam bikero. "

 

'Heqê cuye yê dewijan xesp kenê'

 

Oznure dîyar kerd bi hawayêkê cidî verê xo danê Colemêrg û wina vat: "Heme welatîjî bî şahidê îşkenceyê dewijan, tutan rê ameyo kerdiş. Heqê cuye ya dewijan xesp kenê. Rastîyê vengkerdişê dewan ê serra  90an zî werte de yo. Waştişî dewan bêmerdim verdê. Şiwanan şahidîya nê çî kerdî. Welatijê ke debara xo tenê bi weykerdişê heywanan derbaz kerdî, ameyî astengkerdiş. Çi heyf xebere hîn welatijan ra nîna girewtiş. Bi polîtîkayê ters û pelçiqnayîşî vanê qey ê do îradeyê şarî berê. Ê vanê qey do wina xesp bikerê. Labelê ê do sernêkewê."

 

Dewijî bi destûr şinê serê herra xo, qeyûm festîvale virazneno

 

Oznure da zanayîş ke Kurdistan de hêriş esto û vat: "Her raşteyê ke ma vanê warê kulturî de dewlemend ê, yenê çinkerdiş. Golê Satî yê Cîloyî zî nê çî ra para xo girewto. Kesê ke uca ra yê, bi destûr derbaz benê. Cayê ke ma uca de ameyê dinya, ma bi destûr şinê uca. Labelê demo ke canê înan biwazo, ê uca de festîvalan viraznenê. No hêrişêk hemverê kulturî yo. Sewbîna hêrişêk hemverê sîstemê ekolojîye yo."

 

'Ma do raşteyê xo yê têkoşînî hîra bikerê'

 

Oznure dîyar kerd ke raşteyê sîyasetê demokratîkî na rewşe de têkoşîn keno û vat: "Ma qeyûman û bêtesîrverdayîşê meclîsî de nê zanê. Raşteyê sîyasetê demokratîk tena binê banêk de nîno rayraberdiş. Raşteyê sîyasetê demokratîkî her ca de yo. Ma do raşteyê xo yê têkoşîn hîra bikerê."

 

'Polîtîkayêke sîstematîk ê îmha û înkarkerdişî' 

 

Parlamentera Partîya Çep a Keske ya Bedlîsî Semra Çaglar zî da zanayîş ke seserra ya komare de polîtîkayêke sîstematîk ê îmha û înkarkerdişî hemverê kurdan de ameyo rayraberdiş û wina vat: "Şerê Kurdistanî bi hawayêkê sîyasî, komelî, ekonomî tesîr şarî rê keno. Na dewlete seba şarî bawerî nêdana eksê ci şarî kena mîyanê qesawetî. No heta wina dewam bikero, tu çareserî aver nêşina. Xeylêk rey bi hawayêkê keyfî operasyonî yenê kerdiş, cayê qedexe yenê îlankerdiş. No zî tesîrêk negatîf serê cuye de keno."

 

'Walî sûcê yenê kerdiş meşrû vîneno'

 

Semra da zanayîş ke nê qedexeyî benê sebebê binpaykerdişê heqan û wina vat: "Herêmê sey qedexe yenê îlankerdiş, merdiman destbend kenê, kişenê û birîndar kenê. Bedlîs yew merkezê weykerdişê heywanan o labelê bi nê polîtîkayî pesdewarî zî werte ra wedarnenê. No çî rayîr ver bi problemê ekonomî zî akeno. Mêrgî yenê qedexekerdiş. Bi nê reyde feqîrî kenê qedera welatijan."

 

'Kurdistan de koçberî bi xo nêvirazêna'

 

Semra dîyar kerd ke koçberîya Kurdistanî bi hawayêk xozayî nêvirazêna û wina peynî kerd: "No netîceyê polîtîkaya dewlete yo. Wexto ke welatî nêeşkê vejîyê, nêeşkê heywananê xo biçêrênê, nêeşkê debara xo bikerê o wext zorî înan rê yena kerdiş ke uca ra koç bibê. Ciwan û cinî tewr zêde binê tesîrî de manenê. Dewlete bi her hacetê îdeolojîk wazena kurdan terbîye bikera. Wazena asîmîle bika. Ganî ma zî têkoşînê demokrasî, aştî û azadîye bidê."