Oznûr Deger

 

MÊRDÎN - Cinîyê ke derheqê problemê welatî de ma mîkrofon dergê înan kerd, bale ant serê problemê kurdî, asayîş, ekonomî, perwerde, dîndarî, polîtîkayê bêcezaverdayîşî û qirkerdişê cinîyan. Cinîyan ard ziwan ke çareserîya pêro nê probleman, vurnayîşê sîstemî yo.

 

Krîzê zefhetî yê îqtîdarê AKP-MHPyî her roje xorîn benê û tewr zêde cinî nê prosesî ra tesîr benê. Ma cinîyê Mêrdînî ke yew bajarê Kurdistanî yê ke bawerî û kulturê cîya ci de pîya ciwîyenê, problemê tewr pîl ê welatî persa. Cinîyan mîkrofonê ma rê qisey kerd, perwerdî ra bigî heta weşîye, sîyaset ra bigî heta dadgerî, bale antî serê xeylêk babetan û serê azadîya fikr û fehmî û zîndanan.

 

Cinîyê ke mîkrofonê ma rê qisey kerd wina vatî:

 

Welat de têduştî çin a

 

Yıldız Kaplan: Seba mi problemo tewr muhîm ê welatî, ekonomî yo. Nan xeylêk vaye bîyo. Vaykerdişê nan û xidayê bingehînî bi qasê zêdekerdişê meaşê tewr tay o. Ganî sere de no bêro çareserkerdiş. Sebebê krîzê ekonomî, sîyaset o. Eynî wextî de welat de problemê demokrasî esto. Vanê ke welat de têduştî esta, la çin a.

 

Problemê tewr pîl kêmbîyayîşê wendişî yo

 

Welatija ke nêwaşt nameyê xo eşkera bikero: Goreyê mi problemo tewr pîl, kêmbîyayîşê wendişî yo. Merdimî nêfikrîyenê û goreyê çî yenê goşê înan têgêrenê. Merdimî nêfikrîyenê û nêeşkenê şîrove bikerê. Seba nê perwerde lazim o. Eke merdimî biwanê û perwerde bibê do bieşkê rewşe zî şîrove bikerê. Goreyê mi polîtîkayê dînperestî yê welatî, bi zanebîyayîş yenê averşîyayîş.

 

Ganî cinî vengê xo berz bikerê

 

Sîbel Sevînç: Ma wazenê cinî komel de bibê û bişuxilîyê. Ma wazenê ke ê îmkanê karî peyda bikerê. Ma wazenê şîdetê serê cinî peynî bibo. Ganî cinî vengê xo berz bikerê. Ganî cinî sey kes bêrê qebûlkerdiş.

 

'Nê welatî de azadîya ma çin a'

 

Yoncaya ke nêwaşt peynameyê xo bida: Sey cinî ez bi tena sereyê xo nêeşkena şêrî cayêk û qet rehet nîya. Nê welatî de ma nêeşkenê bi asanî biciwîyê û azadîya ma zî çin a. Problemê ma no yo, bellî yo ke kam bîyo sebeb. Ez hêvî kena ke ganî vurnayîşêk bêro kerdiş. Qirkerdişê cinîyan yeno peygoşkerdiş. Cuya tu kesî asayîş de nîya, xususî ê cinîyan. Ma nika sey ereban ciwîyenê. Ziwanê dayîke yê welatê ma do demêk nêzdî de bibo erebkî. Ma tena çîyê ke welat de yenê kerdiş, temaşe kenê. Merdiman bêvengî rê musnayê. Vanê nanê mi bibo bes o. Seba weşîya xo ya psîkolojî zî ma fek ercnayîşî ra vera danê. irov hînî bêdengiyê kirine. Ganî merdimî ewnîyayîşê xo bivurnê.

 

Seba ke azadîya ma ameya astengkerdiş ma nêeşkenê qisey bikerê

 

Kamuran Gulcegun: Problemê tewr pîl ê welatî ekonomîye yo. Dayeyê enflasyon û vayîye ma perîşan kerdo. Ekonomî zaf muhîm a, la serûbin bîya. Şimitişê qehweyêk kafe de êdî çîyêk luks o. Ganî vernê de şarî bifikrîyê. Vernê de bi koçberê ke teber ra yenê eleqedar benê, la ekonomîya ma xeylêk xirab a. Ma nêeşkenê qisey bikerê, seba ke azadîya ma yena astengkerdiş. Eke şar aya bibo, ma do biresê demokrasî, la nê gore zî şar raya xo dano hukmatî. Ganî şima hayîdar bê. Ma eşkenê bi hawayêk bişuxulîyê û debara xo bikerê. La kesê ke nêeşkenê nan berê keye estê. Vanê nê, la estê. Ma vînenê.

 

Kesê ke HUDA PARî nas nêkenê estê

 

Şeyma Maden: Seba mi problemo tewr gird yê welatî no yo ke qîmet nêdanê cinîyan. Camêrdî her tim serdest yenê vînayîş û cinî bindest ê. Reyna sûcê hemverê cinîyan yenê nimitiş. Bêcezabîyayîş problemêk cidî yo. Nê welatî de ekonomî û edalet çin o. Pêwa bi 100 lîra teberê welatî de xeylêk çî yenê girewtiş, la tîya merdimî bi 100 lîra nêeşkenê şêrê bazar. Lazimîyê   bingehînî yê seke berardişê pakitî ke cinî şuxulnenê, xeylêk vay ê. Sey cinî ma êdî neêşkenê debare bikerê. Kesê ke hema HUDA PARî nas nêkenê estê. Yê ke bi israr înan pawenê estê, la kes nêzano ke do çi bêro sereyê înan. Welat her ke şino tewr xirab beno. Ez nêfikrîyena ke ez sey ciwanêke nê welatî de biciwîyî. Ez wazena nê welatî terk bikerî. Yewin amancê mi seba ameyoxê xo welat ra vejîyayîş o.

 

'Ganî serekê ma bêro veradayîş'

 

Sevîm Çeker: Vernîya her çî ganî azadîya kurdan bibo. Ganî serekê ma bêro veradayîş. Eke serekê ma vejîyo do her çî baş bibo. Bi hezaran merdimê bêguna zîndanan de yê. Kesê tecawiz kenê serbest yenê veradayîş, la tepişteyê sîyasî nînê veradayîş.